ព័ត៌មានអន្ដរជាតិ

អាជ្ញាធរចិនប្រកាសអាសន្នគ្រោះមហន្តរាយ ក្រោយភ្លៀងធ្លាក់ខ្លាំងឆក់យកជីវិតមនុស្ស៥នាក់

បានផុស

១ year មុន

នៅ

ថ្ងៃចន្ទ ១៩ ឧសភា ២០២៥

ដោយ

Chheang

ភ្លៀងធ្លាក់ខ្លាំងកាលពីចុងសប្តាហ៍(១៨-១៩ឧសភា) បានបណ្តាលឲ្យមនុស្សយ៉ាងតិច៥នាក់ស្លាប់នៅក្នុងខេត្តក្វាងទុង និងក្វាងស៊ី ភាគខាងត្បូងប្រទេសចិន និងអ្នកផ្សេងទៀតជាច្រើននាក់បានបាត់ខ្លួន។ ជាការឆ្លើយតប អាជ្ញាធរបានចេញសេចក្តីជូនដំណឹងអំពីគ្រោះមហន្តរាយនៅទូទាំងតំបន់ជាច្រើន ដោយព្រមានអំពីភ្លៀងធ្លាក់ខ្លាំង ទឹកជំនន់ភ្នំ និងគ្រោះថ្នាក់ភូមិសាស្ត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មជ្ឈមណ្ឌលឧតុនិយមជាតិ បានចេញការប្រកាសអាសន្នកម្រិតពណ៌លឿង ដែលជាកម្រិតខ្ពស់បំផុតទីបីក្នុងប្រព័ន្ធព្រមានចំនួនបួនកម្រិតរបស់ចិន សម្រាប់ផ្នែកខ្លះនៃខេត្ត Zhejiang, Fujian, ក្វាងទុង និងក្វាងស៊ី។ ការជូនដំណឹងទាំងនេះបង្ហាញពីហានិភ័យខ្ពស់នៃទឹកជំនន់ភ្នំ និងបំណាក់ដី។

ទិន្នន័យឧតុនិយមបង្ហាញថា ឆ្នាំ២០២៤គឺជាឆ្នាំដែលក្តៅបំផុតរបស់ចិនក្នុងរយៈពេលជាង៦ទសវត្សរ៍កន្លងមក និងជាឆ្នាំទីពីរជាប់គ្នាដែលជាឆ្នាំក្ដៅបំផុតរបស់មហាយក្សអាស៊ីមួយនេះ។ និន្នាការឡើងកម្ដៅនេះជាទូទៅត្រូវបានអមមកជាមួយខ្យល់ព្យុះ និងការធ្លាក់ភ្លៀងកាន់តែខ្លាំងជាងមុន ដែលនាំឲ្យមានការប្រើប្រាស់ថាមពលកើនឡើង និងភាពងាយរងគ្រោះដោយគ្រោះធម្មជាតិធ្ងន់ធ្ងរជាងមុន។

ទូរទស្សន៍រដ្ឋ CCTV បានរាយការណ៍ថា ភ្លៀងធ្លាក់ខ្លាំងត្រូវបានគេរំពឹងថានឹងបន្តពីថ្ងៃចន្ទដល់ថ្ងៃអង្គារសប្ដាហ៍នេះនៅក្នុងតំបន់ជាច្រើន រួមទាំងភាគខាងលិចនៃតំបន់ Xinjiang តាមបណ្តោយភ្នំ Tianshan។

អាជ្ញាធរកំពុងតាមដានស្ថានការណ៍យ៉ាងដិតដល់ ហើយបានដាស់តឿនប្រជាពលរដ្ឋនៅតំបន់រងគ្រោះឲ្យមានការប្រុងប្រយ័ត្ន និងប្រកាន់ខ្ជាប់នូវការណែនាំសុវត្ថិភាព។ ក្រុមសង្គ្រោះបន្ទាន់ត្រូវបានដាក់ពង្រាយដើម្បីជួយជម្លៀស និងផ្តល់ជំនួយដល់អ្នកដែលរងផលប៉ះពាល់ដោយលក្ខខណ្ឌអាកាសធាតុធ្ងន់ធ្ងរ៕

ដោយ៖ ឈាង