រលកកម្ដៅខ្លាំងនិងទឹកជំនន់ដ៏បំផ្លិចបំផ្លាញកំពុងវាយប្រហារតំបន់អាស៊ី

អាស៊ីបច្ចុប្បន្នកំពុងប្រឈមនឹងបញ្ហាអាកាសធាតុ ចាប់ពីរលកកម្ដៅខ្លាំងរហូតដល់ទឹកជំនន់ដ៏បំផ្លិចបំផ្លាញ ដែលជំរុញដោយការប្រែប្រួលអាកាសធាតុ។ នេះបើយោងតាមការចេញផ្សាយរបស់សារព័ត៌មាន​ BBC នៅថ្ងៃទី០៧ខែសីហា។

ថ្មីៗនេះប្រទេសជប៉ុនបានកត់ត្រាថ្ងៃក្តៅបំផុតរបស់ខ្លួនដែលមិនធ្លាប់មាននៅ ៤១.៨ ° C នៅទីក្រុង Isesaki ដោយយ៉ាងហោចណាស់មានអ្នកស្លាប់ដោយសារកម្ដៅចំនួន ៥៦នាក់ត្រូវបានរាយការណ៍ចាប់តាំងពីពាក់កណ្តាលខែមិថុនា។ ប្រទេសកូរ៉េខាងត្បូងមានរយៈពេល ២២យប់ជាប់គ្នាក្នុងខែកក្កដា ដែលសីតុណ្ហភាពបានបន្តលើសពី ២៥ អង្សារសេ ដែលជារយៈពេលវែងបំផុតមិនធ្លាប់មាន។ នៅប្រទេសវៀតណាម រដ្ឋធានីហាណូយសីតុណ្ហភាពឡើងដល់លើសពី ៤០°C ជាលើកដំបូងនៅក្នុងខែសីហា។

ផ្ទុយ​ទៅ​វិញ ភ្លៀង​ធ្លាក់​ខ្លាំង​បាន​បណ្តាល​ឲ្យ​មាន​ទឹក​ជំនន់​ស្លាប់​ក្នុង​ប្រទេស​ចិន ឥណ្ឌា និង​ប៉ាគីស្ថាន។ ភាគខាងត្បូងប្រទេសចិនប្រឈមមុខនឹងហានិភ័យទឹកជំនន់ និងការរអិលបាក់ដីយ៉ាងធ្ងន់ធ្ងរ ដោយជើងហោះហើរត្រូវបានលុបចោល និងការរីករាលដាលនៃជម្ងឺ។ នៅក្នុងរដ្ឋ Uttarakhand របស់ប្រទេសឥណ្ឌា ទឹកជំនន់ភ្លាមៗធ្វើឱ្យមនុស្សជាង ១០០ នាក់បាត់ខ្លួន។ នៅក្នុងប្រទេសប៉ាគីស្ថាន មនុស្សជិត៣០០ នាក់ រួមទាំងកុមារជាង១០០ នាក់ បានស្លាប់នៅក្នុងឧប្បត្តិហេតុទាក់ទងនឹងទឹកជំនន់ចាប់តាំងពីខែមិថុនា។ ជាមួយគ្នានេះទីក្រុងហុងកុងក្នុងខែសីហាឆ្នាំនេះមានអាកាសធាតុសើមបំផុតចាប់តាំងពីឆ្នាំ ១៨៨៤ មិនធ្លាប់មាន។

អ្នកវិទ្យាសាស្ត្រព្រមានថា អាស៊ីឡើងកំដៅជិតពីរដងលឿនជាងមធ្យមភាគពិភពលោក ដែលធ្វើឲ្យបញ្ហាអាកាសធាតុកាន់តែកើនឡើង និងមិនអាចទាយទុកជាមុនបាន៕

អត្ថបទ៖ ប៊ុន សុភាព