ស្លាប់ ឬបាត់ខ្លួន ១៤​នាក់ព្រោះ​ទឹក​ជំនន់ភ្លាមៗ​នៅភាគខាងជើងវៀតណាម

យ៉ាងហោចណាស់មនុស្ស ១៤​នាក់ត្រូវបានបញ្ជាក់ថាស្លាប់ ឬបាត់ខ្លួនបន្ទាប់ពីទឹកជំនន់​ដ៏​ធ្ងន់ធ្ងរនៅក្នុងខេត្ត Dien Bien ភាគខាងជើងនៃប្រទេសវៀតណាម។ នេះបើយោងតាមរបាយការណ៍របស់ប្រព័ន្ធផ្សព្វផ្សាយរដ្ឋ​នា​ថ្ងៃសុក្រ​ទី​១​ខែ​សីហា​ឆ្នាំ​២០២៥។

សារព័ត៌មាន Tien Phong បានរាយការណ៍ថា ភ្លៀង​បាន​ធ្លាក់ខ្លាំងរាប់​ម៉ោងកាលពីយប់ថ្ងៃព្រហស្បតិ៍ ហើយ​ទឹកជន់ឡើងយ៉ាងលឿន លិចតំបន់ទំនាប និងបង្កជាគ្រោះ​ទឹក​ជំនន់ភ្លាមៗ និងបំណាក់​ដី​ដ៏គ្រោះថ្នាក់ពាសពេញខេត្ត ជាពិសេសនៅក្នុងភូមិ Xa Dung ដែលមានមនុស្សម្នាក់ស្លាប់ និង ៦​នាក់ទៀតកំពុងបាត់ខ្លួន។

អាជ្ញាធរក្នុងតំបន់បាននិយាយថា ក្មេង ២នាក់នៅ​ក្នុងភូមិ Hang Pu Xi ត្រូវបានកប់​នៅ​ក្រោម​បំណាក់​ដី ហើយក្រុមអ្នកជួយសង្គ្រោះមិនទាន់អាចស្រង់សាកសពរបស់ពួកគេបាននៅឡើយ។

គណៈកម្មាធិការប្រជាជនខេត្ត Dien Bien បានបញ្ជាក់នៅក្នុងសេចក្តីថ្លែងការណ៍ថា ទឹកជំនន់បានកាត់ផ្តាច់ផ្លូវចរាចរណ៍ និងខ្សែបណ្តាញអគ្គិសនី នៅក្នុងស្រុកមួយចំនួន។

ក្រុមសង្គ្រោះបន្ទាន់កំពុងធ្វើការប្រជែង​នឹង​ពេលវេលា ជាមួយនឹងហានិភ័យនៃ​បំណាក់​ដីបន្ថែម​ទៀត​ដែលគំរាមកំហែងដល់តំបន់ដែលត្រូវបានបំផ្លិចបំផ្លាញរួច​ទៅ​ហើយ៕

ដោយ៖ ឈាង