សមាជិកណាតូមួយប្រទេស ប្រឆាំងសំណើរបស់អឺរ៉ុប ក្នុងការបង្កើនជំនួយយោធា ឲ្យទៅអ៊ុយក្រែន

សមាជិកណាតូមួយប្រទេសគឺហុងគ្រី បានចេញមុខជំទាស់ចំពោះការអំពាវនាវរបស់អឺរ៉ុប ដែលសុំឲ្យបង្កើនការផ្តល់ជំនួយយោធាទៅកាន់ប្រទេសអ៊ុយឲ្យកាន់តែច្រើន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃព្រហស្បតិ៍ទី២០ខែមីនាឆ្នាំ២០២៥ បន្ទាប់ពីកិច្ចប្រជុំកំពូលនៅទីក្រុងព្រុចសែល នៃប្រទេសបែលហ្ស៊ិក, គណៈកម្មការអឺរ៉ុប (EC) បានចេញសេចក្តីប្រកាសរួម ដោយអំពាវនាវឲ្យមានការបង្កើនលំហូរជំនួយយោធាដល់អ៊ុយក្រែន ទាំងដែលគ្មានការគាំទ្រជាឯកច្ឆ័ន្ទពីសំណាក់មេដឹកនាំ EU។

ទោះបីជាយ៉ាងណាក៏ដោយ នាយករដ្ឋមន្ត្រីហុងគ្រីលោក Viktor Orban និយាយថា «ខ្ញុំបានវេតូលើសេចក្តីប្រកាសរួម ទាក់ទងនឹងអ៊ុយក្រែន ពីព្រោះយើងមិនអាចគាំទ្រជំហររួមណាមួយ មុនពេលប្រជាជនហុងគ្រីបង្ហាញមតិរបស់ពួកគេ លើបញ្ហាអ៊ុយក្រែននោះទេ»។

ការប្រឆាំងរបស់លោក Orban នេះ ត្រូវគេមើលឃើញថា លោកនៅតែប្រកាន់ជំហរគាំទ្រសន្តិភាពលើបញ្ហារុស្ស៊ី-អ៊ុយក្រែន ផ្ទុយពីអ្វីដែលលោកយល់ថាជាវិធីសាស្រ្តគាំទ្រសង្គ្រាម របស់ EU ហើយលោកតែងអំពាវនាវឲ្យមានកិច្ចខិតខំប្រឹងប្រែង ក្នុងការនាំភាគីជម្លោះឲ្យចូលមកកាន់តុចរចាសន្តិភាពភ្លាមៗ។

យ៉ាងណាក្តី ជំហរ​របស់លោក Orban ​ធ្វើឲ្យ​ប្រទេស​ជាសមាជិក EU មួយចំនួនមិនពេញចិត្តឡើយ ជាក់ស្តែងរដ្ឋមន្ត្រីការបរទេសលីទុយអានី លោក Gabrielius Landsbergis បានរិះគន់ការវេតូម្តងហើយម្តងទៀតរបស់ហុងគ្រីលើវិធានការគោលនយោបាយការបរទេស EU ដោយអះអាងថា សកម្មភាពបែបនេះធ្វើឲ្យមនុស្សបាត់បង់ជីវិតច្រើនឡើងៗ។

តាមពិតទៅ កាលពីដើមខែនេះ លោក Orban បានវេតូលើសំណើជំនួយយោធារបស់ EU ទៅឲ្យទីក្រុងកៀវ មានទំហំទឹកប្រាក់ជាង ៤១លានដុល្លារអាមេរិក រួចទៅហើយ ដោយលើកហេតុផលថា ជំនួយនេះនឹងមានតែនាំឲ្យជម្លោះរុស្ស៊ី-អ៊ុយក្រែន អូសបន្លាយពេលកាន់តែយូរប៉ុណ្ណោះ។

ពាក់ព័ន្ធការផ្តល់ជំនួយនេះដែរ ទីក្រុងមូស្គូ តែងព្រមានមិនដាច់ពីមាត់ថា រាល់ការបំពាក់អាវុធរបស់លោកខាងលិចទៅឲ្យអ៊ុយក្រែន មានតែដុតភ្លើងសង្គ្រាមឲ្យបន្តឆាបឆេះកាន់តែសន្ធោសន្ធៅប៉ុណ្ណោះ ហើយនឹងនាំឲ្យខ្នងបង្អែករបស់ទីក្រុងកៀវនៅបរទេស ក្លាយជាភាគីជម្លោះដោយផ្ទាល់ថែមទៀតផង៕

អត្ថបទ៖ សុខ សុវណ្ណ

ចុចអាន៖ ហុងគ្រី៖ ការ​​យក​លុយទៅជួយ​អ៊ុយក្រែន​ធ្វើ​សង្គ្រាម ដូច​បំផ្លាញ​អឺរ៉ុប​ទាំង​មូល