សម្ដេច ហ៊ុន សែន ដាក់ក្ដីរំពឹងលើឯកអគ្គរាជទូតដាណឺម៉ាក ថា នឹងធ្វើឱ្យចំណងមិត្តភាពកម្ពុជា-ដាណឺម៉ាកកាន់រីកចម្រើន

សម្តេចតេជោ ហ៊ុន សែន នាព្រឹកថ្ងៃទី១៦ ខែមីនា ឆ្នាំ២០២៦នេះ បានទទួលជួបជលោក Danny Annan ឯកអគ្គរាជទូតដាណឺម៉ាកប្រចាំកម្ពុជា ដោយក្នុងជំនួបនោះ សម្ដេចតេជោបានបង្ហាញនូវក្ដីរំពឹងថា ក្នុងអាណត្តិបេសកកម្មរបស់លោក Danny Annan នឹងធ្វើឱ្យទំនាក់ទំនងកម្ពុជា និងដាណឺម៉ាក កាន់តែមានភាពរីកចម្រើន។

សម្ដេចតេជោ ហ៊ុន សែន បានបង្ហាញនូវការពេញចិត្តចំពោះទំនាក់ទំនងកន្លងមក ដែលកម្ពុជា-ដាណឺម៉ាក មានភាពល្អប្រសើរ។ ខណៈនៅឆ្នាំក្រោយ គឺជាខួប៦០ឆ្នាំនៃទំនាក់ទំនងប្រទេសទាំងពីរ សម្ដេចតេជោសង្ឃឹមដា នឹងមានការរៀបចំកម្មវិធីនានាដើម្បីអបអរសាទរខួប៦០ឆ្នាំដែលនឹងឈានមកដល់នៅឆ្នាំក្រោយនេះ។ នេះបើតាមការថ្លែងឱ្យដឹងដោយអ្នកនាំពាក្យព្រឹទ្ធសភា លោក ជា ធីរិទ្ធ ក្រោយជំនួបត្រូវបានបញ្ចប់។

ឆ្លើយតបនឹងការលើកឡើងរបស់សម្ដេចតេជោ លោកឯកអគ្គរាជទូតដាណឺម៉ាក បានបញ្ជាក់ថា ក្នុងការបំពេញបេសកកម្មនៅកម្ពុជា លោកបានប្រឹងប្រែងក្នុងការពង្រីកទំនាក់ទំនងរវាងកម្ពុជា និងដាណឺម៉ាកឱ្យកាន់តែរីកចម្រើនទាំងក្នុងក្របខណ្ឌនៃការទូតនយោបាយ ជាពិសេសគឺសេដ្ឋកិច្ច ពាណិជ្ជកម្ម និងការវិនិយោគរវាងប្រទេសទាំងពីរ។

តាមការឱ្យដឹងដោយលោក ជា ធីរិទ្ធ សម្ដេចតេជោ ហ៊ុន សែន និងលោក Danny Annan សុទ្ធតែបានសម្លឹងឃើញដល់សេដ្ឋកិច្ច ពាណិជ្ជកម្ម និងការវិនិយោគ ជាវិស័យដែលត្រូវពង្រឹងបន្ថែមទៀត។ សម្ដេចតេជោ លើកឡើងថា ទំនាក់ទំនងរវាងកម្ពុជា និងដាណឺម៉ា គឺនៅមានសក្តានុពលច្រើនទៀត ដោយសម្ដេច ជំរុញឱ្យរដ្ឋាភិបាលនៃប្រទេសទាំងពីរបន្តធ្វើការជាមួយគ្នា ជាពិសេសលើផ្នែកពាណិជ្ជកម្ម ការវិនិយោគ និងសេដ្ឋកិច្ចតែម្ដង។

សម្ដេចតេជោ បញ្ជាក់ថា ភាគីទាំងពីរត្រូវធ្វើយ៉ាងណាឱ្យទំនាក់ទំនងរវាងកម្ពុជា និងដាណឺម៉ាកកាន់តែល្អបន្ថែមទៀត ជាពិសេសទៅលើបញ្ហាសេដ្ឋកិច្ច ពាណិជ្ជកម្ម និងការវិនិយោគ គឺឱ្យមានការកើនឡើងហើយស្របទៅនឹងកិច្ចសហប្រតិបត្តិការនៅក្នុងវិស័យនយោបាយការទូតរវាងប្រទេសទាំងពីរដែលមានជាមួយគ្នា។

ក្រៅពីជជែកពីបញ្ហាសេដ្ឋកិច្ច ពាណិជ្ជកម្ម សម្ដេចតេជោ ក៏បានចែករំលែកអំពីស្ថានការណ៍អន្តរជាតិមួយចំនួនដែលកើតមានឡើងនៅពេលបច្ចុប្បន្ន រួមទាំងបញ្ហាព្រំដែនរវាងកម្ពុជា និងថៃផងដែរ។ សម្ដេចតេជោ បញ្ជាក់ទៅកាន់ឯកអគ្គរាជទូតដាណឺម៉ាក ពីជំហររបស់រាជរដ្ឋាភិបាលកម្ពុជា ដែលតែងគាំទ្រចំពោះការរក្សានូវជំហរនៃការគោរពបទឈប់បាញ់ និងការដោះស្រាយបញ្ហា និងការចរចាដោយសន្តិវិធី។

ជុំវិញបញ្ហាព្រំដែននេះ លោកឯកអគ្គរាជទូតដាណឺម៉ាក បានបង្ហាញការពេញចិត្តចំពោះជំហររបស់កម្ពុជាក្នុងការប្រកាន់ខ្ជាប់នូវការដោះស្រាយបញ្ហាព្រំដែនជាមួយថៃ ដោយឈរលើការគោរពបទឈប់បាញ់ និងការដោះស្រាយបញ្ហាដោយសន្តិវិធី៕