បុគ្គលិក​ស្ថានទូត​អ៊ីស្រាអែល​២​នាក់​ ត្រូវ​បាន​បាញ់សម្លាប់​​នៅអាមេរិក ខណៈជនសង្ស័យស្រែក​ដោះលែង​ប៉ាឡេស្ទីន​

យោងតាមការចេញផ្សាយរបស់សារព័ត៌មាន​ BBC នៅថ្ងៃទី២២ខែ​ឧសភានេះ បុគ្គលិកស្ថានទូតអ៊ីស្រាអែល២​នាក់ ដែល​ជាគូស្នេហ៍វ័យក្មេងត្រូវ​បានបាញ់សម្លាប់នៅខាងក្រៅសារមន្ទីរ Capital Jewish ក្នុងទីក្រុង Washington DC សហរដ្ឋអាមេរិក។

ជនសង្ស័យដែលត្រូវបានគេកំណត់អត្តសញ្ញាណ មានឈ្មោះ​ Elias Rodriguez អាយុ ៣០ ឆ្នាំមកពីទីក្រុង Chicago ដែលបានស្រែកថា «ដោះលែងប៉ាឡេស្ទីនឲ្យមានសេរីភាព» បន្ទាប់ពីការវាយប្រហារ។ ក្រោយមកត្រូវបានប៉ូលិស​ចាប់ខ្លួន។ យោងតាមឯកអគ្គរដ្ឋទូតអ៊ីស្រាអែលលោក Yechiel Leiter បាននិយាយថា គូស្នេហ៍ទាំងពីរទើបតែបានចាកចេញពីកម្មវិធីការទូតមួយ ហើយកំពុងរៀបចំផែនការធ្វើដំណើរទៅទីក្រុងហ្សេរុយសាឡឹម ប្រទេសអ៊ីស្រាអែល។

ឧបទ្ទវហេតុនេះបានកើតឡើងនៅម៉ោង ៩ និង ០៥នាទីយប់(ម៉ោងក្នុងស្រុក) នៅក្នុងតំបន់សន្តិសុខតឹងរឹងក្បែរអគាររដ្ឋាភិបាល។ ប៉ូលិស​បាន​បញ្ជាក់​ថា Rodriguez មិន​មាន​ប្រវត្តិ​ឧក្រិដ្ឋកម្ម​ពី​មុនទេ ហើយ​ក៏​មិន​មាន​ទំនាក់ទំនង​ជាមួយ​ក្រុម​ជ្រុលនិយម​ដែរ។

ក្រុមមន្ត្រីបានថ្កោលទោសយ៉ាងខ្លាំងចំពោះការវាយប្រហារនេះ។ ប្រធានាធិបតី​សហរដ្ឋ​អាមេរិកលោក Donald Trump បាន​ហៅ​​ទង្វើ​នៃអំពើ​ហិង្សានេះថា​ប្រឆាំងនឹង​សាសនា ខណៈ​រដ្ឋមន្ត្រី​ការ​បរទេសលោក Marco Rubio បាន​សន្យា​រក​យុត្តិធម៌ឲ្យជនរងគ្រោះ។ អ្នកការទូតអ៊ីស្រាអែល រួមទាំងឯកអគ្គរដ្ឋទូតអង្គការសហប្រជាជាតិលោក Danny Danon បានចាត់ទុកការបាញ់ប្រហារនេះថាជាសកម្មភាពនៃ «អំពើភេរវកម្មនិយមប្រឆាំងជនជាតិយូដា» ដោយជំរុញឱ្យសហរដ្ឋអាមេរិកធ្វើសកម្មភាពរឹតបន្តឹងសន្តិសុខ។

មន្ត្រីអាមេរិក និងអ៊ីស្រាអែលបានប្តេជ្ញាធ្វើការស៊ើបអង្កេតឱ្យបានហ្មត់ចត់ និងបង្កើនការការពារសម្រាប់សហគមន៍ជនជាតិជ្វីហ្វ និងបុគ្គលិកការទូតទូទាំងប្រទេស។ ការវាយប្រហារនេះបានបង្ហាញពីការព្រួយបារម្ភកាន់តែខ្លាំងឡើងលើអំពើហិង្សាដែលជំរុញដោយមនោគមវិជ្ជា និងនយោបាយនៅក្នុងសហរដ្ឋអាមេរិក ចំពេលមានភាពតានតឹងសកលកើនឡើង៕

អត្ថបទ៖ ប៊ុន សុភាព