ព័ត៌មានអន្ដរជាតិ

ថៃរាយការណ៍ករណីឆ្លងកូវីដថ្មីជាង៣ម៉ឺនករណីក្នុងរយៈពេលត្រឹម៥ថ្ងៃ

បានផុស

១ year មុន

នៅ

ថ្ងៃសុក្រ ២៣ ឧសភា ២០២៥

ដោយ

យោងតាមការចេញផ្សាយរបស់សារព័ត៌មាន The Nation នៅថ្ងៃទី២៣ខែឧសភានេះ ប្រទេសថៃកំពុងប្រឈមមុខនឹងការកើនឡើងគួរឱ្យកត់សម្គាល់នៃករណីឆ្លងកូវីដ១៩ជាមួយនឹងការឆ្លងថ្មីជាង៣៣,០០០ករណីក្នុងរយៈពេលត្រឹមតែ ៥ថ្ងៃប៉ុណ្ណោះ ដែលធ្វើឱ្យមានការព្រួយបារម្ភអំពីការផ្ទុះឡើងទ្រង់ទ្រាយធំជាថ្មីទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើយោងតាម លោកវេជ្ជបណ្ឌិត Thira Woratanarat អ្នកជំនាញសុខភាពសាធារណៈ និងជាសាស្ត្រាចារ្យនៅមហាវិទ្យាល័យវេជ្ជសាស្ត្រនៃសាកលវិទ្យាល័យ Chulalongkorn របស់ប្រទេសថៃ ចាប់ពីថ្ងៃទី១៨ ដល់ថ្ងៃទី ២៤ ខែឧសភា មនុស្សសរុបចំនួន ៣៣,៥៨៩ នាក់ បានឆ្លងកូវីដ១៩ ក្នុងនោះមានអ្នកស្លាប់ចំនួន៣នាក់។

នៅក្នុងការបង្ហោះតាមបណ្តាញសង្គម Facebook របស់ លោកវេជ្ជបណ្ឌិត Thira បានពិពណ៌នាអំពីការកើនឡើងនៃការឆ្លងនាពេលបច្ចុប្បន្នថា ជា «សញ្ញាដំបូង» នៃរលកធំជាងមុន ដោយព្រមានថា ប្រសិនបើការឆ្លងនៅតែបន្តកើនឡើងដូចសប្ដាហ៍មុន ចំនួនករណីឆ្លងអាចបន្តកើនឡើងយ៉ាងឆាប់រហ័ស។

(រូបភាព៖ The Nation) លោកវេជ្ជបណ្ឌិត Thira Woratanarat

លោកបានគូសបញ្ជាក់ថា ចំនួនពិតប្រាកដនៃការឆ្លងអាចខ្ពស់ជាងរបាយការណ៍ផ្លូវការដែលបានបង្ហាញ ដោយសារតែការរាយការណ៍តិចតួច និងការពន្យារពេលក្នុងការប្រមូលទិន្នន័យ។ លើសពីនេះមនុស្សជាច្រើនដែលឆ្លងមេរោគនេះ មិនបានស្វែងរកការព្យាបាលនៅមន្ទីរពេទ្យទេ ដែលមានន័យថា តួលេខដែលបានរាយការណ៍គ្រាន់តែផ្នែកមួយនៃករណីពិតប្រាកដប៉ុណ្ណោះ។

លោកបានជំរុញឲ្យសាធារណជនបន្តការប្រុងប្រយ័ត្ន អនុវត្តអនាម័យឲ្យបានល្អ ពាក់ម៉ាស់នៅកន្លែងមានមនុស្សកកកុញ និងតាមដានព័ត៌មានតាមប្រភពដែលគួរឲ្យទុកចិត្ត។

ទោះយ៉ាងណារហូតមកដល់ពេលនេះ នាយកដ្ឋានគ្រប់គ្រងជំងឺថៃមិនទាន់បានចេញសេចក្តីណែនាំអំពីសុខភាពសាធារណៈថ្មីនៅឡើយទេ ប៉ុន្តែអ្នកជំនាញដូចជាលោកវេជ្ជបណ្ឌិត Thira កំពុងអំពាវនាវឱ្យមានការបង្កើនការយល់ដឹង និងវិធានការប្រុងប្រយ័ត្នដើម្បីការពារការកើតឡើងវិញនៃការឆ្លងទ្រង់ទ្រាយធំ។ មកដល់ពេលនេះស្ថានភាពកូវីដនៅប្រទេសថៃតែស្ថិតក្រោមការឃ្លាំមើលយ៉ាងដិតដល់៕