ប្រមុខណាតូ ចង្អុលចំឈ្មោះ២ប្រទេស ដែលនឹងអុជបញ្ឆេះសង្គ្រាមលោកលើកទី៣

ប្រមុខអង្គការណាតូលោក ម៉ាក រូតេ បានចង្អុលចំៗទៅរុស្ស៊ីនិងចិន ថាជាប្រទេសកំពុងបង្កឲ្យមានជម្លោះជាសកលថ្មីទៀត ហើយនឹងអុជបញ្ឆេះឲ្យមានសង្គ្រាមលោកលើកទី៣តែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប្រមុខអង្គការណាតូ ព្រមានបែបនេះនៅក្នុងបទសម្ភាសជាមួយ The New York Times កាលពីចុងសប្តាហ៍ ដោយលោកសង្កត់ធ្ងន់លើទំនាក់ទំនងគ្នាដែលគំរាមកំហែងពីទីក្រុងមូស្គូនិងប៉េកាំង។

លោករូតេ បានចង្អុលទៅការវាយលុករបស់រុស្ស៊ីនៅអ៊ុយក្រែន និងសម្ពាធយោធាកាន់តែខ្លាំងឡើងពីសំណាក់ចិនលើកោះតៃវ៉ាន់ ហើយវាមើលទៅហាក់ដូចជាការសហការគ្នាដែលបង្កើនទិដ្ឋភាពនៃជម្លោះកាន់តែរីកធំ។ លោកនិយាយថា «អ្វីដែលកំពុងកើតឡើងនៅអ៊ុយក្រែន គឺមានទំនាក់ទំនងដោយផ្ទាល់ទៅនឹងអ្វីដែលអាចកើតឡើងនៅជុំវិញកោះតៃវ៉ាន់។ មានទំនាក់ទំនងរវាងរុស្ស៊ីនិងចិននៅទីនេះ ហើយប្រសិនបើលោកខាងលិចធ្វើខុសតែបន្តិច យើងអាចនឹងត្រូវបង្ខំចិត្តចូលទៅក្នុងសេណារីយ៉ូដ៏អាក្រក់បំផុត។ សេណារីយ៉ូនោះ អាចជាការចូលរួមក្នុងសង្គ្រាមលោក»។

តាមការលើកឡើងរបស់លោករូតេ, បើប្រធានាធិបតីចិន ស៊ី ជីនពីង រៀបចំវាយលុកតៃវ៉ាន់ គាត់នឹងទូរស័ព្ទទៅប្រាប់ពូទីនថា «ខ្ញុំនឹងធ្វើរឿងនេះ ហើយខ្ញុំត្រូវការអ្នកធ្វើឲ្យលោកខាងលិចរវល់នៅអឺរ៉ុប តាមរយៈការវាយលុកទឹកដីរដ្ឋជាសមាជិកអង្គការណាតូ»។  

លោកបន្តថា «បើអ៊ុយក្រែនដួលរលំ នោះគឺជាការផ្ញើសាររបស់រុស្ស៊ីទៅលោកស៊ី ​ថា អ្នកអាចចាត់ការកោះតៃវ៉ាន់បានហើយ ព្រោះលោកខាងលិចនឹងមិនតស៊ូដើម្បីរឿងនេះទេ»។

ពាក់ព័ន្ធរឿងសង្គ្រាមលោកលើកទី៣នេះផងដែរ កាលពីដើមឆ្នាំ២០២៥ អនុប្រធានគណៈកម្មាធិការការពារជាតិនៃសភារុស្ស៊ីលោក Aleksey Zhuravlyov ប្រកាសថា ទីក្រុងមូស្គូរឹងដៃរឹងជើងហើយសម្រាប់ការប្រយុទ្ធក្នុងជម្លោះទាំងអស់ ដូច្នេះប្រុសៗត្រូវតែត្រៀមលក្ខណៈសម្រាប់សង្គ្រាមលោកលើកទី៣ ជាមួយបស្ចិមប្រទេសនៅ៣ឆ្នាំខាងមុខ។

លោកគូសបញ្ជាក់ថា «អឺរ៉ុបប្រាប់យើងរួចហើយថាឆ្នាំ២០២៨ឬ២០២៩ ពួកគេនិងសម្ព័ន្ធមិត្ត ត្រៀមប្រយុទ្ធជាមួយរុស្ស៊ី ដូច្នេះវាចាំបាច់សម្រាប់យើងដើម្បីការពារមាតុភូមិ នេះមិនមែនជារឿងលេងសើចទេ»៕

អត្ថបទ៖ សុខ សុវណ្ណ

ចុចអាន៖ ហុងគ្រីព្រមានថា ថ្ងៃណាអ៊ុយក្រែនបានចូល​ណាតូ ​ស្អែក​ឡើងច្បាស់ជាកើតសង្គ្រាមលោកលើកទី៣