ព័ត៌មានអន្ដរជាតិ

ហ្សេលេនស្គី ឌឺដង ពូទីន ថាខ្លាចអាមេរិក ទើបអត់ហ៊ានទម្លាក់គ្រាប់បែកថ្ងៃលោក Kellogg មកក្រុងកៀវ

បានផុស

៤ ខែ មុន

នៅ

ថ្ងៃព្រហស្បតិ៍ ១៧ កក្កដា ២០២៥

ដោយ

Chheang

ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេលេនស្គី បានចំអន់ថា លោក វ៉្លាឌីមៀរ ពូទីន ភ័យខ្លាចសហរដ្ឋអាមេរិក ទើបផ្អាកការទម្លាក់គ្រាប់បែកទ្រង់ទ្រាយធំ ក្នុងអំឡុងដំណើរទស្សនកិច្ចរបស់បេសកជនពិសេសអាមេរិក លោក Keith Kellogg នៅរដ្ឋធានីកៀវ។

លោក វ៉ូឡូឌីមៀរ ហ្សេលេនស្គី និងលោក Keith Kellogg (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយកាលពីថ្ងៃទី១៦ខែកក្កដារបស់ Ukrinform លោក ហ្សេលេនស្គី បាននិយាយថា «ឧត្តមសេនីយ Kellogg បានមកដល់ ហើយមិនមានការទម្លាក់គ្រាប់បែកធំដុំអ្វីឡើយរយៈពេលពីរយប់ជាប់គ្នា… នៅពេលដែលជនជាតិអាមេរិកនៅទីនេះ គាត់មិន [ហ៊ានទម្លាក់គ្រាប់បែក]… គឺ ពូទីន ខ្លាចអាមេរិក»។

លោក Kellogg បានធ្វើដំណើរទៅដល់រដ្ឋធានីកៀវ កាលពីថ្ងៃទី១៤ខែកក្កដា។

សារព័ត៌មានក្នុងស្រុក Kyiv Post និង NV Kyiv បានរាយការណ៍បន្ថែមថា ដំណើរទស្សនកិច្ចរបស់លោក Kellogg បានក្លាយជារឿងកំប្លែងក្នុងតំបន់ ដោយមានការនិយាយលេងអំពីការផ្តល់លិខិតឆ្លងដែនអ៊ុយក្រែនដល់លោក Kellogg និងជំរុញឲ្យមានដំណើរទស្សនកិច្ចរបស់អាមេរិកច្រើនថែមទៀត ទើបរុស្ស៊ីលែងសូវហ៊ានទម្លាក់គ្រាប់បែក។

សូមជម្រាបថា ក្នុងអំឡុងដំណើរទស្សនកិច្ចរបស់មន្ត្រីអាមេរិក លោក ហ្សេលេនស្គី បានពណ៌នាកិច្ចប្រជុំជាមួយលោក Kellogg ថាជា «ការចាប់ផ្តើមដ៏មានអត្ថន័យ» ដល់កិច្ចសហប្រតិបត្តិការរវាងសហរដ្ឋអាមេរិក និងអ៊ុយក្រែនកាន់តែស៊ីជម្រៅលើការគាំទ្រផ្នែកយោធា និងការទូត។ បន្ថែមពីនេះ លោកបានអរគុណដល់ប្រធានាធិបតី ដូណាល់ ត្រាំ និងសហរដ្ឋអាមេរិកសម្រាប់ការត្រៀមខ្លួនរបស់ពួកគេក្នុងការគាំទ្រអ៊ុយក្រែន ដោយនិយាយថា «សង្រ្គាមនេះនៅតែបន្ត ដោយសារតែប្រទេសរុស្ស៊ី និងដោយសារតែបំណងប្រាថ្នារបស់ ពូទីន ក្នុងការអូសបន្លាយវា»។ លោកបានប្រាប់ទៀតថា អ៊ុយក្រែន និងសហរដ្ឋអាមេរិក កំពុងសហការគ្នាយ៉ាងជិតស្និទ្ធលើការផ្ទេរអាវុធ ការផ្តល់មូលនិធិការពារជាតិរបស់អឺរ៉ុប និងការអនុវត្តទណ្ឌកម្មប្រឆាំងនឹងទីក្រុងមូស្គូ៕