ព័ត៌មានអន្ដរជាតិ

ដាណឺម៉ាកនិង Greenland បដិសេធ សំណើត្រាំ ចង់បញ្ជូនកប៉ាល់មន្ទីរពេទ្យអាមេរិកចូលអាក់ទិក

បានផុស

៥ ខែ មុន

នៅ

ថ្ងៃចន្ទ ២៣ កុម្ភៈ ២០២៦

ដោយ

នាយករដ្ឋមន្រ្តី Greenland លោក Jens-Frederik Nielsen បានបដិសេធ ដោយប្រើពាក្យថា «ទេ! សូមអរគុណ» ចំពោះផែនការរបស់ប្រធានាធិបតីអាមេរិក លោក ដូណាល់ ត្រាំ ក្នុងការបញ្ជូនកប៉ាល់មន្ទីរពេទ្យមកកាន់កោះអាក់ទិក បន្ទាប់ពីលោកគំរាមកំហែងម្តងហើយម្តងទៀតថា នឹងគ្រប់គ្រងទឹកដីស្វយ័តរបស់ប្រទេសដាណឺម៉ាកក្នុងហេតុផល «សន្តិសុខជាតិ»របស់អាមេរិកនោះ។

លោក Jens-Frederik Nielsen និង លោកស្រី Mette Frederiksen ។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម Al Jazeera នៅថ្ងៃទី២២ ខែកុម្ភៈ ២០២៦, លោកនាយករដ្ឋមន្ត្រីនៃកោះ Greenland លោក Jens-Frederik Nielsen បង្ហោះសារមួយលើទំព័រហ្វេសប៊ុករបស់លោក កាលពីថ្ងៃអាទិត្យថា៖ «សំណើរបស់លោកត្រាំ ក្នុងការបញ្ជូននាវាពេទ្យរបស់សហរដ្ឋអាមេរិកត្រូវបានកត់ចំណាំ»។

លោកបន្តថា៖«ប៉ុន្តែយើងមានប្រព័ន្ធថែទាំសុខភាពជាសាធារណៈទទួលការព្យាបាលដោយឥតគិតថ្លៃសម្រាប់ប្រជាពលរដ្ឋ។ វាជាជម្រើសល្អហើយ។ ប៉ុន្តែសូមនិយាយជាមួយពួកយើង ជំនួសឱ្យការជះកំហឹងដោយចៃដន្យតិច ឬច្រើននៅលើប្រព័ន្ធផ្សព្វផ្សាយសង្គម»។

យ៉ាងណាលោក Nielsen បញ្ជាក់ជាថ្មីថា Greenland នៅតែបើកចំហចំពោះការសន្ទនា និងកិច្ចសហប្រតិបត្តិការ។

គួរបញ្ជាក់ថាចំណងមិត្តភាពទ្វេភាគីដ៏រឹងមាំជាប្រវត្តិសាស្ត្រ បន្ទាប់ពីសង្គ្រាមលោកលើកទី២ រវាងសម្ព័ន្ធមិត្តណាតូ គឺប្រទេសដាណឺម៉ាក និងសហរដ្ឋអាមេរិក តែបានធ្លាក់ចូលភាពតានតឹងយ៉ាងខ្លាំងក្នុងរយៈពេលប៉ុន្មានខែថ្មីៗនេះ។ ខណៈលោក ដូណាល់ ត្រាំ យកចិត្តទុកដាក់លើការពិភាក្សាពីលទ្ធភាពដើម្បីគ្រប់គ្រងដែនអាក់ទិក សម្បូរទៅដោយរ៉ែ និងមានទីតាំងយុទ្ធសាស្ត្ររបស់សហរដ្ឋអាមេរិក។

មិនតែប៉ុណ្ណោះ រដ្ឋមន្ត្រីក្រសួងការពារជាតិដាណឺម៉ាក លោក Troels Lund Poulsen បានប្រាប់អ្នកយកព័ត៌មានដាណឺម៉ាក DR ថា៖ « ប្រជាជននៅ Greenland ទទួលបានការថែទាំសុខភាពតាមតម្រូវការរបស់ពួកគេ»។

លោកបន្តថា៖ « ពួកគេទទួលបានវា(ការព្យាបាល) ទាំងនៅ Greenland ឬប្រសិនបើពួកគេត្រូវការការព្យាបាលឯកទេស ពួកគេនឹងទទួលការព្យាបាលក្នុងប្រទេសដាណឺម៉ាក។ វាដូចជាមិនមានតម្រូវការសម្រាប់គំនិតផ្តួចផ្តើមចំពោះការថែទាំសុខភាពនោះទេ ពិសេសនៅ Greenland »។

កាលពីថ្ងៃសៅរ៍ លោក ដូណាល់ ត្រាំ បានបង្ហោះសារមួយលើ Truth Social របស់ខ្លួនជាមួយរូបភាពដែលបង្កើតឡើងដោយ AI ពីនាវារបស់កងទ័ពជើងទឹកសហរដ្ឋអាមេរិក USNS Mercy ថា៖ «នាវានេះកំពុងធ្វើដំណើរទៅកាន់ Greenland ដើម្បីព្យាបាលពលរដ្ឋ ដែលគេមិនអើពើខាងវេជ្ជសាស្ត្រ»។

លោក ត្រាំ បានសរសេរថា៖ « យើងនឹងបញ្ជូនទូកមន្ទីរពេទ្យដ៏អស្ចារ្យមួយទៅកាន់ Greenland ដើម្បីមើលថែមនុស្សជាច្រើនដែលមានជំងឺ និងមិនត្រូវបានមើលថែនៅទីនោះ។ វាកំពុងធ្វើដំណើរទៅតាមផ្លូវហើយ!!!»។

ចំណែក លោកស្រី Mette Frederiksen នាយករដ្ឋមន្ត្រីដាណឺម៉ាកមានប្រសាសន៍ថា៖ «យើងមានសេចក្តីសោមនស្សរីករាយដែលបានរស់នៅក្នុងប្រទេសមួយទទួលបានសេវាថែទាំសុខភាពឥតគិតថ្លៃ និងមានភាពស្មើភាពគ្នាសម្រាប់ទាំងអស់គ្នា»៕

ប្រែសម្រួល៖ ណឺ មិនា