ក្រុមសកម្មប្រយុទ្ធនិកាយស៊ីអ៊ីតអ៊ីរ៉ាក់ គំរាមវាយមូលដ្ឋានទ័ពអាមេរិក បើ ត្រាំ ចូលជួយអ៊ីស្រាអែល

ស្របពេលប្រធានាធិបតីអាមេរិក ដូណាល់ ត្រាំ ពិចារណាចូលជួយអ៊ីស្រាអែលតតាំងនឹងអ៊ីរ៉ង់ ស្រាប់តែក្រុមសកម្មប្រយុទ្ធនិកាយស៊ីអ៊ីតដ៏មានឥទ្ធិពលនៅប្រទេសអ៊ីរ៉ាក់ បានចេញមុខប្រកាសក្តែងៗថា ពួកគេនឹងវាយប្រហារមូលដ្ឋានទ័ពអាមេរិកនៅក្នុងតំបន់ បើទីក្រុងវ៉ាស៊ីនតោន ពិតជាចូលដៃក្នុងសង្គ្រាមមែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសេចក្តីថ្លែងការណ៍កាលពីថ្ងៃព្រហស្បតិ៍ទី១៩ខែមិថុនាឆ្នាំ២០២៥ លោក Abu Ali al-Askari ប្រធានផ្នែកសន្តិសុខនៃក្រុម Kataib Hezbollah និយាយថា «យើងសូមបញ្ជាក់សារជាថ្មីឲ្យកាន់តែច្បាស់ថា ប្រសិនបើអាមេរិកចូលរួមក្នុងសង្រ្គាមនេះមែន អ្នកដែលវង្វេងស្មារតី (ប្រធានាធិបតីអាមេរិក ដូណាល់ ត្រាំ) នឹងរបូតប្រាក់រាប់ពាន់លានដុល្លារ ដែលគាត់ស្រមៃចង់ដណ្តើមយកពីតំបន់នេះ។ ផែនការប្រតិបត្តិការត្រូវបានបង្កើតឡើងសម្រាប់គោលបំណងនោះ។ ដូច្នេះគ្មានអ្វីត្រូវសង្ស័យឡើយ មូលដ្ឋានទ័ពអាមេរិកនៅទូទាំងតំបន់ នឹងក្លាយទៅជាវាលបរបាញ់»។

មិនត្រឹមប៉ុណ្ណឹង លោក Al-Askari ក៏គំរាមបិទច្រកសមុទ្រ Hormuz រវាងឈូងសមុទ្រពែក្ស និងឈូងសមុទ្រអូម៉ង់ ក៏ដូចជាផ្លូវទឹក Bab-el-Mandeb ដ៏តូចចង្អៀតដែលតភ្ជាប់ទៅដល់សមុទ្រក្រហមផងដែរ។

ការគំរាមរបស់ក្រុមនេះកើតឡើងបន្ទាប់ពី លោកត្រាំ ប្រាប់ទីប្រឹក្សាកំពូលកាលពីថ្ងៃព្រហស្បតិ៍ថា លោកយល់ព្រមលើផែនការវាយអ៊ីរ៉ង់រួចហើយ ប៉ុន្តែមិនទាន់អនុវត្តទេ ដោយរង់ចាំមើលសិនថាតើ អ៊ីរ៉ង់មានឆន្ទៈមកពិភាក្សាអំពីការបញ្ចប់កម្មវិធីនុយក្លេអ៊ែររបស់ពួកគេឬក៏អត់។

លុះមកដល់ថ្ងៃសុក្រ សេតវិមានក៏បានឲ្យដឹងដែរថា ២សប្តាហ៍ទៀត គឺជាពេលដែលលោក ត្រាំ ត្រូវសម្រេចថាតើ នឹងវាយអ៊ីរ៉ង់ដែរឬក៏អត់ ដ្បិតប្រធានាធិបតីអាមេរិក នៅតែបើកចំហចំពោះដំណោះស្រាយតាមផ្នែកការទូត ប៉ុន្តែប្រកាន់ជំហរថា អ៊ីរ៉ង់ មិនអានផលិតអាវុធនុយក្លេអ៊ែរបានឡើយ៕

អត្ថបទ៖ សុខ សុវណ្ណ

ចុចអាន៖ ២សប្តាហ៍ទៀតនឹងដឹងច្បាស់ថាតើ អាមេរិក វាយអ៊ីរ៉ង់ឬអត់?