​សំណុំរឿង​បរិហារកេរ្តិ៍​ព្រះមហាក្សត្ររបស់លោក ថាក់ស៊ីន នឹងប្រកាសសាលក្រមខែក្រោយ

មេធាវីរបស់លោក ថាក់ស៊ីន ស៊ីណាវ៉ាត្រ បានបញ្ជាក់ថា តុលាការ​ព្រហ្មទណ្ឌ ​នឹង​ប្រកាស​សាលក្រម​សំណុំរឿង​បរិហារកេរ្តិ៍​ព្រះមហាក្សត្ររបស់អតីតនាយករដ្ឋមន្ត្រីថៃរូបនេះ ​នៅ​ថ្ងៃទី​២២ខែ​សីហា ដែលវាគឺជាព្រឹត្តិការណ៍នឹងត្រូវគេតាមដានយ៉ាងយកចិត្តទុកដាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេធាវីគឺលោក Winyat Chartmontree បានប្រាប់អ្នកសារព័ត៌មានថា «យើងមានទំនុកចិត្តថា នឹងទទួលបានយុត្តិធម៌ ហើយលោកថាក់ស៊ីន នឹងទៅស្តាប់សាលក្រមដោយផ្ទាល់»។

ករណី​នេះ​កើតឡើង​តាំងពី​ឆ្នាំ២០១៥មកម្ល៉េះ ​ដែលកាលនោះ​លោក ថាក់ស៊ីន បាន​ផ្តល់​បទសម្ភាស​​ទៅ​កាន់​កាសែត Chosun Ilbo របស់​កូរ៉េខាងត្បូង។ ក្នុង​បទសម្ភាសនោះ លោក​ត្រូវ​ចោទប្រកាន់​ថា​បាន​ធ្វើ​អត្ថាធិប្បាយ​ ជា​ការ​ប្រមាថស្ថាប័ន​រាជវង្ស​ថៃ។

ក្រោយមក ថាក់ស៊ីន​ត្រូវ​បាន​ចោទប្រកាន់​ក្រោមមាត្រា ១១២ នៃ​ក្រមព្រហ្មទណ្ឌ​ថៃ ដែល​គេ​ស្គាល់​ថា​ជា​ច្បាប់បរិហារកេរ្តិ៍​ព្រះមហាក្សត្រ។ ក្រៅពី​ករណីនេះ លោក​ក៏​ត្រូវ​ចោទប្រកាន់​ពីបទ​រំលោភបំពាន​ច្បាប់​ឧក្រិដ្ឋកម្ម​កុំព្យូទ័រ​ផង​ដែរ ដោយសារ​បទសម្ភាស​នោះ ​បង្ហោះ​តាម​ប្រព័ន្ធ​អនឡាញ។

ច្បាប់​នេះ​ត្រូវ​បាន​គេ​ចាត់ទុកថា​ជា​ច្បាប់ ប្រមាថរាជវង្សដ៏​តឹងរ៉ឹង​បំផុត​មួយលើ​ពិភពលោក ដែល​មាន​ទោស​ជាប់​ពន្ធនាគារ​ពី​ ៣ ទៅ ១៥ ឆ្នាំ​សម្រាប់​បទល្មើស​នីមួយៗ។

យ៉ាងណាក្តី ក្រុម​អ្នករិះគន់ និង​អង្គការ​សិទ្ធិមនុស្ស​បាន​លើកឡើង​ថា ច្បាប់​នេះ​ត្រូវ​​គេ​ប្រើធ្វើ​ជា​ឧបករណ៍​នយោបាយ​ដើម្បី​បំបិទ​សំឡេង​រិះគន់ និង​ការ​ជជែក​ដេញដោល​ស្របច្បាប់។

ប្រសិនបើ​តុលាការ​រកឃើញ​ថា​​មាន​ទោស លោក​ថាក់ស៊ីនអាច​ប្រឈម​នឹង​ការ​ជាប់ពន្ធនាគារ​រហូតដល់ ១៥ឆ្នាំ ហើយសាលក្រមនេះ​ក៏​អាច​មាន​ផល​ប៉ះពាល់​ដល់​ស្ថិរភាព​នយោបាយ​របស់​ប្រទេស​ថៃ​ផង​ដែរ៕

អត្ថបទ៖ សុខ សុវណ្ណ

ចុចអាន៖ ថាក់ស៊ីន ចូលខ្លួន​ថ្ងៃ​ទី​ពីរ​នៃ​ការ​កាត់​ក្ដី​ទោសប្រមាថព្រះមហាក្សត្រក្នុង​ទីក្រុង​បាងកក