ប៉ូលិសថៃ ចាប់ខ្លួនស្រ្តីម្នាក់ ដែលបង្ហោះព័ត៌មានក្លែងក្លាយ អំពីបញ្ហាព្រំដែន កម្ពុជា-ថៃ

ប៉ូលិសខេត្ត Ubon Ratchathani នៃប្រទេសថៃ បានចាប់ខ្លួនស្រ្តីម្នាក់ ដែលបង្ហោះ Facebook និយា​យព័ត៌មានមិនពិតអំពីបញ្ហាព្រំដែនកម្ពុជា-ថៃ បង្កឲ្យមានការភ័យឆោឡោនៅក្នុងប្រទេសថៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Thai PBS នៅថ្ងៃអង្គារទី១០ខែមិថុនាឆ្នាំ២០២៥, ស្រ្តីវ័យ៣២ឆ្នាំរូបនេះ បានប្រើ Facebook ឈ្មោះ Lucky Farm បង្ហោះព័ត៌មានក្លែងក្លាយជាច្រើនដូចជាការផ្ទុះនៅតាមព្រំដែន មានមនុស្សស្លាប់ច្រើននាក់និងបញ្ជាជម្លៀសជាដើម ធ្វើឲ្យពលរដ្ឋស្លន់ស្លោ។

ក្រុមអ្នកស៊ើបអង្កេតមកពីនាយកដ្ឋានបង្ក្រាបឧក្រិដ្ឋកម្មបច្ចេកវិទ្យា (TCSD) បានតាមដាននាងដល់ផ្ទះមួយនៅឃុំ Kut Lat នៃស្រុកមឿង ខេត្ត Ubon Ratchathani ហើយអំឡុង​ពេល​សាកសួរ នាង​សារភាព​ថា ខ្លួនពិតជា​បង្ហោះ​ខ្លឹមសារ​បំភ័ន្ត​ដោយ​ចេតនាទាក់ទិន​​បញ្ហា​ព្រំដែនដោយគ្មានមូលដ្ឋានច្បាស់លាស់មែន ប៉ុន្តែ​បដិសេធ​ថា នាងគ្មានទទួលបានកម្រៃអ្វីទេពីការបង្ហោះនោះ។

នាងត្រូវបានតុលាការចេញដីកាចាប់ខ្លួន ក្រោមការចោទ​ប្រកាន់​ពី​បទ​ចែកចាយ​ព័ត៌មាន​មិន​ពិតតាម​ប្រព័ន្ធ​កុំព្យូទ័រ​ ធ្វើឲ្យប៉ះពាល់​ដល់​សន្តិសុខ​ជាតិ និង​សុវត្ថិភាព​សាធារណៈ។

បទ​ចោទ​នេះ ​ត្រូវ​ផ្ដន្ទាទោស​ដាក់​ពន្ធនាគារ​រហូត​ដល់​៥​ឆ្នាំ និង/ឬ​ពិន័យ​ជា​ប្រាក់​រហូត​ដល់​១០​ម៉ឺន​បាត៕

អត្ថបទ៖ សុខ សុវណ្ណ

ចុចអាន៖ បុគ្គលដែលពាក់ឯកសណ្ធានកងទ័ព បង្ហោះព័ត៌មានមិនពិត ជាសកម្មជនគណបក្សប្រឆាំង និងកំពុងរស់នៅប្រទេសថៃ