នាយករដ្ឋមន្ត្រីដាណឺម៉ាក ដាក់​លិខិត​លាលែង បើកផ្លវ​ឲ្យ​ចរចា​បង្កើតរដ្ឋាភិបាលចម្រុះ​ថ្មី​

នាយករដ្ឋមន្ត្រីដាណឺម៉ាក លោកស្រី Mette Frederiksen បានដាក់លិខិតលាលែងពីតំណែងទៅកាន់ព្រះមហាក្សត្រ Frederik X បន្ទាប់ពីរដ្ឋាភិបាលចម្រុះ​បី​គណបក្ស​ដែលលោកស្រីដឹកនាំ​ មិន​ទទួលបាន​ជោគជ័យ​គ្រប់​គ្រាន់ក្នុងការបោះ​ឆ្នោត​សកល​​ សម្រាប់​ការ​បង្កើត​រដ្ឋាភិ​បាល​​​​ចម្រុះ​ដែល​មានស្រាប់​នោះទេ​។ នេះបើយោងតាម​សេចក្តីរាយការណ៍​ពី aljazeera កាលពីថ្ងៃទី២៥មីនា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីរាយការណ៍​នោះ បាន​ដកស្រង់​សេចក្តីថ្លែងការណ៍​របស់​ព្រះបរមរាជវាំង ស្តី​ពី​កិច្ចប្រជុំរវាងលោកស្រី​នាយករដ្ឋមន្ត្រី​Frederiksen និងព្រះមហាក្សត្រ ដែល​ប្រារព្ធ​ធ្វើឡើងនៅវិមាន Amalienborg ក្នុងទីក្រុង Copenhagen។ នៅទីនោះ លោកស្រី បានរាយការណ៍ពីលទ្ធផលនៃការបោះឆ្នោតសភា និងបានស្នើសុំឲ្យគណបក្សជាប់ឆ្នោតបង្ហាញទស្សនៈ​របស់​ពួកគេ លើការបង្កើតរដ្ឋាភិបាលបន្ទាប់។

​ទោះបី​យ៉ាងណា ផ្អែកតាមលទ្ធផលនៃការបោះឆ្នោតកាលពីថ្ងៃអង្គារ៍ គ្មានគណបក្សណាមួយឈ្នះ​ការ​បោះឆ្នោត​​ភាគច្រើនដាច់ខាត​នៃអាសនៈរដ្ឋសភាសរុបចំនួន​១៧៩ នោះទេ។ គណបក្សសង្គមប្រជាធិបតេយ្យរបស់​ នាយករដ្ឋមន្ត្រី​ Frederiksen បានឈ្នះសំឡេងឆ្នោតច្រើនជាងគេ ប៉ុន្តែប្លុកឆ្វេងនិយមមានត្រឹមតែ ៨៤ អាសនៈប៉ុណ្ណោះ ខណៈដែលប្លុកស្តាំនិយមមាន ៧៧ អាសនៈ ដោយភាគីទាំងពីរខ្វះ ៩០ អាសនៈ ដែលត្រូវការសម្រាប់សំឡេងភាគច្រើន​ដើម្បី​ឈាន​ទៅ​បង្កើត​រដ្ឋាភិបាល​​​ចម្រុះ​។

យោងតាមបទប្បញ្ញត្តិ រដ្ឋាភិបាលចម្រុះមួយត្រូវការយ៉ាងហោចណាស់ ៩០អាសនៈ ដើម្បីគ្រប់គ្រងរដ្ឋសភា។

ទោះជាយ៉ាងណាក៏ដោយ គណបក្សសង្គមប្រជាធិបតេយ្យនៅតែជាគណបក្សធំបំផុតក្នុងប្រទេសដាណឺម៉ាក ជាមួយនឹងការគាំទ្រ ២១,៩ ភាគរយ មានន័យថាលោកស្រី Frederiksen អាចវិលត្រឡប់មកកាន់តំណែង​នាយករដ្ឋមន្ត្រីវិញ​សម្រាប់​អាណត្តិទីបី បន្ទាប់ពីការចរចារដ្ឋាភិបាលចម្រុះ៕

អត្ថបទ៖ សាង ស្រីល័ក្ខ