ថៃ កើតជម្លោះផ្ទៃក្នុងមិនចេះចប់! Phumtham ​និង Anutin ឈ្លោះគ្នារឿងលុយបក្ស

ជម្លោះផ្ទៃក្នុងថៃកាន់តែក្តៅទៅៗហើយ ដោយពេលនេះនាយករដ្ឋមន្ត្រីស្តីទីថៃ Phumtham Wechayachai កំពុងមើលមុខគ្នាមិនចំជាមួយអតីតរដ្ឋមន្ត្រីមហាផ្ទៃ Anutin Charnvirakul។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកទាំងពីរកំពុងឈ្លោះគ្នាជុំវិញការចោទប្រកាន់ករណីរំលោភអំណាចនិងបែងចែកថវិការដ្ឋ ដោយលម្អៀងទៅរកគណបក្សនយោបាយ។ 

ជាក់ស្តែង Phumtham អះអាងថា Anutin បានប្រើប្រាស់តួនាទីជារដ្ឋមន្ត្រីមហាផ្ទៃ ដើម្បីបង្វែរថវិកាសម្រាប់អភិវឌ្ឍមូលដ្ឋានទៅកាន់ខេត្តឬតំបន់ដែលគណបក្សភូមិចៃថៃ មានការគាំទ្រខ្លាំង។ ទង្វើនេះត្រូវបានចាត់ទុកថាជាទង្វើអយុត្តិធម៌និងបំពានលើគោលការណ៍តម្លាភាព ក្នុងការគ្រប់គ្រងថវិការដ្ឋ។

លោក Phumtham ចោទថា មូលដ្ឋាននៅក្រៅតំបន់ឥទ្ធិពលរបស់គណបក្ស ភូមិចៃថៃ ទទួលបានថវិកាត្រឹមតែ ១ ទៅ ៣ លានបាតប៉ុណ្ណោះ ប៉ុន្តែតំបន់សំខាន់ៗរបស់អតីតគណបក្សសម្ព័ន្ធមិត្តមួយនេះ ដូចជាខេត្ត Buri Ram និង Surin បែរជាទទួលថវិកាច្រើនជាងនេះ ដោយតំបន់ខ្លះទទួលបានរហូតដល់ទៅ ៧០០ លានបាតឯណោះ។

លោកបន្តថា លុយទាំងនេះគឺបានមកពីកញ្ចប់ថវិកាជំរុញសេដ្ឋកិច្ចរបស់រដ្ឋាភិបាលទំហំ ១៥៧ពាន់លានបាត ដែលបម្រុងទុកសម្រាប់ស្ថាប័នរដ្ឋបាលមូលដ្ឋានទូទាំងប្រទេស។

មិនត្រឹមប៉ុណ្ណឹង Phumtham ក៏ចោទ Anutin ថា អនុម័តសំណើសុំថវិកាដែលមិនត្រូវគ្នានឹងទិន្នន័យដែលបានកត់ត្រានៅក្នុងមូលដ្ឋានទិន្នន័យរបស់ការិយាល័យរដ្ឋដែរ។

ទោះបីជាយ៉ាងណាក៏ដោយ Anutin បានបដិសេធយ៉ាងដាច់អហង្ការ ចំពោះការចោទប្រកាន់នេះ ដោយនិយាយថា ការបែងចែកថវិកាទាំងអស់ គឺត្រូវបានធ្វើឡើងតាមនីតិវិធីត្រឹមត្រូវ ឬជាការបែងចែកផ្អែកលើតម្រូវការជាក់ស្តែងរបស់តំបន់ទាំងនោះ។

លោកជំទាស់ថា មិនសមឡើយដែលមកនិយាយថា ខេត្តជាមូលដ្ឋានរឹងមាំរបស់គណបក្ស ភូមិចៃថៃ ទទួលបានថវិកាច្រើនជាង។ លោកអះអាងថា អង្គការរដ្ឋបាលខេត្តនិងសាលាក្រុងទាំងអស់ សុទ្ធតែត្រូវបានអនុញ្ញាតឲ្យដាក់សំណើសុំថវិកាដោយផ្ទាល់ទៅការិយាល័យថវិកា ហេតុអ្វីមកនិយាយបែបនេះ។

សូមជម្រាបថា ជម្លោះនេះអាចនឹងក្លាយជាប្រធានបទក្តៅគគុកថ្មីទៀតនៅក្នុងនយោបាយថៃ ដោយសារវាប៉ះពាល់ដល់បញ្ហាសំខាន់ៗដូចជា តម្លាភាពរបស់រដ្ឋាភិបាល ការប្រើប្រាស់អំណាច និងការបែងចែកធនធានសាធារណៈ៕

អត្ថបទ៖ សុខ សុវណ្ណ

ចុចអាន៖ ​សំណុំរឿង​បរិហារកេរ្តិ៍​ព្រះមហាក្សត្ររបស់លោក ថាក់ស៊ីន នឹងប្រកាសសាលក្រមខែក្រោយ