តើរបាំគ្រវីសក់ ដែលអារ៉ាប់រួម ស្វាគមន៍ លោកត្រាំ ជារបាំអ្វី

ប្រធានាធិបតីអាមេរិក ដូណាល់ ត្រាំ បានទៅដល់ប្រទេសអារ៉ាប់រួម កាលពីថ្ងៃព្រហស្បតិ៍ទី១៥ខែឧសភា ជាផ្នែកមួយនៃដំណើរទស្សនកិច្ចតំបន់មជ្ឈិមបូព៌ា ហើយនៅពេលទៅដល់រាជធានី អាប៊ូដាប៊ី, ម្ចាស់ផ្ទះបានទទួលប្រមុខសេតវិមានយ៉ាងកក់ក្តៅជាមួយនឹងរបាំគ្រវីសក់បែបប្រពៃណី ដ៏គួរឲ្យចាប់អារម្មណ៍។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

របាំនេះមានឈ្មោះ Al-Ayyala ជាប្រពៃណីវប្បធម៌អារ៉ាប់ សម្តែងជាទម្រង់សិល្បៈដែលមានប្រជាប្រិយបំផុតនៅអារ៉ាប់រួម ព្រមទាំងនៅភាគពាយព្យប្រទេសអូម៉ង់ផងដែរ ហើយរបាំនេះ​ ត្រូវបានដាក់បញ្ចូលក្នុងបញ្ជីបេតិកភណ្ឌវប្បធម៌អរូបីនៃមនុស្សជាតិ របស់អង្គការយូណេស្កូក្នុងឆ្នាំ២០១៤។

របាំ Al-Ayyala បូករួមទាំងការសូត្រកំណាព្យ វាយស្គរ និងគ្រវីសក់ ដើម្បីញ៉ាំងបរិយាកាស លើកទឹកចិត្តដល់អ្នកចម្បាំងដែលនឹងទៅប្រយុទ្ធនៅសមរភូមិ។

ជា​ធម្មតា មានបុរស​ប្រហែល២០​នាក់​ឈរ​ជា​ពីរ​ជួរ​ទល់មុខ​គ្នា ដោយ​កាន់​ដំបង​ឫស្សី​តំណាង​ឲ្យ​លំពែង ឬ​ដាវ។ ចំណែកនៅកណ្តាល មានតន្រ្តីករគោះស្គរធំ ស្គរតូចនិងគង។ អ្នកសំដែងផ្សេងទៀតដើរជុំវិញ កាន់ដាវ ឬកាំភ្លើង ហើយជួនកាលបោះអាវុធឡើងខ្ពស់ រួចក៏ចាប់វិញ។

យ៉ាងណា នៅប្រទេសអារ៉ាប់រួម របាំនេះមានការផ្លាស់ប្តូរខ្លះ ពោលគឺក្មេង​ស្រី​ត្រូវស្លៀក​ពាក់​បែប​បុរាណ​ឈរ​ជួរ​មុខ គ្រវី​សក់ចំណែក​បុរស​កាន់​ដាវនិង​ស្គរ​ឈរ​ពី​ក្រោយវិញ។

គេតែងយករបាំ Al-Ayyala ទៅសម្តែងក្នុងពិធីមង្គលការនិងពិធីបុណ្យនានា។ សិល្បៈនេះ មានលក្ខណៈជាសកល ដោយមិនគិតពីអាយុ ភេទ និងវណ្ណៈសង្គមអ្វីឡើយ៕

អត្ថបទ៖ សុខ សុវណ្ណ

ចុចអាន៖ តើឥណ្ឌូណេស៊ី យករបាំអ្វីស្វាគមន៍ថ្នាក់ដឹកនាំ មកចូលរួមកិច្ចប្រជុំកំពូលអាស៊ាន ?