ផែថងថាន នឹងមិនចុះចេញពីតំណែងឡើយ រង់ចាំរហូតដល់តុលាការចេញសាលក្រម

ដ្បិតមានបាតុកម្មរង្គើទីក្រុងបាងកកក៏ដោយ ក៏នាយករដ្ឋមន្ត្រី ផែថងថាន ស៊ីណាវ៉ាត្រ នឹងមិនចុះចេញពីតំណែងដាច់ខាត រហូតដល់តុលាការធម្មនុញ្ញចេញសាលក្រមសំណុំរឿងបែកធ្លាយការសន្ទនាជាមួយសម្តេចតេជោ  ហ៊ុន សែន ប្រធានព្រឹទ្ធសភាកម្ពុជា។ នេះបើតាមការបញ្ជាក់ពីលោក Prommin Lertsuridej ដែលជាអគ្គលេខាធិការរបស់នាយករដ្ឋមន្ត្រីព្យួរតំណែង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសន្និសីទកាសែតកាលពីថ្ងៃចន្ទទី៤ខែសីហាឆ្នាំ២០២៥ លោក Prommin បានច្រានចោលសេចក្តីរាយការណ៍ ថា ផែថងថាន គ្រោងលាលែងតំណែង ដោយអះអាងថា រឿងនោះគឺមិនពិតទេ ផែថងថាន គ្មានចេតនាបោះបង់អំណាចឡើយ។

តាមការបញ្ជាក់ពីអគ្គលេខាធិការរូបនេះ, លោកស្រី ផែថងថាន បានពិគ្រោះយោបល់រួចហើយជាមួយភ្នាក់ងារសន្តិសុខ រួមទាំងយោធានិងក្រុមប្រឹក្សាសន្តិសុខជាតិផងដែរ មុនពេលអនុវត្តវិធានការណាមួយ។

ការអះអាងនេះកើតឡើង២ថ្ងៃ បន្ទាប់ពីប្រជាជនថៃជាង១ម៉ឺននាក់ បានប្រមូលផ្តុំគ្នាធ្វើបាតុកម្មនៅវិមានជ័យជម្នះ ក្នុងទីក្រុងបាងកក ដើម្បីទាមទារឲ្យ ផែថងថាន ចុះចេញ ដោយមិនចាំបាច់រង់ចាំដល់តុលាការធម្មនុញ្ញ ចេញសាលក្រមទេ។

មិនត្រឹមប៉ុណ្ណឹង បាតុករក៏ទាមទារឲ្យគណបក្សទាំងឡាយក្នុងរដ្ឋាភិបាលចម្រុះ ត្រូវដកខ្លួនចេញពីរដ្ឋាភិបាលជាបន្ទាន់ផងដែរ។

បាតុកម្មនោះទៀតសោតកើតឡើងបន្ទាប់ពីតុលា​ការ​ធម្មនុញ្ញថៃ​ បដិសេធ​​សំណើ​របស់ ​ផែថងថាន ដែល​សុំពន្យារពេល​១៥ថ្ងៃទៀត ​ដើម្បី​ដាក់​ការ​ឆ្លើយ​បំភ្លឺ​​ជុំវិញការ​និយាយ​ទូរស័ព្ទ​ជាសម្ងាត់​ជាមួយ​សម្តេច​តេជោ ហ៊ុន សែន​​។

នៅក្នុងសេចក្តីថ្លែងការណ៍មួយរបស់​តុលាការ​ធម្មនុញ្ញ,​ ​ក្រុម​ប្រឹក្សា​ចៅក្រម​តុលាការ​ធម្មនុញ្ញចំនួន​​៩រូប ក្នុង​នោះ​​​​​៥​រូប​​ បានយល់ព្រម​​កំណត់ពេលវេលាចុងក្រោយសម្រាប់ ផែថងថាន ដើម្បីឆ្លើយតបនឹងការចោទប្រកាន់នៅថ្ងៃទី៤ខែសីហា ​ដោយ​បដិសេធ​​​សំណើរបស់​លោកស្រី ក្នុងការស្នើ​​ពេល​១៥ថ្ងៃ​បន្ថែមទៀត​​ដើម្បីប្រមូលព័ស្តុតាងចាំបាច់ បញ្ចប់ការចោទប្រកាន់៕

អត្ថបទ៖ សុខ សុវណ្ណ

ចុចអាន៖ ថៃ ផ្ទុះបាតុកម្ម ទាមទារឲ្យ ផែថងថាន ចុះចេញពីតំណែង មិនបាច់ចាំដល់តុលាការធម្មនុញ្ញ ចេញសាលក្រមទេ