ព័ត៌មានអន្ដរជាតិ

កូរ៉េខាងត្បូងផ្អាកការបំពងសំឡេងឃោសនាតាមព្រំដែនប្រឆាំងកូរ៉េខាងជើង

បានផុស

១២ ខែ មុន

នៅ

ថ្ងៃព្រហស្បតិ៍ ១២ មិថុនា ២០២៥

ដោយ

យោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី១២ខែមិថុនានេះ កូរ៉េខាងត្បូងបានបញ្ឈប់ការបំពងសំឡេងតាមឧគ្ឃោសនស័ព្ទរបស់ខ្លួននៅតាមព្រំដែនជាមួយកូរ៉េខាងជើង ដែលជាការផ្លាស់ប្តូរគោលនយោបាយដ៏សំខាន់មួយ ក្រោយមានប្រធានាធិបតីថ្មីក្នុងគោលបំណងកាត់បន្ថយភាពតានតឹងនៅឧបទ្វីបកូរ៉េ។

តំបន់ព្រំដែនកូរ៉េខាងជើងនិងខាងត្បូង (រូបភាព៖ AP)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណាត់ការនេះ បញ្ជាដោយប្រធានាធិបតីសេរីនិយមទើបជាប់ឆ្នោតថ្មី លោក Lee Jae-myung ដែលជាជំហានជាក់ស្តែងដំបូងដោយរដ្ឋបាលរបស់លោកឆ្ពោះទៅរកការស្តារទំនុកចិត្តឡើងវិញជាមួយក្រុងព្យុងយ៉ាង។

ការបំពងសំឡេងដែលរួមមានសារប្រឆាំងរបបដឹកនាំក្រុងព្យុងយ៉ាង និងតន្ត្រី K-pop ត្រូវបានដំណើរការឡើងវិញកាលពីឆ្នាំមុន ដើម្បីឆ្លើយតបទៅនឹងយុទ្ធនាការបង្កហេតុរបស់ប្រទេសកូរ៉េខាងជើងក្នុងការបង្ហោះប៉េងប៉ោងផ្ទុកសំរាមនិងលាមកសត្វរាប់ពាន់ចូលទៅកូរ៉េខាងត្បូង។ យុទ្ធសាស្ត្របែបសង្រ្គាមត្រជាក់ទាំងនេះបានបង្កើនភាពតានតឹងឆ្លងព្រំដែន និងទាក់ទាញការតវ៉ាពីប្រជាជនកូរ៉េខាងត្បូងនៅជិតព្រំដែន ដែលបានស៊ូទ្រាំនឹងការបំពងសំឡេងសងសឹករបស់កូរ៉េខាងជើងដែលមានសំឡេងរំខានផងដែរ។

ប្រធានាធិបតី Lee ដែលបានចូលកាន់តំណែង បន្ទាប់ពីការចោទប្រកាន់ទម្លាក់អតីតប្រធានាធីបតី លោក Yoon Suk Yeol ដែលជាអ្នកអភិរក្សនិយមកំពុងជំរុញឱ្យបើកបណ្តាញទំនាក់ទំនងឡើងវិញជាមួយកូរ៉េខាងជើង និងកាត់បន្ថយការប៉ះទង្គិចផ្នែកយោធា។ ក្រសួងបង្រួបបង្រួមកូរ៉េក៏បានជំរុញសកម្មជនកូរ៉េខាងត្បូងឱ្យបញ្ឈប់ការបង្ហោះខិត្តប័ណ្ណប្រឆាំងកូរ៉េខាងជើង ដោយព្រមានថាសកម្មភាពបែបនេះអាចបង្កគ្រោះថ្នាក់ដល់ជនស៊ីវិល។

ទោះបីជាមានកាយវិការផ្សះផ្សានេះក៏ដោយ ក៏ទិដ្ឋភាពភូមិសាស្ត្រនយោបាយទាំងមូលនៅតែតានតឹង។ កូរ៉េខាងជើងបន្តបដិសេធការសន្ទនាជាមួយកូរ៉េខាងត្បូង ដោយផ្តល់អាទិភាពដល់ទំនាក់ទំនងកាន់តែរីកចម្រើនជាមួយរុស្ស៊ី និងពង្រីកកម្មវិធីអាវុធនុយក្លេអ៊ែររបស់ខ្លួន។ មន្ត្រីលោកខាងលិចមានការព្រួយបារម្ភកាន់តែខ្លាំងឡើងថា ទីក្រុងព្យុងយ៉ាងអាចនឹងទទួលបានការគាំទ្រផ្នែកបច្ចេកវិទ្យារបស់រុស្ស៊ីជាថ្នូរនឹងជំនួយយោធាក្នុងជម្លោះអ៊ុយក្រែន។

ទោះបីជាមិនមានការឆ្លើយតបភ្លាមៗពីប្រទេសកូរ៉េខាងជើងទាក់ទងនឹងការសម្រេចចិត្តរបស់ទីក្រុងសេអ៊ូលក៏ដោយ ការផ្អាកការឃោសនានេះបង្ហាញពីបំណងយ៉ាងសំខាន់របស់កូរ៉េខាងត្បូងដើម្បីផ្លាស់ប្តូរពីការប្រឈមមុខដាក់គ្នាឲ្យបានច្រើនតាមដែលអាចធ្វើទៅបាន និងឆ្ពោះទៅរកសន្តិភាព ទោះបីជាមានការសង្ស័យអំពីចេតនារបស់ លោក គីម ជុងអ៊ុន និងការគំរាមកំហែងនុយក្លេអ៊ែររបស់កូរ៉េខាងជើងក៏ដោយ៕