មីយ៉ាន់ម៉ានិង​ថៃ​រងការ​វាយប្រហារ​ដោយ​រញ្ជួយដីកម្រិតស្រាលចំនួន៧​នៅយប់មិញ​

រញ្ជួយដីចំនួនប្រាំពីរ​លើក​ដែលមានកម្រិតស្រាលចាប់ពី ១.៤ ដល់ ៣.១ រ៉ិចទ័របានវាយប្រហារប្រទេសមីយ៉ាន់ម៉ាកាលពីថ្ងៃព្រហស្បតិ៍ ដោយមានការរញ្ជួយខ្លះនៅភាគខាងជើងប្រទេសថៃ។ នេះបើយោងតាមការចេញផ្សាយរបស់សារព័ត៌មាន The Nation នៅថ្ងៃទី២៥ខែមេសានេះ។

យោងតាមនាយកដ្ឋានអង្កេតរញ្ជួយដីនៃនាយកដ្ឋានឧតុនិយមថៃ ចំណុចកណ្តាលនៃការរញ្ជួយដីស្ថិតនៅប្រទេស​មីយ៉ាន់ម៉ា ដែលមានជម្រៅចន្លោះពី ១ ទៅ១១ គីឡូម៉ែត្រ។ នាយកដ្ឋាននេះបានឲ្យដឹងថា ការរញ្ជួយដីបែបនេះ​(aftershock) ជាធម្មតាមិនបណ្តាលឱ្យមានការខូចខាតហេដ្ឋារចនាសម្ព័ន្ធសំខាន់ៗនោះទេ។

ពេលវេលានៃការរញ្ជួយទាំង៧កើតឡើងនៅចន្លោះពីម៉ោង ១២:៤៤ពាក់កណ្ដាលអាធ្រាត ដល់ម៉ោង ១០:៥២ ព្រឹក ដោយ​មានមួយក្នុងចំណោម៧ស្ថិតនៅក្នុងស្រុក Pang Mapha ខេត្ត Mae Hong Son ប្រទេសថៃ។ ទោះបីជាមិនទាន់មានសេចក្តីរាយការណ៍ពីការខូចខាតធ្ងន់ធ្ងរក៏ដោយ ក៏នាយកដ្ឋានបានណែនាំដល់សាធារណជនឱ្យបន្តធ្វើការតាមព័ត៌មានពីការរញ្ជួយតាមរយៈបណ្តាញផ្លូវការ និងស្វែងយល់អំពីនីតិវិធីសុវត្ថិភាពរញ្ជួយដី។

គួរបញ្ជាក់ថា រញ្ជួយដីកម្រិត៧.៧រ៉ិចទ័រដែលបានវាយប្រហារកាលពីថ្ងៃទី២៨ខែមីនា បណ្ដាលឲ្យមនុស្សចំនួន ៥,៣៥២នាក់ស្លាប់, របួស ៧,១០៨នាក់ និងបាត់ខ្លួនចំនួន ៥៣៨នាក់ បើយោងតាម Mizzima News។ ប៉ុន្តែបើតាមក្រុមប្រឹក្សារដ្ឋបាលរដ្ឋរបស់របបយោធា មានមនុស្ស ៣,៧២៧ នាក់បានស្លាប់, ១២៩នាក់កំពុងបាត់ខ្លួន និង ៥,១០៦ នាក់បានរងរបួស។ លើសពីនេះមនុស្សប្រមាណ ៤ ម៉ឺនកំពុងស្នាក់នៅក្នុងតង់បណ្ដោះអាសន្ន ខ្វះទឹកស្អាតដែលបង្កើននិភ័យឆ្លងជំងឺផ្សេងៗ៕

អត្ថបទ៖ ប៊ុន សុភាព