ព័ត៌មានអន្ដរជាតិ

ប៉ូលិសថៃរឹបអូសពោះវៀនជ្រូកនាំចូលពីចិនជាង៤០តោនត្រៀមចែកចាយតាមភោជនីយដ្ឋាន

បានផុស

២៣ វិនាទី មុន

នៅ

ថ្ងៃអង្គារ ២៩ មេសា ២០២៥

ដោយ

យោងតាមការចេញផ្សាយរបស់សារព័ត៌មាន The Nation នៅថ្ងៃទី២៩ខែមេសានេះ ប៉ូលិសថៃបានរឹបអូសពោះវៀនជ្រូកប្រលាក់អំបិលចំនួន ៥១៤ ធុង ទម្ងន់ជាង ៤១ តោន ដែលមានតម្លៃប្រមាណជាង ១០លានបាត ( ៣០ ម៉ឺនដុល្លារ)។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃចន្ទ ប៉ូលិសថៃ បានឆ្មក់ចូលឃ្លាំងស្តុកទំនិញខុសច្បាប់មួយក្នុងស្រុក Krathum Baen ខេត្ត Samut Sakhon បន្ទាប់ពីមានព័ត៌មានថា ពោះវៀនជ្រូកនាំចូលដោយខុសច្បាប់ពីប្រទេសចិនកំពុងរក្សាទុកនៅទីនោះ។
ប្រតិបត្តិការនេះគឺជាកិច្ចខិតខំប្រឹងប្រែងរួមគ្នារវាងការិយាល័យស៊ើបអង្កេតកណ្តាល (CIB) និងនាយកដ្ឋានអភិវឌ្ឍន៍បសុសត្វ ដើម្បីបង្ក្រាបការនាំចូលអាហារខុសច្បាប់។

ប៉ូលិស បានចាប់ខ្លួនស្ត្រីជនជាតិថៃម្នាក់ដែលគេស្គាល់ឈ្មោះ Chawadol ដែលគេរាយការណ៍ថា ជាម្ចាស់ឬអ្នកជួលឃ្លាំង។ ការស៊ើបអង្កេតបឋមបានបង្ហាញថា អ្នកជួលឃ្លាំងនេះពិតប្រាកដគឺជាជនជាតិចិនដែលត្រូវបានគេស្គាល់ថាឈ្មោះ Chen បានចុះបញ្ជីកន្លែងសម្រាប់រក្សាទុកផលិតផលសត្វប្រឡាក់អំបិលកែច្នៃ។ អាជ្ញាធរសង្ស័យថា ពោះវៀនជ្រូកទាំងនេះមានបំណងចែកចាយដល់ភោជនីយដ្ឋាននានាទូទាំងប្រទេសថៃ។

បើតាមសម្ដីប៉ូលិសស្ថានភាពនៅក្នុងឃ្លាំងពោរពេញទៅដោយធូលី កខ្វក់ និងគ្រឿងក្នុងសត្វរាយប៉ាយពាសពេញតុ បញ្ចេញក្លិនស្អុយខ្លាំង។ ក្រុមមន្ត្រីថៃបានបញ្ជាក់ថា ការដំឡើងឃ្លាំងនេះមិនបានបំពេញតាមស្តង់ដារអនាម័យមូលដ្ឋាន និងបង្កហានិភ័យនៃការចម្លងរោគយ៉ាងធ្ងន់ធ្ងរ។

ការត្រួតពិនិត្យបន្ថែមទៀតបានរកឃើញការវេចខ្ចប់ដែលមានស្លាកជាភាសាបរទេស រួមទាំងបាវជីអ៊ុយរ៉េដែលមានសញ្ញាថា «MADE IN VIETNAM» ដែលបង្កើនការព្រួយបារម្ភបន្ថែមទៀតអំពីការបំពុលសារធាតុគីមីដែលអាចកើតមាន។

ក្រោយការវាយឆ្មក់នេះអាជ្ញាធរថៃបានរឹបអូសវត្ថុទាំងអស់ និងប្រមូលសំណាកមកធ្វើតេស្តនៅមន្ទីរពិសោធន៍ ដើម្បីកំណត់ប្រភេទបំណែកសត្វពាក់ព័ន្ធ និងពិនិត្យរកមេរោគបង្កគ្រោះថ្នាក់ ខណៈដំណើរការផ្លូវច្បាប់ចំពោះភាគីដែលទទួលខុសត្រូវទាំងអស់កំពុងដំណើរការ៕