​​​លោក ត្រាំ ​ស្វាគមន៍​​នាយករដ្ឋមន្ត្រី​​​អ៊ីស្រាអែល​ ខណៈ​យោធាអ៊ីស្រាអែល​វាយ​ប្រហារយ៉ាងសន្ធាប់​

ការវាយប្រហាររបស់អ៊ីស្រាអែលនៅតំបន់ហ្គាហ្សា បានសម្លាប់មនុស្សយ៉ាងហោចណាស់៣២នាក់ដែលភាគច្រើន​​ជា​ស្ត្រី និងកុមារ ស្របពេល​​ដែល​នាយករដ្ឋមន្ត្រីអ៊ីស្រាអែល លោក Benjamin Netanyahu បានធ្វើដំណើរទៅសហរដ្ឋ​អាមេរិក ដើម្បី​​ជួបជាមួយប្រធានាធិបតី Donald Trump និយាយអំពីសង្គ្រាម។ នេះបើយោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី០៧ខែមេសានេះ។

ការវាយប្រហាររបស់អ៊ីស្រាអែលពេញមួយយប់ថ្ងៃអាទិត្យទៅលើតង់​បណ្តោះអាសន្ន​​មួយនិងផ្ទះមួយនៅភាគខាងត្បូងនៃទីក្រុង Khan Younis បានសម្លាប់បុរស៥នាក់ស្ត្រី៥នាក់និងកុមារ៥នាក់ ដោយ​រួមទាំងក្មេងទើបចេះដើរតេះតះម្នាក់និង អ្នក​កាសែត​ស្រី​ម្នាក់​។

ការបាញ់ផ្លោងរបស់អ៊ីស្រាអែលក៏បានសម្លាប់មនុស្សយ៉ាងហោចណាស់៤នាក់នៅក្នុងជំរុំជនភៀសខ្លួន Jabaliya នៅភាគខាងជើងហ្គាហ្សា។ ជាមួយគ្នានេះយោងតាមអ្នកយកព័ត៌មានរបស់ Associated Press មានសាកសពមនុស្ស ៧នាក់ រួមទាំងកុមារម្នាក់ និងស្ត្រី៣នាក់ បញ្ជូន​មកដល់មន្ទីរពេទ្យ Al-Aqsa Martyrs ក្នុងទីក្រុង Deir al-Balah ។

លើស​ពីនេះ ការវាយប្រហាររបស់អ៊ីស្រាអែល​លើហ្វូងមនុស្សដែលកំពុងរង់ចាំនៅខាងក្រៅហាងនំប៉័ងមួយកន្លែង បានសម្លាប់​មនុស្សយ៉ាងហោចណាស់៦នាក់ ក្នុងនោះមានកុមារ៣នាក់។ នេះបើយោងតាមការការពារស៊ីវិលដែលប្រតិបត្តិការក្រោមរដ្ឋាភិបាលដែលគ្រប់គ្រងដោយក្រុមហាម៉ាស។

លោក Netanyahu បានទៅជួបលោក Trump ចំពេលមានការតវ៉ាប្រឆាំងសង្គ្រាម។ ប្រជាជនប៉ាឡេស្ទីនរាប់​សិប​នាក់​បានដើរតាមផ្លូវក្នុងទីក្រុង Jabaliya តវ៉ាប្រឆាំងសង្គ្រាមថ្មីនេះ។ ហ្វូងមនុស្សមានការខឹងសម្បារប្រទេសអ៊ីស្រាអែល​​ចំពោះការបន្តសង្រ្គាមឡើងវិញ និងឥទ្ធិពលរបស់ហាម៉ាសទៅលើចំណាប់ខ្មាំងដែលនៅសេសសល់នៅក្នុងតំបន់​ហ្គាហ្សា។ គ្រួសារចំណាប់ខ្មាំង រួមជាមួយនឹងអ្នកមួយចំនួនដែលទើបរួចខ្លួនពីហ្គាហ្សា បានជំរុញឱ្យលោក Trump ជួយ​ធានាឱ្យការប្រយុទ្ធគ្នាបញ្ចប់។

លោក Netanyahu នៅថ្ងៃចន្ទ​នេះ នឹងជួបជាមួយលោក Trump ដែលជា​ជំនួប​​លើកទីពីរចាប់តាំងពីលោក Trump បានចាប់ផ្តើមអាណត្តិថ្មីក្នុងខែមករា។ មេដឹកនាំទាំងពីរនឹងពិភាក្សាអំពីសង្គ្រាម និងពន្ធថ្មីចំនួន​១៧% ដែលត្រូវបានដាក់លើអ៊ីស្រាអែល ដែលជាផ្នែកនៃការសម្រេចចិត្តជាសកលដ៏ធំទូលាយដោយសហរដ្ឋអាមេរិក ខណៈសហរដ្ឋអាមេរិក ដែលជាអ្នកសម្រុះសម្រួលក្នុងកិច្ចខិតខំប្រឹងប្រែងបទឈប់បាញ់ជាមួយអេហ្ស៊ីប និងកាតា បានបង្ហាញការគាំទ្រចំពោះការបន្តសង្គ្រាមរបស់អ៊ីស្រាអែលកាលពីខែមុន។

គួរបញ្ជាក់ថា សង្រ្គាមបានចាប់ផ្តើមនៅពេលដែលពួកសកម្មប្រយុទ្ធដឹកនាំដោយហាម៉ាស បានវាយប្រហារលើប្រទេស​អ៊ីស្រាអែល​កាលពីថ្ងៃទី​៧ខែតុលា ឆ្នាំ២០២៣ ដោយបានសម្លាប់មនុស្សប្រហែល ១២០០នាក់ និងចាប់ចំណាប់ខ្មាំង ២៥១​នាក់។

​ជាការ​ឆ្លើយ​តប​ អ៊ីស្រាអែល​ប្រកាស​សង្គ្រាម​ប្រឆាំង​ក្រុម​​ហាម៉ាស ដោយ​​បានសម្លាប់ជនជាតិប៉ាឡេស្ទីនយ៉ាងហោចណាស់ ៥០០៦៩៥នាក់​រហូត​ដល់​ពេលនេះ​។ យោង​តាមតួលេខ​របស់​ក្រសួងសុខាភិបាលរបស់ហ្គាហ្សា ដែលមិនបានបញ្ជាក់ថាប៉ុន្មាននាក់ជាជនស៊ីវិល ឬអ្នកប្រយុទ្ធ ប៉ុន្តែបានឲ្យដឹងថាជាងពាក់កណ្តាលជាស្ត្រី និងកុមារ។ រីឯអ៊ីស្រាអែល​និយាយ​ថា ខ្លួន​បាន​សម្លាប់​ពួក​សកម្មប្រយុទ្ធ​ប្រហែល​២០០០០​នាក់ ដោយ​មិន​បាន​ផ្តល់​ភស្តុតាងជាក់លាក់៕

អត្ថបទ៖ ប៊ុន សុភាព