ព័ត៌មានអន្ដរជាតិ

ថៃ ទទួលស្គាល់ថា ខ្លួនពិតជាទម្លាក់គ្រាប់បែកចង្កោមលើកម្ពុជាមែន

បានផុស

១២ ខែ មុន

នៅ

ថ្ងៃសៅរ៍ ២៦ កក្កដា ២០២៥

ដោយ

ប្រទេសថៃបានទទួលស្គាល់ថា ខ្លួនពិតជាប្រើគ្រាប់បែកចង្កោមទម្លាក់មកលើកម្ពុជាមែន ប៉ុន្តែបែរជានិយាយដោះសារទាំងមិនខ្មាសមាត់ថា ការប្រើប្រាស់គ្រាប់បែកចង្កោមគឺស្របតាមគោលការណ៍ «សមាមាត្រ» ហើយមិនបានរំលោភលើអនុសញ្ញានោះទេ ព្រោះប្រទេសថៃមិនមែនជាភាគីនៃអនុសញ្ញា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការអះអាងរបស់អ្នកនាំពាក្យកងទ័ពថៃ លោក វិនថៃ ស៊ូវ៉ារី កាលពីថ្ងៃសុក្រទី២៥ខែកក្កដាឆ្នាំ២០២៥, ការប្រើប្រាស់គ្រាប់បែកចង្កោមគឺស្របតាមគោលការណ៍ «សមាមាត្រ» ហើយមិនបានរំលោភលើអនុសញ្ញានោះទេ ព្រោះប្រទេសថៃមិនមែនជាភាគីនៃអនុសញ្ញា ដូច្នេះអនុសញ្ញានោះមិនមានការចងកាតព្វកិច្ចឡើយ។ វាមិនមែនជាមីនប្រឆាំងមនុស្សទេ ហើយគ្មានផលប៉ះពាល់រយៈពេលវែងឡើយ។

អ្នកនាំពាក្យរូបនេះបញ្ជាក់ថា គ្រាប់បែកចង្កោមត្រូវបានប្រើប្រាស់លុះត្រាតែចាំបាច់ដើម្បីកំណត់គោលដៅយោធា ដើម្បីជួយបង្កើនសមត្ថភាពក្នុងការបំផ្លាញគោលដៅទាំងនោះ។

ទោះមានការនិយាយដោះសារបែបនេះក្តី ថៃកំពុងប្រឈមការថ្កោលទោសពីអន្តរជាតិ ព្រោះតែរំលោភអនុសញ្ញាស្តីពីគ្រាប់បែកចង្កោមទីក្រុងអូស្លូ (CCM) ឆ្នាំ២០០៨ ដែលចូលជាធរមាននៅថ្ងៃទី ១ ខែសីហា ឆ្នាំ២០១០។

អនុសញ្ញានេះហាមឃាត់ការប្រើប្រាស់ ការផលិត ការផ្ទេរ និងការស្តុកទុកគ្រាប់បែកចង្កោមទាំងអស់ ហើយដ្បិតថៃមិនមែនជាភាគីអនុសញ្ញានេះក៏ដោយ ប៉ុន្តែការប្រើប្រាស់គ្រាប់បែកចង្កោម ត្រូវបានគេចាត់ទុកថាជាការរំលោភលើគោលការណ៍មនុស្សធម៌អន្តរជាតិដោយសារតែ ផលប៉ះពាល់មិនរើសអើង និងគ្រោះថ្នាក់រយៈពេលវែងដល់ជនស៊ីវិល។

លក្ខណៈរបស់គ្រាប់បែកនេះគឺផ្ទុះចេញគ្រាប់តូចៗជាច្រើនគ្រាប់ក្នុងតំបន់ធំទូលាយ និងគ្រោះថ្នាក់នៃគ្រាប់មិនទាន់ផ្ទុះដែលនៅសេសសល់ ដែលបន្តគំរាមកំហែងដល់ជនស៊ីវិល ជាពិសេសកុមារ រាប់ឆ្នាំក្រោយសង្គ្រាម៕

អត្ថបទ៖ សុខ សុវណ្ណ

ចុចអាន៖ UN អាចនឹងថ្កោលទោស ថៃ ដែលប្រព្រឹត្តឧក្រិដ្ឋកម្មសង្គ្រាម ទម្លាក់គ្រាប់បែកចង្កោមលើ កម្ពុជា