​អ៊ីស្រាអែល​វាយប្រហារ​សម្លាប់​មនុស្ស​៨៤នាក់​​​នៅហ្គាហ្សា​ ខណៈ​កិច្ច​ចរចា​បទ​ឈប់​បាញ់​​លើក​ទី​៣​កំពុង​​ធ្វើ​

យោងតាមការចេញផ្សាយរបស់សារព័ត៌មាន​​ Al Jazeera នៅថ្ងៃទី១៥ខែឧសភានេះ ការវាយប្រហាររបស់អ៊ីស្រាអែល​លើ​តំបន់ហ្គាហ្សាបានសម្លាប់មនុស្សយ៉ាងហោចណាស់ ៨៤នាក់ ខណៈកិច្ចចរចាបទឈប់បាញ់ដោយប្រយោលនៅតែបន្តក្នុងប្រទេសកាតានៅឡើយ។

សេចក្តី​រាយការណ៍ដែល​ដកស្រង់​ប្រភពសុខាភិបាល​តំបន់​ហ្គាហ្សា បានឱ្យដឹងថា យ៉ាងហោចណាស់មនុស្ស ៥០នាក់ត្រូវ​បានសម្លាប់នៅក្នុងការវាយប្រហាររបស់អ៊ីស្រាអែលទៅលើតំបន់ហ្គាហ្សាភាគខាងជើង រួមទាំង១០នាក់នៅក្នុងជំរំ​ជនភៀសខ្លួន Jabalia និងផ្សេងទៀតនៅក្នុងទីក្រុង Khan Younis ភាគខាងត្បូង ចាប់តាំងពីព្រឹកថ្ងៃពុធ។ ពាក់ព័ន្ធទៅ​នឹង​ការវាយប្រហារសម្លាប់មនុស្សជិត១០០នាក់នេះមិនមានការអត្ថាធិប្បាយភ្លាមៗពីយោធាអ៊ីស្រាអែល​នៅឡើយ​ទេ។

ការ​វាយ​ប្រហារនេះបានកើតឡើងស្របពេលដែលគណៈប្រតិភូអ៊ីស្រាអែលកំពុងនៅទីក្រុងដូហា ដើម្បីបន្តកិច្ចចរចា​បទ​ឈប់បាញ់ដោយប្រយោលជាមួយក្រុមហាម៉ាស់ តាមរយៈអ្នកសម្របសម្រួលកាតា អេហ្ស៊ីប និងសហរដ្ឋអាមេរិក មួយថ្ងៃបន្ទាប់ពីការដោះលែងអ្នកចាប់ជនជាតិអ៊ីស្រាអែល-អាមេរិកាំង Edan Alexander ។

បើនិយាយពីការចរចាបទឈប់បាញ់ កាលពីថ្ងៃពុធ បេសកជនមជ្ឈិមបូព៌ារបស់ប្រធានាធិបតី ដូណាល់​ ត្រាំ លោក Steve Witkoff បានប្រាប់ Al Jazeera ថា នឹងមានវឌ្ឃនភាពថ្មីនៅក្នុងកិច្ចចរចាបទឈប់បាញ់ ទាំងនៅក្នុងលក្ខខណ្ឌនៃបទឈប់បាញ់ និងការបន្តផ្តល់ជំនួយចូលទៅក្នុងតំបន់ហ្គាហ្សា។ លោកសង្ឃឹមថានឹងមានការប្រកាសវិជ្ជមានឆាប់ៗនេះ។

ទោះយ៉ាងណានាយករដ្ឋមន្ត្រីអ៊ីស្រាអែល លោក Benjamin Netanyahu បានអះអាងសារជាថ្មីកាលពីថ្ងៃអង្គារថា អ៊ីស្រាអែលនឹងមិនបញ្ចប់យុទ្ធនាការយោធារបស់ខ្លួននៅតំបន់ហ្គាហ្សាឡើយ បើទោះបីជាកិច្ចព្រមព្រៀងឈប់បាញ់ទទួលស្គាល់ក៏ដោយ។

គួរបញ្ជាក់ថាចាប់តាំងពីខែតុលាឆ្នាំ២០២៣ ការវាយប្រហាររបស់អ៊ីស្រាអែលលើតំបន់ហ្គាហ្សាបានសម្លាប់មនុស្សយ៉ាងហោចណាស់ ៥២,៩០៨ នាក់ នេះបើយោងតាមអាជ្ញាធរសុខាភិបាលហ្គាហ្សា។ ការវាយលុករបស់អ៊ីស្រាអែលបានបំផ្លិចបំផ្លាញតំបន់ហ្គាហ្សាស្ទើទាំងស្រុង និងបានបង្ខំប្រជាជនឲ្យផ្លាស់ទីលំនៅជាង៩០ ភាគរយនៃចំនួនប្រជាជន​ហ្គាហ្សា។

លើសពីនេះអ៊ីស្រាអែលបានហាមឃាត់រាល់អាហារ ទីជម្រក ថ្នាំពេទ្យ និងទំនិញផ្សេងទៀតមិនឱ្យចូលទឹកដីប៉ាឡេស្ទីនក្នុងរយៈពេល ១០សប្តាហ៍ចុងក្រោយនេះ ស្របពេលជាប្រទេសនេះនៅតែបន្តធ្វើការវាយប្រហារតាមអាកាស និងប្រតិបត្តិការជើងគោក។

ប្រជាជននៅតំបន់ហ្គាហ្សាប្រហែល ២.៣ លាននាក់ពឹងផ្អែកស្ទើរតែទាំងស្រុងលើជំនួយពីខាងក្រៅដើម្បីរស់រានមានជីវិត ពីព្រោះយុទ្ធនាការយោធារយៈពេល ១៩ ខែរបស់អ៊ីស្រាអែលបានធ្វើឲ្យពួកគេបាត់បង់សមត្ថភាពភាគច្រើនក្នុងការផលិតអាហារនៅក្នុងទឹកដី៕

អត្ថបទ៖ ប៊ុន សុភាព