ព័ត៌មានអន្ដរជាតិ

ICC ច្រានចោលសំណើ Duterte ចង់ប្តូរចៅក្រម២រូប ខណៈភស្តុតាង១៣៩ដាក់ចូលតុលាការ

បានផុស

៣ សប្តាហ៍ មុន

នៅ

ថ្ងៃព្រហស្បតិ៍ ៨ ឧសភា ២០២៥

ដោយ

តុលាការឧក្រិដ្ឋកម្មអន្តរជាតិ (ICC) បានច្រានចោលបណ្តឹងរបស់ក្រុមមេធាវីការពារក្តីរបស់អតីតប្រធានាធិបតីហ្វីលីពីន លោក Rodrigo Duterte ក្នុងការដោះដូរចៅក្រម២រូបជាចៅក្រមក្នុងសំណុំរឿងឧក្រិដ្ឋកម្មប្រឆាំងនឹងមនុស្សជាតិប្រឆាំងនឹងរូបគាត់។ នៅទីក្រុងឡាអេ ប្រទេសហូឡង់។

ប្រធានចៅក្រមនៃតុលាការ ICC លោកស្រី Iulia Antoanella Motoc ពេលស្បថចូលកាន់ដំណែងកាលខែមីនាឆ្នាំ២០២៤។ ICC

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីថ្លែងការណ៍របស់ ICC បានសរសេរថា៖«ការដោះដូរចៅក្រមពីការអនុវត្តមុខងារមួយអាចត្រូវបានស្វែងរកដោយចៅក្រមដែលពាក់ព័ន្ធដោយផ្ទាល់នៅចំពោះមុខគណៈប្រធានចៅក្រមប៉ុណ្ណោះ ផ្ទុយពីការដកសិទ្ធិដែលអយ្យការ ឬអ្នកដែលត្រូវបានស៊ើបអង្កេត ឬកាត់ទោសអាចដាក់សំណើនៅចំពោះមុខគណៈប្រធានចៅក្រម»។

ប្រធានចៅក្រមនៃតុលាការ ICC លោកស្រី Iulia Antoanella Motoc បានបន្ថែមនៅក្នុងសេចក្តីថ្លែងការណ៍នោះថា៖«ដូចដែលបានបញ្ជាក់ដោយក្រុមប្រឹក្សាចៅក្រម «គ្មានការស្នើសុំជាមុនអាចត្រូវបានធ្វើឡើងដោយភាគីដែលចៅក្រមស្នើសុំការដោះសាររបស់គាត់នោះទេ» ហើយសកម្មភាពបែបនេះ «ខ្វះភាពម្ចាស់ការតាមនីតិវិធី»។

សារព័ត៌មាន Daily Inquirer របស់ហ្វីលីពីន បានរាយការណ៍ថា មុននេះ មេធាវីការពារក្តីលោក Rodrigo Duterte បានដាក់ញត្តិទៅប្រធានតុលាការICC សម្រាប់ការបដិសេធដោយផ្នែករបស់ចៅក្រម Reine Adelaide Sophie Alapini-Gansou និង Maria del Socorro Flores Liera ពីការចូលរួមក្នុងការពិភាក្សារបស់អង្គបុរេជំនុំជម្រះទី១ លើបញ្ហានៃយុត្តាធិការ ដោយលើកឡើងពីក្តីបារម្ភចំពោះភាពលម្អៀងដែលដឹងមុន។

ចៅក្រម Reine Adelaide Sophie Alapini-Gansou និង Maria del Socorro Flores Liera ដែលក្រុមការពារក្តីលោក Duterte ស្នើដក។

លោក Duterte ត្រូវបានចាប់ខ្លួននៅទីក្រុងម៉ានីលកាលពីថ្ងៃទី១១ខែមីនា ក្រោមដីកាបង្គាប់ឲ្យចាប់ខ្លួនរបស់ ICC ហើយត្រូវបានចាប់បញ្ជូនទៅកាន់ទីក្រុងឡាអេនៅថ្ងៃដដែលនោះ។ អតីតប្រធានាធិបតីហ្វីលីពីនរូបនេះ ត្រូវបានគេស្តីបន្ទោសចំពោះការសម្លាប់មនុស្សរាប់ពាន់នាក់ក្នុងអំឡុងពេលនៃការកាន់អំណាចរបស់លោក ដែលលោកហៅថាសង្រ្គាមលើគ្រឿងញៀនរវាងឆ្នាំ ២០១៦ ដល់២០២២។ លោក ត្រូវបានចោទប្រកាន់ពីបទប្រឆាំងមនុស្សជាតិ ដោយសារតែការសម្លាប់មនុស្សរាប់នាក់នៅក្រៅសំណាញ់ច្បាប់។

សេចក្តីរាយការណ៍របស់ GMA News ផ្សាយនៅថ្ងៃពុធទី៧ខែឧសភានេះ ឲ្យដឹងថា ការចោទប្រកាន់ក្នុងសំណុំរឿងឧក្រិដ្ឋកម្មប្រឆាំងមនុស្សជាតិរបស់អតីតប្រធានាធិបតី Rodrigo Duterte នៅចំពោះមុខតុលាការឧក្រិដ្ឋកម្មអន្តរជាតិ (ICC) បានដាក់ភស្តុតាងចំនួន ១៣៩ ប្រឆាំងនឹងគាត់។

កញ្ចប់ភស្តុតាងប្រឆាំងនឹងរូបគាត់ទាំងនោះត្រូវបានចាត់ថ្នាក់ផ្សេងៗគ្នា ដូចជា របៀបនៃទំនួលខុសត្រូវ ឃាតកម្មក្នុងអំឡុងអាណត្តិរបស់លោក Duterte ជាអភិបាលក្រុង និងឃាតកម្មនៅក្រោមប្រតិបត្តិការបោសសម្អាត Barangay ក្នុងអំឡុងអាណត្តិរបស់លោកជាប្រធានាធិបតី។ បច្ចុប្បន្ន លោក Duterte ស្ថិតក្រោមការឃុំឃាំងរបស់ ICC នៅទីក្រុងឡាអេ ប្រទេសហូឡង់ ដើម្បីប្រឈមមុខនឹងការចោទប្រកាន់ជុំវិញសង្គ្រាមរបស់រដ្ឋបាលលោកលើគ្រឿងញៀន៕

ដោយ រ៉ាន់ រើយ