ទឹកជំនន់ដ៏សាហាវឆក់យកជីវិត​៤៩នាក់​ភាគ​ខាងកើត​អាហ្វ្រិកខាងត្បូង

យ៉ាងហោចណាស់មនុស្ស៤៩​នាក់បានស្លាប់នៅក្នុងទឹកជំនន់ដ៏ធ្ងន់ធ្ងរដែលបានវាយប្រហារ ខេត្ត Eastern Cape របស់អាហ្រ្វិកខាងត្បូង ខណៈចំនួនអ្នកស្លាប់ត្រូវបានគេរំពឹងថា នឹងកើនឡើង​បន្ថែមទៀត ដោយកិច្ចខិតខំប្រឹងប្រែងស្វែងរកនៅតែបន្តនៅឡើយ។ នេះបើយោងតាមការចេញផ្សាយរបស់ទីភ្នាក់ងារព័ត៌មាន​ AP នៅថ្ងៃទី១២ខែមិថុនានេះ។

គ្រោះមហន្តរាយនេះបានកើតឡើងបន្ទាប់ពីមានភ្លៀងធ្លាក់ខ្លាំង ខ្យល់បក់ខ្លាំង និងព្រិលធ្លាក់នៅផ្នែកខ្លះនៃតំបន់ក្នុងប្រទេស​អាហ្វ្រិក​ខាង​ត្បូង​តាំងពីថ្ងៃអង្គារមកម៉្លេះ។

ក្នុងចំណោមជនរងគ្រោះមានសិស្សវិទ្យាល័យចំនួន​៦​នាក់ដែលបានលង់ទឹកស្លាប់នៅពេលដែលរថយន្តសាលារបស់ពួកគេត្រូវបានទឹកនាំទៅក្បែរក្រុង Mthatha ដែលជាតំបន់រងគ្រោះខ្លាំងជាងគេ។ សិស្ស​​៣​នាក់​ផ្សេង​ទៀត​ត្រូវ​បាន​ជួយ​សង្គ្រោះ ខណៈ​​៤​នាក់​ទៀត​នៅ​បាត់​ខ្លួន។ អ្នកបើកបរ និង​មនុស្ស​ពេញវ័យ​ម្នាក់​នៅលើ​រថយន្តក្រុង​ក៏បាន​ស្លាប់​ដែរ​។

ប្រជាជនរាប់រយគ្រួសារត្រូវបានជម្លៀសចេញ ដោយផ្ទះពួកគេត្រូវបានបំផ្លាញ ឬលិចទឹកអស់។ សាលារៀនជាង ៥០ និងមន្ទីរពេទ្យចំនួន ២០ បានរងការខូចខាត ហើយក៏មានការដាច់ចរន្តអគ្គិសនីក្នុងខេត្ត Eastern Cape និងខេត្ត KwaZulu-Natalដែលនៅជាប់គ្នា។ មកដល់ពេលនេះកិច្ចខិតខំប្រឹងប្រែងស្វែងរក និងជួយសង្គ្រោះកំពុងបន្ត ដោយមានក្រុមជួយសង្គ្រោះរបស់រដ្ឋាភិបាលត្រូវបានដាក់ពង្រាយ។

គួរបញ្ជាក់ថា ទឹកជំនន់នេះបង្ហាញពីភាពងាយរងគ្រោះរបស់អាហ្វ្រិកខាងត្បូងចំពោះបញ្ហាអាកាសធាតុ ជាពិសេសនៅក្នុងសហគមន៍ក្រីក្រដែលមានហេដ្ឋារចនាសម្ព័ន្ធខ្សោយ ខណៈអាហ្រ្វិកខាងត្បូងងាយរងគ្រោះដោយសារឥទ្ធិពលអាកាសធាតុធ្ងន់ធ្ងរដែលបក់មកពីមហាសមុទ្រឥណ្ឌា និងភាគខាងត្បូង។

កាលពីឆ្នាំ២០២២ មនុស្សជាង ៤០០នាក់បានស្លាប់ដោយសារទឹកជំនន់ក្នុងទីក្រុង Durban និងតំបន់ជុំវិញ។ តំបន់ក្រីក្រដែលមានលំនៅឋានតូចៗ ច្រើនតែរងផលប៉ះពាល់ខ្លាំងជាងគេ ហើយក៏ជាកន្លែងមានអ្នកស្លាប់ច្រើនជាងគេផងដែរ៕

អត្ថបទ៖ ប៊ុន សុភាព