ព័ត៌មានអន្ដរជាតិ

Lavrov៖ រុស្ស៊ីមិនអាចបំពេញកាតព្វកិច្ចការពារអាមេនីទាន់ពេល ដោយសារជាប់ប្រយុទ្ធប្រឆាំងអឺរ៉ុបនៅអ៊ុយក្រែន

បានផុស

១ ខែ មុន

នៅ

ថ្ងៃព្រហស្បតិ៍ ២២ ឧសភា ២០២៥

ដោយ

ក្នុងដំណើរទស្សនកិច្ចទៅកាន់ប្រទេសអាមេនីដែលជាសម្ព័ន្ធមិត្តល្អក់កករនឹងគ្នានៅថ្ងៃទី២០និង២១ខែឧសភា រដ្ឋមន្ត្រីការបរទេសរុស្ស៊ី លោក Sergey Lavrov បានទទួលស្គាល់ជាលើកដំបូង ថា ការបំពេញតួនាទីរបស់ខ្លួនមិនបានពេញលេញក្នុងការការពារអាមេនីក្នុងនាមជាអ្នកថែរក្សាសន្តិភាពនៅតំបន់ជម្លោះ Nagorno-Karabakh ជាមួយប្រទេសអាស៊ែបៃហ្សង់ ដោយសារតែខ្លួនជាប់ដៃក្នុងសង្គ្រាមប្រឆាំងតំបន់អឺរ៉ុបនៅប្រទេសអ៊ុយក្រែន។

រដ្ឋមន្ត្រីការបរទេសរុស្ស៊ី លោក Sergey Lavrov ចាប់ដៃជាមួយនាយករដ្ឋមន្ត្រី អាមេនី លោក Nikol Pashinyan។ ក្រសួងបរទេសរុស្ស៊ី

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងដំណើរទស្សនកិច្ចដើម្បីស្វែងស្វែងរកការផ្សះផ្សារជាមួយសម្ព័ន្ធមិត្តនៅតំបន់កូកាសខាងត្បុង និងក្រោយជំនួបដ៏តានតឹងនៅទីក្រុងយេរេវ៉ាន (Yerevan) ប្រទេសអាមេនី រដ្ឋមន្ត្រីការបរទេសរុស្ស៊ី បានរំឭកឡើងវិញនូវទំនាក់ទំនងដ៏យូរអង្វែងរវាងប្រទេសទាំងពីរ ប៉ុន្តែការឆកល្វែងមិនបានជួយប្រទេសអាមេនីក្នុងការការពារដែនដី Nagorno-Karabakh ដែលជាតំបន់ផ្តាច់ខ្លួនពីប្រតិបត្តិការកាន់កាប់របស់កងទ័ពអាស៊ែបៃហ្សង់ គឺដោយសារតែខ្លួន ជាប់ប្រយុទ្ធប្រឆាំងអឺរ៉ុបទាំងអស់។

តាមការបង្ហោះនៅលើបណ្តាញសង្គមរបស់ក្រសួងការបរទេសរុស្ស៊ី រដ្ឋមន្ត្រីការបរទេសរុស្ស៊ី លោក Sergey Lavrov បានលើកឡើងថា៖«យើងមានស្ថានភាពមួយ ដូចដែលដឹងនៅពេលនេះ ដែលយើងត្រូវបានគេបង្ខ ម្តងហើយម្តងទៀតក្នុងប្រវត្តិសាស្ត្រ ដើម្បីប្រយុទ្ធប្រឆាំងនឹងអឺរ៉ុបទាំងអស់ ដែលជាថ្មីម្តងទៀត ក្រោមពាក្យស្លោករបស់ណាស៊ី ដែលដាក់របប លោក Zelensky នៅខាងមុខ ប្រយុទ្ធប្រឆាំងនឹងរុស្ស៊ី។ ប្រទេសអឺរ៉ុបស្ទើរតែទាំងអស់។ ដូចអ្នកយល់ហើយ ក្នុងស្ថានភាពនេះ មានសព្វាវុធច្រើនចូលមកដល់អ៊ុយក្រែន។ វាទំនើប វាទាមទារការឆ្លើយតបរបស់យើង»។

រដ្ឋមន្ត្រីការបរទេសរុស្ស៊ី Sergey Lavrov។ ក្រសួងការបរទេសរុស្ស៊ី

លោក បានបន្ថែមថា៖«ខ្ញុំប្រាកដក្នុងចិត្តថា មិត្តអាមេនីរបស់យើង យល់ថា ក្នុងស្ថានភាពទាំងនេះ យើងមិនអាចបំពេញកាតព្វកិច្ចទាំងអស់របស់យើងទាន់ពេលនោះទេ។ ប៉ុន្តែសូម្បីតែនៅក្នុងស្ថានភាពនេះប្រព័ន្ធមួយចំនួនដែលព្រាងដោយមិត្តភក្តិអាមេនីត្រូវបានបញ្ជូនមក។ យើងនឹងបន្តការអនុវត្តបែបនេះ»។

តំបន់ផ្តាច់ខ្លួន ការ៉ាបាខ (Karabakh) ដែលស្ថិតនៅក្រោមដែនដីទទួលស្គាល់ជាអន្តរជាតិរបស់អាស៊ែបៃហ្សង់ ដែលប្រជាជនអាមេនីប្រមាណ១២ម៉ឺននាក់រស់នៅ បានបង្កើតចលនាទាមទារការផ្តាច់ខ្លួនពីប្រទេសអាស៊ែបៃហ្សង់ជាច្រើនទសវត្សរ៍ ហើយរដ្ឋាភិបាលអាមេនីដែលជាសម្ព័ន្ធមិត្តរុស្ស៊ីដ៏ល្អូកល្អើន បានពឹងផ្អែកលើប្រទេសរុស្ស៊ីដាក់កងរក្សាសន្តិភាពនៅទីនោះ។

ប៉ុន្តែ ក្នុងពេលដែលមេដឹកនាំអង្គការសហប្រជាជាតិប្រជុំនៅទីក្រុងញូយ៉ក នៅថ្ងៃទី២០ខែកញ្ញា ឆ្នាំ២០២៣ យោធាអាស៊ែបៃហ្សង់ បានធ្វើប្រតិបត្តិសឹកវាយកាន់កាប់តំបន់នោះតែម្តង ហើយ ភាគីរុស្ស៊ីដែលជាកងរក្សាសន្តិភាពមិនបានជួយអ្វីនោះទេ៕

ដោយ រ៉ាន់ រើយ