បាតុកម្មប្រឆាំងច្បាប់អន្តោប្រវេសន៍នៅអាមេរិក រីកកាន់តែធំដល់ ១១ទីក្រុង

បាតុកម្មប្រឆាំងច្បាប់អន្តោប្រវេសន៍របស់លោក ដូណាល់ ត្រាំ បានរាលដាលដល់ទីក្រុងចំនួន១១ហើយនៅសហរដ្ឋអាមេរិក ដោយក្នុងនោះ Los Angeles (LA)​ ជាកន្លែងធ្ងន់ធ្ងរជាងគេ ដោយឈានដល់កើតជាអំពើហិង្សារវាងប៉ូលិសនិងបាតុករ ថែមទាំងមានការដាក់បម្រាមគោចរទៀតផង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការចុះផ្សាយរបស់ Guardian នៅថ្ងៃពុធទី១១ខែមិថុនាឆ្នាំ២០២៥ ក្រៅពី LA បាតុកម្មបានរីករាលដាលដល់ទីក្រុង New York, Chicago, Philadelphia, Seattle, Austin, Dallas, Denver, Washington D.C, Boston, Atlanta, និង Portland។

បាតុកម្មដំបូងគឺកើតឡើងនៅ​ LA កាលពីចុងសប្តាហ៍មុន បន្ទាប់ពីមន្ត្រីអន្តោប្រវេសន៍មកពី ICE បើកប្រតិបត្តិការឃោរឃៅ វាយឆ្មក់ចាប់ខ្លួនជនអន្តោប្រវេសន៍សូម្បីតែពេលពួកគេកំពុងធ្វើការនៅក្នុងការិយាល័យ។ កុបកម្មនេះ ធ្វើឲ្យ​ LA ធ្លាក់ចូលក្នុងភាពចលាចលនិងវឹកវរ ឈានដល់ការដុតបំផ្លាញយានយន្តនិងសំណង់នានា ថែមទៀតផង។

កាលពីថ្ងៃអង្គារ ប៉ូលិសក្រុង LA ក៏បើកផ្តើមយុទ្ធនាការចាប់ខ្លួនទ្រង់ទ្រាយធំ លើបាតុករដែលគឃ្លើននឹងបម្រាមគោចរ ដែលចូលជាធរមានចាប់ពីម៉ោង៨យប់ដល់ម៉ោង៦ព្រឹក។

អភិបាលក្រុង LA លោកស្រី Karen Bass បានដាក់បម្រាមនេះដែលនឹងត្រូវ អនុវត្តច្រើនថ្ងៃ ដោយមិនដឹងថានឹងដកវិញនៅថ្ងៃណានោះទេ។

កាលពីថ្ងៃរាត្រីថ្ងៃអង្គារ ប៉ូលិស LA បានចាប់ខ្លួនទ្រង់ទ្រាយធំចំពោះអ្នកទាំងឡាយណាដែលមិនព្រមបំបែកគ្នា នៅតាមទីតាំងហាមជួបជុំ ខណៈគិតក្នុងរយៈពេល៤ថ្ងៃមកនេះ ប៉ូលិស LA ឃាត់បានមនុស្សរហូតដល់ទៅ ៣៧៨នាក់ឯណោះ។

ឆ្មាំជាតិប្រហែល ២ ១០០នាក់ រួមជាមួយទាហានម៉ារីន៧០០នាក់ ក៏កំពុងឈរជើងនៅក្នុងទីក្រុង Los Angeles រួចទៅហើយដែរ ខណៈលោកត្រាំ អះអាងថា នឹងប្រើគ្រប់មធ្យោបាយដើម្បីកម្ចាត់អំពើហិង្សា និងស្តារសណ្តាប់ធ្នាប់ឡើងវិញ៕

អត្ថបទ៖ សុខ សុវណ្ណ

ចុចអាន៖ LA បើកប្រតិបត្តិការចាប់ខ្លួនមនុស្សទ្រង់ទ្រាយធំ ក្រោយដាក់បម្រាមគោចរ