ព័ត៌មានអន្ដរជាតិ

មេដឹកនាំ២៣ប្រទេសគាំទ្របង្កើតសន្ធិសញ្ញាជំងឺឆ្លងបង្ការភាពអាសន្នអនាគត

បានផុស

៥ years មុន

នៅ

ថ្ងៃអង្គារ ៣០ មីនា ២០២១

ដោយ

មេដឹកនាំប្រទេសចំនួន២៣ និងអង្គការសុខភាពពិភពលោក (WHO) នៅថ្ងៃអង្គារនេះបានគាំទ្រគំនិតមួយដើម្បីបង្កើតសន្ធិសញ្ញាអន្តរជាតិដែលនឹងជួយពិភពលោកឲ្យដោះស្រាយបញ្ហាសុខភាពបន្ទាន់ពេលអនាគតដូចជាជំងឺឆ្លងកូវីដ-១៩ជាដើមដែលកំពុងវាយប្រហារពិភពលោក។

គំនិតនៃសន្ធិសញ្ញាដែលនឹងធានានូវការទទួលបានប្រកបដោយស្មើភាព និងជាសកលចំពោះវ៉ាក់សាំង ឱសថ និងរោគវិនិច្ឆ័យសម្រាប់ជំងឺឆ្លងត្រូវបានលើកឡើងដោយប្រធានថ្នាក់ដឹកនាំសហភាពអឺរ៉ុបលោក Charles Michel ក្នុងកិច្ចប្រជុំកំពូល G20 កាលពីខែវិច្ឆិកា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃអង្គារនេះ គំនិតផ្តួចផ្តើមនោះទទួលបានការគាំទ្រពីមេដឹកនាំនៃបណ្តាលប្រទេសហ្វីជី ពរទុយហ្គាល់ រ៉ូម៉ានី អង់គ្លេស រវ៉ាន់ដា កេនយ៉ា បារាំង អាល្លឺម៉ង់ ក្រិក កូរ៉េ ឈីលី កូស្តារីកា អាល់បានី អាហ្វ្រិកខាងត្បូង ទ្រីនីដាដនិងតួបាហ្គោ ហូឡង់ ទុយនីស៊ី សេណេហ្គាល់ អេស្ប៉ាញ ន័រវែស ស៊ែប ឥណ្ឌូណេស៊ី អ៊ុយក្រែន និងអង្គការសុខភាពពិភពលោក។

មេដឹកនាំបានសរសេរនៅក្នុងអត្ថបទរួមមួយនៅក្នុងកាសែតធំៗថា ៖«នឹងមានរោគឆ្លង និងបញ្ហាសុខភាពអាសន្នធំៗផ្សេងទៀត។ គ្មានរដ្ឋាភិបាល ឬទីភ្នាក់ងារពហុភាគីណាមួយអាចដោះស្រាយការគំរាមកំហែងបែបនេះម្នាក់ឯងបានឡើយ»។

ពួកគេនិយាយថា ៖«យើងជឿថា ប្រទេសទាំងឡាយគួរធ្វើការរួមគ្នាឆ្ពោះទៅសន្ធិសញ្ញាអន្តរជាតិថ្មីមួយសម្រាប់ការត្រៀម និងឆ្លើយតបជំងឺឆ្លង»។

គោលបំណងសំខាន់នៃសន្ធិសសញ្ញាបែបនេះគឺដើម្បីពង្រឹងភាពធន់របស់ពិភពលោកចំពោះជំងឺឆ្លងនាពេលអនាគតតាមរយៈប្រព័ន្ធប្រុងប្រយ័ត្នប្រសើជាងមុន ការចែករំលែកទិន្នន័យ ការស្រាវជ្រាវ ការផលិត ការចែកចាយវ៉ាក់សាំង ឱសថ រោគវិនិច្ឆ័យ និងឧបករណ៍ការពារខ្លួន។

សន្ធិសញ្ញានេះក៏បានបញ្ជាក់ដែរថា សុខភាពមនុស្សជាតិ សត្វ និងភពផែនដីគឺមានទំនាក់ទំនងគ្នាទាំងអស់ ហើយគួរឆ្ពោះទៅរកការទទួលខុសត្រូវរួមគ្នា តម្លាភាព និងកិច្ចសហប្រតិបត្តិការជាសកល។

មេដឹកនាំបានសរសេរថា ៖«ជឿជាក់ថា វាគឺជាការទទួលខុសត្រូវរបស់យើង ក្នុងនាមជាមេដឹកនាំប្រទេស និងស្ថាប័នអន្តរជាតិ ដើម្បីធានាបានថា ពិភពលោកបានរៀនពីមេរៀននៃជំងឺកូវីដ-១៩»៕

ប្រែសម្រួល៖ វីរបុត្រ
ប្រភព៖ USNews

Related Topics:កូវីដ-១៩