ព័ត៌មានអន្ដរជាតិ

ចិន ចោទថា ត្រាំ កំពុងធ្វើឲ្យជម្លោះ អ៊ីស្រាអែល-អ៊ីរ៉ង់ កាន់តែរីកធំ

បានផុស

១២ ខែ មុន

នៅ

ថ្ងៃអង្គារ ១៧ មិថុនា ២០២៥

ដោយ

ស្របពេលជម្លោះអ៊ីស្រាអែល-អ៊ីរ៉ង់ កាន់តែក្តៅរោល បង្កក្តីបារម្ភផ្ទុះសង្គ្រាមធំក្នុងតំបន់មជ្ឈិមបូព៌ានោះ ប្រទេសចិន បានចោទប្រកាន់ប្រធានាធិបតីអាមេរិក ដូណាល់ ត្រាំ ថា កំពុងចាក់សាំងលើភ្លើង ហើយពង្រីកអណ្តាតភ្លើងនៃជម្លោះនេះ ឲ្យកាន់តែរាលដាលខ្លាំង។

អ្នកនាំពាក្យក្រសួងការបរទេសចិន Guo Jiakun (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសន្និសីទសារព័ត៌មានមួយនៅថ្ងៃអង្គារទី១៧ខែមិថុនាឆ្នាំ២០២៥ អ្នកនាំពាក្យក្រសួងការបរទេសចិន Guo Jiakun និយាយថា «លោកត្រាំកំពុងដុតភ្លើងហើយចាក់សាំងពីលើ! ការគំរាមកំហែងនិងដាក់សម្ពាធកាន់តែខ្លាំង នឹងមិនជួយរុញឲ្យស្ថានការណ៍ថយកម្តៅនោះទេ ប៉ុន្តែផ្ទុយទៅវិញ វានឹងធ្វើឲ្យជម្លោះកាន់តែធំនិងខ្លាំងឡើងៗ។ ចិន សូមអំពាវនាវឲ្យភាគីពាក់ព័ន្ធទាំងអស់ ជាពិសេសប្រទេសដែលមានឥទ្ធិពលលើអ៊ីស្រាអែល ត្រូវទទួលខុសត្រូវនិងចាត់វិធានការជាបន្ទាន់ ដើម្បីបន្ថយភាពតានតឹងនិងការពារជម្លោះកុំឲ្យរីករាលដាល»។

ការចោទប្រកាន់របស់ចិន គឺចង់សំដៅទៅការព្រមានរបស់លោកត្រាំ ដែលឲ្យគ្រប់គ្នា ត្រូវចាកចេញពីរដ្ឋធានីតេហេរ៉ង់ នៃប្រទេសអ៊ីរ៉ង់ជាបន្ទាន់ ដោយធ្វើឲ្យគេបារម្ភថា អាចនឹងមានរឿងធំកើតឡើង។

តាមរយៈសារបង្ហោះលើបណ្តាញសង្គម Truth Social កាលពីថ្ងៃចន្ទទី១៦ខែមិថុនាឆ្នាំ២០២៥ លោកត្រាំសរសេរថា «អ៊ីរ៉ង់ គួរតែចុះហត្ថលេខាលើកិច្ចព្រមព្រៀង ដែលខ្ញុំបានប្រាប់ពួកគេ។ ពិតជាគួរឲ្យខ្មាសអៀន និងខ្ជះខ្ជាយអាយុជីវិតមនុស្សណាស់។ និយាយឲ្យសាមញ្ញគឺ អ៊ីរ៉ង់មិនអាចមានអាវុធនុយក្លេអ៊ែរបានទេ។ ខ្ញុំនិយាយម្តងហើយម្តងទៀត! គ្រប់គ្នាត្រូវជម្លៀសចេញពីទីក្រុងតេហេរ៉ង់ជាបន្ទាន់!»។

ប្រធានាធិបតីអាមេរិក ដូណាល់ ត្រាំ (រូបថត៖ Reuters)

យ៉ាងណា ទន្ទឹមនោះ ក្រសួងការបរទេសចិន ក៏បានចេញសេចក្តីណែនាំជាបន្ទាន់មួយ ដោយអំពាវនាវដល់ពលរដ្ឋរបស់ខ្លួនក្នុងប្រទេសអ៊ីស្រាអែលឲ្យជម្លៀសចេញ «កាន់តែឆាប់កាន់តែល្អ» ផងដែរ ដោយលើកឡើងពីស្ថានភាពសន្តិសុខកាន់តែយ៉ាប់យ៉ឺន។

ក្នុងសេចក្តីថ្លែងការណ៍មួយដែលចេញផ្សាយនៅថ្ងៃអង្គារទី១៦មិថុនា ស្ថានទូតចិនក្នុងទីក្រុង Tel Aviv បានរៀបរាប់ថា «បេសកកម្មចិននៅអ៊ីស្រាអែលសូមប្រកាសឲ្យជនជាតិចិនចាកចេញពីប្រទេសឲ្យបានឆាប់តាមដែលអាចធ្វើបានតាមរយៈច្រកព្រំដែនគោក ដើម្បីបង្ការទុកជាមុនថាពួកគេអាចធានាសុវត្ថិភាពផ្ទាល់ខ្លួនរបស់ពួកគេ»។ បន្ថែមពីនោះ ក្រសួងក៏បានបញ្ជាក់ទៀតថា «ជាការផ្ដល់អនុសាសន៍ សូមចាកចេញក្នុងទិសដៅនៃប្រទេសហ្សកដានី»។

ចំណែកឯស្ថានទូតក្រុងប៉េកាំងឯណោះ ក៏បានប្រកាសដែរថា ជម្លោះ«កំពុងតែបន្តកើនឡើង» ហើយថា «ហេដ្ឋារចនាសម្ព័ន្ធស៊ីវិលជាច្រើនត្រូវបានខូចខាត ការស្លាប់ និងរបួសរបស់ជនស៊ីវិលមានការកើនឡើង ហើយស្ថានភាពសន្តិសុខកាន់តែធ្ងន់ធ្ងរទៅៗ»៕

អត្ថបទ៖ សុខ សុវណ្ណ

ចុចអាន៖ ប្រទេសអារ៉ាប់និងមូស្លីមចំនួន២០ រួមគ្នាថ្កោលទោស អ៊ីស្រាអែល ដែលវាយអ៊ីរ៉ង់