ពលរដ្ឋ​ឡាវ​៧​នាក់ស្លាប់​ និង៣២​នាក់​ធ្លាក់ខ្លួនឈឺ​ព្រោះ​​​ពុលផ្សិតព្រៃ​

យោងតាមសេចក្តីរាយការណ៍ដោយដកស្រង់ពីការចុះផ្សាយរបស់សារព័ត៌មានក្នុងស្រុករបស់ប្រទេសឡាវ បានរាយការណ៍នៅថ្ងៃទី២១ខែឧសភាថា អាជ្ញាធរសុខាភិបាល ខេត្ត​សាយ៉ាប៊ូរីភាគខាងជើងនៃប្រទេសឡាវ បានចេញសេចក្តីព្រមានជាបន្ទាន់មួយដល់ប្រជាជនឡាវអំពីករណីផ្សិតព្រៃដែលមានជាតិពុល បន្ទាប់ពីមានមនុស្សស្លាប់ចំនួន៧នាក់​ និង​ធ្លាក់​ខ្លួន​ឈឺ​​រាប់សិបនាក់​ទៀត ដោយសារការទទួល​ទាន​ផ្សិតដែលមានជាតិពុល និងបានអំពាវនាវឱ្យប្រជាជនមានការប្រុងប្រយ័ត្នក្នុងការទទួលទានផ្សិតព្រៃ ដើម្បីការពារកុំឱ្យមានការស្លាប់បាត់បង់ជីវិតបន្ថែមទៀត។

សេចក្តីព្រមាននេះ ត្រូវបានមន្ទីរ​សុខាភិបាល​ខេត្ត​សាយ៉ាប៊ូរីធ្វើឡើង​កាល​ពី​ថ្ងៃ​ទី​១៦ ខែ​ឧសភា ដោយ​បញ្ជាក់​ថា ផ្សិតមានជាតិពុល​បាន​សម្លាប់ប្រជាពលរដ្ឋចំនួន៧​នាក់ និង៣២​នាក់​ផ្សេង​ទៀតកំពុងឈឺរាគព្យាបាលនៅមន្ទីរពេទ្យខេត្ត​សាយ៉ាប៊ូរី។

សេចក្តីរាយការណ៍បានបន្តថា ពាក់ព័ន្ធករណីផ្សិតព្រៃមានជាតិពុលនេះ អាជ្ញាធរមូលដ្ឋានបាននិងកំពុងធ្វើការជាមួយមន្ត្រីសុខាភិបាលដើម្បីតាមដាននិងធ្វើការផ្សព្វផ្សាយការយល់ដឹងអំពីហានិភ័យពីការទទួលទានផ្សិតព្រៃផងដែរ៕

ដោយភ្នាក់ងារ​