ដាណឺម៉ាក ចាប់អនុវត្តច្បាប់ កែនទ័ពនារី ចំពេលមានក្តីបារម្ភផ្នែកសន្តិសុខកាន់តែខ្លាំង

ក្នុងជំហានប្រវត្តិសាស្ត្រ ដែលឆ្លុះបញ្ចាំងពីស្ថានភាពសន្តិសុខដ៏តានតឹងនៅអឺរ៉ុប ប្រទេសដាណឺម៉ាកបានអនុវត្តជាផ្លូវការនូវច្បាប់ដែលធ្វើឲ្យកាតព្វកិច្ចយោធាក្លាយជាកាតព្វកិច្ចសម្រាប់ស្ត្រី ក្នុងលក្ខខណ្ឌដូចទៅនឹងបុរសដែរ។ ច្បាប់នេះតម្រូវឲ្យស្ត្រីទាំងអស់ដែលមានអាយុ១៨ឆ្នាំឡើង ចាប់ពីថ្ងៃទី១ខែកក្កដាឆ្នាំ២០២៥ ត្រូវចុះឈ្មោះចូលបម្រើយោធា ក្នុងគោលបំណងពង្រឹងកម្លាំងយោធារបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីមុន ស្ត្រីដាណឺម៉ាក បើចង់ចូលធ្វើទាហានអាចចូលបានដោយស្ម័គ្រចិត្ត ហើយដ្បិតមានស្ត្រីមួយចំនួនធំបានស្ម័គ្រចិត្តក្នុងរយៈពេលប៉ុន្មានឆ្នាំចុងក្រោយក៏ដោយ ប៉ុន្តែច្បាប់ថ្មីនេះបានណែនាំប្រព័ន្ធចាប់ឆ្នោតដោយមិនប្រកាន់ភេទមួយ ដែលមានន័យថា បន្ទាប់ពីការចុះឈ្មោះស្ម័គ្រចិត្តត្រូវបិទបញ្ចប់ តំណែងដែលនៅសល់ក្នុងជួរកងទ័ព នឹងត្រូវបំពេញដោយការចាប់ឆ្នោតពីបេក្ខជនទាំងបុរសនិងស្ត្រី។

ក្រោយការអនុម័តដោយសភាដាណឺម៉ាកនៅខែមិថុនាឆ្នាំ២០២៣ តាមពិតទៅច្បាប់នេះដំបូងគ្រោងអនុវត្តនៅឆ្នាំ២០២៧ឯណោះទេ ប៉ុន្តែដោយសារស្ថានភាពភូមិសាស្ត្រនយោបាយដែលកំពុងវិវត្តកាន់តែមិនស្រួល ជាពិសេសសង្រ្គាមជាបន្តរបស់រុស្ស៊ីនៅអ៊ុយក្រែននោះ ទើបរដ្ឋាភិបាលទីក្រុងកូប៊ិនហាក ពន្លឿនការអនុវត្តមុនពេលកំណត់។

រឿងនេះកើតឡើងចំពេលអង្គការណាតូ កំពុងរៀបជើងព្រួលផ្នែកយោធា ដោយលើកឡើងពីការគំរាមកំហែងរបស់រុស្ស៊ី ខណៈក្នុងកិច្ចប្រជុំកំពូលរបស់ប្លុកនេះនៅទីក្រុងឡាអេ ប្រទេសហូឡង់កាលពីសប្តាហ៍មុន រដ្ឋជាសមាជិកបានយល់ព្រមបង្កើនការចំណាយលើវិស័យការពារជាតិរួចទៅហើយ។

ដោយឡែក កាលពីខែឧសភា សហភាពអឺរ៉ុប ក៏បានអនុម័តគម្រោងខ្ចីប្រាក់ចំនួន១៧១ពាន់លានដុល្លារអាមេរិកផងដែរ ដើម្បីគាំទ្រដល់ការពង្រឹងយោធារបស់ខ្លួន។

សូមជម្រាបថា ប្រទេសដាណឺម៉ាក ដែលមានប្រជាជនប្រមាណ ៦លាននាក់ បច្ចុប្បន្នមានកម្លាំងទ័ពអាជីពប្រមាណ ៩ ០០០ នាក់។ ប្រព័ន្ធកាតព្វកិច្ចយោធាថ្មីនេះត្រូវគេព្យាករថា នឹងបង្កើនចំនួនកម្លាំងយោធាដែលចុះឈ្មោះប្រចាំឆ្នាំពីប្រមាណ ៤ ៧០០នាក់ក្នុងឆ្នាំ២០២៤ ទៅដល់ប្រមាណ ៦ ៥០០នាក់នៅត្រឹមឆ្នាំ២០៣៣។

ការពង្រីកនេះគឺជាផ្នែកមួយនៃការកសាងកងទ័ពទ្រង់ទ្រាយធំ ដោយរួមបញ្ចូលទាំងមូលនិធិ ៧ ពាន់លានដុល្លារដែលទើបតែប្រកាសដើម្បីបង្កើនការចំណាយលើការការពារជាតិលើសពី ៣% នៃ GDP របស់ប្រទេសផងដែរ៕

អត្ថបទ៖ សុខ សុវណ្ណ

ចុចអាន៖ ដាណឺម៉ាក ​រិះគន់​គម្រោង​​ទស្សនកិច្ច​គណៈប្រតិភូ​អាមេរិក​ទៅកាន់ Greenland ដោយ​​​មិន​បាន​ស្នើសុំ