កូរ៉េ​ខាង​ជើង ត្រៀម​នាំ​ចេញ​ដ្រូន​​​ទៅ​លក់​ឲ្យ​មជ្ឈិមបូព៌ា និង​អាហ្វ្រិក

យោង​តាម​​របាយការណ៍​របស់​ Daily Nk នៅថ្ងៃ​ចន្ទ​ទី​២៤​ខែ​មីនា​នេះ ប្រទេសកូរ៉េខាងជើងកំពុងរៀបចំនាំចេញដ្រូន ដែលផលិតក្នុងស្រុកទៅ​លក់​ឲ្យបណ្តាប្រទេសនៅមជ្ឈិមបូព៌ា និងអាហ្វ្រិក បើទោះបីជាទណ្ឌកម្មអន្តរជាតិដាក់កម្រិតលើពាណិជ្ជកម្មអាវុធរបស់ខ្លួនក៏ដោយ។

របាយការណ៍បង្ហាញថា ទីក្រុងព្យុងយ៉ាងបានបង្កើនការផលិតដ្រូន​យ៉ាងច្រើន រួមទាំង​ដ្រូន​​ឈ្លបយកការណ៍ ដ្រូន​វាយប្រហារ និងដ្រូន​អត្តឃាត ដែលអាចផ្គត់ផ្គង់ដល់ប្រទេសសម្ព័ន្ធមិត្ត និងក្រុមសកម្មប្រយុទ្ធនៅក្នុងតំបន់ជម្លោះ​នា​ពេលឆាប់ៗ​ខាង​មុខ។

ការផលិតទ្រង់ទ្រាយធំ និងយុទ្ធសាស្ត្រគេចវេស

យោងតាមប្រភពដែលស្គាល់ពីឧស្សាហកម្មយោធារបស់កូរ៉េខាងជើង ប្រទេសនេះបានចាប់ផ្តើមការផលិតយន្តហោះគ្មានមនុស្សបើកក្នុងទ្រង់ទ្រាយធំនៅចុងឆ្នាំ​២០២៤ បន្ទាប់ពីមានការបញ្ជាផ្ទាល់ពីមេដឹកនាំ​លោក គីម ជុងអ៊ុន។ ដើម្បីជៀសវាងការរកឃើញ និងការដាក់ទណ្ឌកម្ម កូរ៉េខាងជើងត្រូវបានគេរាយការណ៍ថា​បានដកលេខសម្គាល់ និងសញ្ញាសម្គាល់ទាំងអស់ចេញពី​ដ្រូន ដែលធ្វើឲ្យ​គេ​ពិបាកក្នុងការតាមដាន។

ដ្រូន​ ដែលត្រូវបានគេជឿថាយកគំរូតាមរចនាម៉ូដរបស់រុស្ស៊ី និងចិន កំពុងត្រូវបានផ្គុំនៅទីតាំងជាច្រើនដែល​​លាក់​ការណ៍​យ៉ាង​សម្ងាត់​ជា​ទីបំផុត។ ទីភ្នាក់ងារ​ចារកម្ម​ បាន​ឲ្យ​ដឹង​ថា កូរ៉េខាងជើងកំពុងផ្តល់អាទិភាពដល់​ដ្រូន ដែលមានរយៈចម្ងាយឆ្ងាយ និង​មានសមត្ថភាព​ស៊ើបការណ៍សម្ងាត់ ហើយ​អាច​វាយប្រហារតាមអាកាស និង​ផ្ទក​គ្រាប់បែក​អត្តឃាត​លើ​គោលដៅ។

ទីផ្សារគោលដៅ៖ មជ្ឈិមបូព៌ា និងអាហ្វ្រិក

គោលដៅចម្បងសម្រាប់ដ្រូន​ទាំងនេះរួមមាន:

អ៊ីរ៉ង់ និងស៊ីរី៖ ជា​សម្ព័ន្ធមិត្តដ៏យូរលង់របស់កូរ៉េខាងជើង ប្រទេសទាំងពីរបានទទួលបច្ចេកវិទ្យាយោធាពីទីក្រុងព្យុងយ៉ាងនាពេលកន្លងមក។ ដ្រូន​អាចបង្កើនសមត្ថភាពយោធារបស់ពួកគេ ជាពិសេសនៅក្នុងជម្លោះដែលកំពុងបន្ត។

ក្រុមឧទ្ទាម​ហ៊ូធី​នៅ​ប្រទេស​យេម៉ែន៖ ដោយមានការគាំទ្រពីប្រទេសអ៊ីរ៉ង់ ក្រុម​ហ៊ូធីបានប្រើប្រាស់​ដ្រូន​ជាញឹកញាប់ប្រឆាំងនឹងអារ៉ាប៊ីសាអូឌីត និងអ៊ីស្រាអែល។ ដ្រូន​របស់កូរ៉េខាងជើងអាចផ្តល់​ឲ្យ​ពួកគេនូវជម្រើសវាយប្រហារកម្រិតខ្ពស់បន្ថែមទៀត។

ក្រុមប្រដាប់អាវុធអាហ្រ្វិក៖ អង្គការយោធាជាច្រើននៅទូទាំងទ្វីប​អាហ្វ្រិក​កំពុងស្វែងរក​ដ្រូន​ប្រយុទ្ធកម្រិតខ្ពស់ ដែលកូរ៉េខាងជើងអាចផ្តល់ជូនក្នុងតម្លៃទាបជាងក្រុមហ៊ុន​លោកខាងលិច ឬ​ក្រុមហ៊ុន​ចិន។

ប្រតិកម្មសកល និងហានិភ័យ

ការនាំចេញដ៏មានសក្តានុពលនៃ​ដ្រូន​របស់កូរ៉េខាងជើងកំពុង​បង្កើន​ការ​ព្រមាន ក្នុងចំណោមប្រទេសលោកខាងលិច និងអ្នកឃ្លាំមើលអង្គការសហប្រជាជាតិ ដែល​សង្កត់​ធ្ងន់​ថា អាវុធបែបនេះអាចធ្វើឲ្យមានអស្ថិរភាពដល់តំបន់ដែលផុយស្រួយរួចទៅហើយ។ អ្នកវិភាគបានលើកឡើងថា ទីក្រុងព្យុងយ៉ាងកំពុងប្រើប្រាស់ការនាំចេញ​ដ្រូន​ជា ប្រភពនៃរូបិយប័ណ្ណរឹង ចំពេលមានទណ្ឌកម្ម​ដែល​ធ្វើ​​ឲ្យ​សេដ្ឋកិច្ច​ខ្លួន​កំពុងធ្លាក់ចុះ។

ទីភ្នាក់ងារស៊ើបការណ៍សម្ងាត់អាមេរិក និងកូរ៉េខាងត្បូងកំពុងតាមដានយ៉ាងដិតដល់នូវកិច្ចព្រមព្រៀងសព្វាវុធរបស់ទីក្រុងព្យុងយ៉ាង ដោយបារម្ភថា ដ្រូន​ទាំងនេះអាចត្រូវបានប្រើប្រាស់ប្រឆាំងនឹងសម្ព័ន្ធមិត្តរបស់សហរដ្ឋអាមេរិក ឬសូម្បីតែនៅក្នុងជម្លោះនាពេលអនាគតពាក់ព័ន្ធនឹងកូរ៉េខាងជើង។ អ្នកជំនាញក៏បានព្រមានផងដែរថា ដ្រូន​អាចនឹងត្រូវធ្លាក់ទៅក្នុង​ដៃរបស់អង្គការភេរវករ ប្រសិនបើមិនមានការគ្រប់គ្រងយ៉ាងតឹងរ៉ឹង៕

ដោយ៖ ឈាង