អាមេរិក គ្រោង​ទាមទារ​ឲ្យ​សមាជិកណាតូទាំង​អស់​យល់ព្រម​ចំណាយ​៥%នៃGDP​លើ​វិស័យ​​ការពារ​ជាតិ

រដ្ឋមន្ត្រីការបរទេសអាមេរិក លោក Marco Rubio បានប្រកាសថា ប្រទេសសមាជិក​​អង្គការ​ណាតូទាំងអស់ត្រូវបានគេរំពឹងថានឹងប្តេជ្ញាចិត្តចំពោះគោលដៅចំណាយលើវិស័យការពារជាតិចំនួន ៥% នៃផលិតផលក្នុងស្រុកសរុប (GDP) របស់ពួកគេក្នុង​រយៈពេល​មួយ​ទសវត្សរ៍ខាង​មុខ។

ការ​រំពឹង​នេះ ត្រូវ​លោក Rubio អះអាង​ថា​នឹង​​ធ្វើ​ឡើង​ជាផ្លូវការនៅក្នុងកិច្ចប្រជុំកំពូលរបស់អង្គការណាតូ​នា​ថ្ងៃទី​២៤-២៥​ខែមិថុនានៅទីក្រុងឡាអេ ប្រទេសហូឡង់។

ប្រមុខ​ការទូត​កំពូល​អាមេរិក បានសង្កត់ធ្ងន់ថា គំនិតផ្តួចផ្តើមនេះមានគោលបំណងពង្រឹងសម្ព័ន្ធភាពចំពេលមានការវិវត្តនៃបញ្ហាប្រឈមផ្នែកសន្តិសុខពិភពលោក។ លោកបានកត់សម្គាល់ថា ប្រទេសភាគច្រើននៃអង្គការណាតូ ឥឡូវនេះកំពុងចំណាយ​យ៉ាងហោចណាស់២%​នៃ​GDPរបស់ពួកគេលើវិស័យការពារជាតិ ជា​គោលដៅអប្បបរមាដែលអង្គការណាតូបានកំណត់សម្រាប់សមាជិករបស់ខ្លួន ខណៈ​ប្រទេស​មួយចំនួន​បានទៅហួសពីនោះ ដោយចំណាយ​ច្រើនជាង៤%នៃ GDPលើតម្រូវការយោធា និងការពារជាតិ។

អាល្លឺម៉ង់ ​បាន​បង្ហាញ​ការ​គាំទ្រ​ចំពោះ​ការ​បង្កើន​គោលដៅ​នៃ​ការ​ចំណាយ​នេះ។ រដ្ឋមន្ត្រីការបរទេសអាល្លឺម៉ង់ លោក Johann Wadephul បានបញ្ជាក់ថា អាល្លឺម៉ង់សម្រេចបាននូវកម្រិតចំណាយ​ការ​ការពារ២%នៃGDP ក្នុង​ឆ្នាំ​២០២៤ និងគាំទ្រដល់គោលដៅ៥%ថ្មី។ អធិការបតី​អាល្លឺម៉ង់ លោក Friedrich Merz បានផ្តួចផ្តើមធ្វើវិសោធនកម្មរដ្ឋធម្មនុញ្ញ ដើម្បីជួយសម្រួលដល់​គម្រោង​បង្កើន​ការ​​ចំណាយ​​នេះ រួមទាំងការបង្កើតមូលនិធិ ៥០០​ពាន់លានអឺរ៉ូសម្រាប់ទំនើបកម្មហេដ្ឋារចនាសម្ព័ន្ធ។

ចំណែក​ឯ​អគ្គលេខាធិការអង្គការណាតូ លោក Mark Rutte បានស្នើវិធីសាស្រ្តជាដំណាក់កាលទៅកាន់គោលដៅ ៥% ដោយ​ការ​បែងចែក៣,៥%នៃGDPសម្រាប់ការចំណាយលើវិស័យការពារជាតិដោយផ្ទាល់ និង១,៥%ចំពោះហេដ្ឋារចនាសម្ព័ន្ធដែលពាក់ព័ន្ធ និងការពង្រឹងសន្តិសុខតាមអ៊ីនធឺណិត៕

ដោយ៖ ឈាង