មូលហេតុពិត នៃការយាងចូលទិវង្គតរបស់សម្តេបប៉ាប ហ្វ្រង់ស៊ីស

សម្តេបប៉ាប ហ្វ្រង់ស៊ីស បានយាងចូលទិវង្គតកាលពីថ្ងៃចន្ទទី២១ខែមេសាឆ្នាំ២០២៥ បន្ទាប់ពីព្រះរាជសុខភាពរបស់ទ្រង់ ធ្លាក់ចុះទ្រុឌទ្រោមខ្លាំង អស់រយៈពេលជាច្រើនខែមកនេះ ហើយឥឡូវ បុរីវ៉ាទីកង់បានចេញសេចក្តីប្រកាសថា សម្តេចប៉ាបយាងចូលទិវង្គត ដោយសារជំងឺដាច់សរសៃឈាមខួរក្បាល និងគាំងបេះដូង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការបញ្ជាក់ពីបុរីវ៉ាទីកង់ សម្តេចប៉ាបបានយាងចូលទិវង្គតនៅវិមាន Casa Santa Marta នាវេលាម៉ោង ៧:៣៥នាទី (ម៉ោងនៅអ៊ីតាលី) ក្នុងព្រះជន្មាយុ៨៨ព្រះវស្សា។

ក្រោយការយាងចូលទិវង្គតរបស់ទ្រង់ មនុស្សជុំវិញផែនដី បាននាំគ្នាឧទ្ទិសនិងបួងសួង ព្រមទាំងអធិស្ឋានឲ្យព្រះវិញ្ញាណក្ខន្ធរបស់ទ្រង់ បានឡើងកាន់ឋានសួគ៌។

មុនចូលទិវង្គត សម្តេចប៉ាប ទើបតែចាកចេញពីមន្ទីរពេទ្យ Gemelli នៅទីក្រុងរ៉ូមប៉ុណ្ណោះ បន្ទាប់ពីទទួលការព្យាបាលបញ្ហាផ្លូវដង្ហើម បណ្តាលមកពីរលាកសួតធ្ងន់ធ្ងរ ចាប់តាំងតែពីថ្ងៃទី១៤ខែកុម្ភៈមក។

ក្រោយបាន​ធូរស្បើយ​បន្តិច សម្តេចក៏​បង្ហាញព្រះកាយ​នៅ​ចំពោះ​មុខ​មនុស្ស​លើ​ទីលាន St Peter’s Square សម្រាប់​ពីធីបុណ្យ Easter Sunday ហើយ​ក៏​ជួប​អនុប្រធានាធិបតី​អាមេរិក JD Vance មុនពេលលាចាកលោក។

សូមជម្រាបថា ទ្រង់គឺជាសម្តេចប៉ាប Jesuit ដំបូងបង្អស់, ជាសម្តេចប៉ាបទីមួយមកពីទ្វីបអាមេរិក, ជាសម្តេចប៉ាបទីមួយមកពីអឌ្ឍគោលខាងត្បូង និងជាសម្តេចប៉ាបដែលមិនមែនជាជនជាតិអឺរ៉ុបដំបូងគេបង្អស់ ចាប់តាំងពីសម្តេចប៉ាប Gregory ទី៣ កាលពីជាង១ ០០០ឆ្នាំមុន។

សម្តេចប៉ាបហ្វ្រង់ស៊ីស មានព្រះនាមកំណើតថា Jorge Mario Bergoglio ប្រសូត​ក្នុងគ្រួសារជា​ជនអន្តោប្រវេសន៍​អ៊ីតាលីនៅថ្ងៃទី១៧ខែ​ធ្នូឆ្នាំ១៩៣៦ក្នុងទីក្រុង ប៊ុយណូស៊ែរ នៃប្រទេសអាហ្សង់ទីន។

ទ្រង់បានសិក្សាផ្នែកគីមីវិទ្យាកាលពីនៅក្មេង ហើយក្រោយមកបានជ្រើសរើសចូលរួមក្នុងសមាគមព្រះយេស៊ូវ (Jesuits) ក្នុងឆ្នាំ ១៩៥៨ រួចក៏ត្រូវតែងតាំងជាអាចារ្យនៅឆ្នាំ១៩៦៩។

សម្តេចប៉ាបហ្វ្រង់ស៊ីស បានដឹកនាំព្រះវិហារកាតូលិកអស់រយៈពេល១២ឆ្នាំ ក្រោយត្រូវបានបោះឆ្នោតជ្រើសរើសក្នុងខែមីនាឆ្នាំ២០១៣ បន្ទាប់ពីការលាលែងតំណែងជាប្រវត្តិសាស្ត្ររបស់សម្តេចប៉ាប Benedict ទី១៦ ដោយសារវ័យជរា៕

អត្ថបទ៖ សុខ សុវណ្ណ

ចុចអាន៖ សម្តេចប៉ាប ហ្រ្វង់ស៊ីស យាងចូលទិវង្គត ក្នុង​ជន្មាយុ ៨៨ព្រះវស្សា