យូនីសេហ្វ ព្រមានថា​កុមារ​​មីយ៉ាន់​ម៉ា​រាប់​លាន​នាក់មាន​​ហានិភ័យ​ធ្ងន់ធ្ងរ បន្ទាប់​ពី​រញ្ជួយ​ដី​

កន្លងទៅ​២​ខែ បន្ទាប់ពីការរញ្ជួយដីដ៏បំផ្លិចបំផ្លាញបានវាយប្រហារប្រទេសមីយ៉ាន់ម៉ា អង្គការយូនីសេហ្វកំពុងជំរុញឱ្យមានការឆ្លើយតបជាបន្ទាន់ និងមាននិរន្តរភាពជាអន្តរជាតិដើម្បីជួយមនុស្សជាង ៦លាននាក់ដែលត្រូវការជំនួយសង្គ្រោះជីវិតដោយ​អស់​សង្ឃឹម រួមទាំងកុមារ ២លាននាក់។ នេះបើយោងតាមការចេញផ្សាយរបស់ទូរស្សន៍ជាតិជប៉ុនកាលពីថ្ងៃ​ទី​២៩​ខែ​ឧសភា។

បន្ទាប់ពីរងគ្រោះរញ្ជួយដីដ៏ធ្ងន់ធ្ងរដែលមានអ្នកស្លាប់រាប់ពាន់នាក់ និងបាត់បង់ផ្ទះសម្បែង ធ្វើឲ្យប្រជាជននៅតែរស់នៅក្នុងតង់ និងជម្រកបណ្តោះអាសន្នរហូតមកដល់ពេលនេះ ខណៈកុមារក៏កំពុងប្រឈមហានិភ័យក្រោយឆ្លងកាត់គ្រោះមហន្តរាយនេះ។

កុមារកំព្រា និង​ជនភៀសខ្លួនកំពុងត្រូវបានមើលថែនៅក្នុង​ទីវត្តអារាម ប៉ុន្តែវិបត្តិដែលកំពុងកើតមានកំពុងធ្វើឱ្យប៉ះពាល់ធ្ងន់ធ្ងរដល់សុខភាពផ្លូវចិត្តរបស់ពួកគេ។ ​អង្គការ​យូនីសេហ្វ បាន​ព្រមានពីហានិភ័យរីករាលដាលនៃជំងឺធ្លាក់ទឹកចិត្ត និងជំងឺស្ត្រេស ​ក្រោយការប៉ះទង្គិចផ្លូវចិត្ត (PTSD) ក្នុងចំណោមយុវជនដែលងាយរងគ្រោះទាំងនេះ។

លោក Trevor Clark ប្រធានផ្នែកសង្គ្រោះបន្ទាន់ប្រចាំតំបន់របស់ យូនីសេហ្វ បានលើកឡើងពីបញ្ហាប្រឈម ស្រប​ពេលដែល​កុមារជាច្រើនដែលត្រូវការជំនួយសុខភាពផ្លូវចិត្ត ប៉ុន្តែ​អង្គការ​នេះ​ក៏បានសង្កត់ធ្ងន់លើការផ្តល់អាទិភាពដល់ជំនួយសម្រាប់អ្នកងាយរងគ្រោះបំផុត។

យូនីសេហ្វបានអំពាវនាវដល់សហគមន៍ពិភពលោកឱ្យផ្តល់ការគាំទ្ររយៈពេលវែង ខណៈពេលដែលវិបត្តិមនុស្សធម៌របស់មីយ៉ាន់ម៉ា នៅតែបន្ត​​​ប្រឈម​យ៉ាងខ្លាំង​ ដោយបញ្ជាក់ពីភាពបន្ទាន់នៃការដោះស្រាយទាំងតម្រូវការរស់រានមានជីវិតភ្លាមៗ និងផលប៉ះពាល់ផ្លូវចិត្តយូរអង្វែងលើកុមារ៕

អត្ថបទ៖ ប៊ុន សុភាព