កាណាដា ​នឹង​​ប្រើ​យន្តហោះ​ល្បាត​ តាមដាន​​ការបំពាន​ទណ្ឌកម្ម​របស់​កូរ៉េ​ខាង​ជើង

ប្រទេសកាណាដា បានប្រកាសពីការដាក់ពង្រាយយន្តហោះល្បាតដែនសមុទ្រ Royal Canadian Air Force CP-140 Aurora ទៅកាន់ប្រទេសជប៉ុន ដែលជាផ្នែកមួយនៃប្រតិបត្តិការ NEON ជាការរួមចំណែកបន្តរបស់ខ្លួនចំពោះកិច្ចខិតខំប្រឹងប្រែងពហុជាតិ ដើម្បីអនុវត្តការដាក់ទណ្ឌកម្មរបស់ក្រុមប្រឹក្សាសន្តិសុខអង្គការសហប្រជាជាតិ (UNSC) ប្រឆាំងនឹងកូរ៉េខាងជើង។

យោង​តាម​ការ​ប្រកាស​របស់​ក្រសួង​ការបរទេស​ជប៉ុន​​កាល​ពី​ថ្ងៃ​ព្រហស្បតិ៍​ទី​១៧​ខែ​មេសា​ យន្តហោះ CP-140 Aurora អមដោយបុគ្គលិកប្រមាណ ៥០​នាក់ នឹងធ្វើប្រតិបត្តិការចេញពីមូលដ្ឋានអាកាស Kadena ក្នុងទីក្រុង Okinawa សម្រាប់បេសកកម្មរយៈពេល ៤​សប្តាហ៍។ ការដាក់ពង្រាយនេះ នឹង​ធ្វើ​ឡើង​នៅ​ចុង​ខែ​មេសា​រហូត​ដល់​ពាក់​កណ្ដាល​ខែ​ឧសភា​ ហើយ​មានគោលបំណងត្រួតពិនិត្យ និងទប់ស្កាត់សកម្មភាពដែនសមុទ្រខុសច្បាប់របស់កូរ៉េខាងជើង ជាពិសេសការ​លួច​ដឹក​ឥន្ធនៈ​តាម​កប៉ាល់ និងទំនិញផ្សេងទៀតដែលត្រូវបានហាមឃាត់ក្រោមទណ្ឌកម្មរបស់ UNSC ដែលបានដាក់តាំងពីឆ្នាំ​២០០៦។

ទណ្ឌកម្មទាំងនេះត្រូវបានរៀបចំឡើងដើម្បីដាក់សម្ពាធលើទីក្រុងព្យុងយ៉ាង​ឲ្យ​បោះបង់ចោលកម្មវិធីអាវុធប្រល័យលោក និងឆ្លើយតបទៅនឹងការបាញ់សាកល្បងអាវុធនុយក្លេអ៊ែរ និងមីស៊ីល​បាលិស្ទិក​របស់ខ្លួន។

នេះជាការដាក់ពង្រាយលើកទី១១ របស់ប្រទេសកាណាដា ក្រោមប្រតិបត្តិការ NEON ចាប់តាំងពីឆ្នាំ​២០១៨ ដោយបង្ហាញពីការប្តេជ្ញាចិត្តរបស់ខ្លួនក្នុងការរក្សាសន្តិសុខ និងសណ្តាប់ធ្នាប់អន្តរជាតិ។

CP-140 Aurora គឺជាយន្តហោះល្បាតរយៈចម្ងាយឆ្ងាយដែលបំពាក់ដោយសមត្ថភាពឃ្លាំមើលកម្រិតខ្ពស់ ដែលធ្វើ​ឲ្យ​វាស័ក្តិសមសម្រាប់ការត្រួតពិនិត្យសកម្មភាពដែនសមុទ្រ និងកំណត់អត្តសញ្ញាណការបំពានទណ្ឌកម្មដែលអាចកើតមាន៕

ដោយ៖ ឈាង