ព័ត៌មានអន្ដរជាតិ

លោក អាន់វ៉ា ថា ចិនដើរតួនាទីស្ថាបនាក្នុងតំបន់ និងបទឈប់បាញ់រវាងកម្ពុជានិងថៃ

បានផុស

៩ ខែ មុន

នៅ

ថ្ងៃព្រហស្បតិ៍ ៧ សីហា ២០២៥

ដោយ

នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម (Anwar Ibrahim) ដែលកំពុងដើរតួសម្របសម្រួលជម្លោះព្រំដែនរវាងកម្ពុជានិងប្រទេសថៃ បានកោតសរសើរវត្តមានរបស់ប្រទេសចិនក្នុងការដើរតួនាទីប្រកបការស្ថាបនាក្នុងតំបន់អាស៊ានក្នុងការនាំយកនូវបទឈប់បាញ់រវាងប្រទេសកម្ពុជានិងប្រទេសថៃ។

លោក អាន់វ៉ា អ៊ីប្រាហ៊ីម បានធ្វើ់សវនាការជាមួយ ឧត្តមសេនីយ៍ Xu Xueqiang។ FB/Anwar

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅមុនជួបប្រតិភូពីភាគីកម្ពុជាដឹកនាំដោយ នាយឧត្តមសេនីយ៍ ទៀ សីហា ឧបនាយករដ្ឋមន្ត្រី និង រដ្ឋមន្ត្រីការពារជាតិកម្ពុជា និង រដ្ឋមន្ត្រីស្តីនៃក្រសួងការពារជាតិថៃ ឧត្តមសេនីយ៍ Nattaphon Narkphanit នៅក្នុងទីក្រុងកូឡាឡាំពូ នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បានធ្វើ់សវនាការជាមួយ ឧត្តមសេនីយ៍ Xu Xueqiang រដ្ឋមន្ត្រីក្រសួងអភិវឌ្ឍន៍បរិក្ខារនៃគណៈកម្មាធិការយោធាមជ្ឈិមនៃសាធារណរដ្ឋប្រជាមានិតចិន ដែលនឹងត្រូវចូលរួមជាសាក្សីក្នុងពិធីចុះហត្ថលេខាលើកិច្ចព្រមព្រៀងលើការចរចារបស់គណៈកម្មាធិការព្រំដែនទូទៅ (GBC) រវាងកម្ពុជានិងថៃ។

តាមការបង្ហោះតាមបណ្តាញសង្គមផ្ទាល់ខ្លួន លោក អាន់វ៉ា បានសរសេរថា កិច្ចប្រជុំជាមួយ ឧត្តមសេនីយ៍ Xu Xueqiang ផ្តោតលើទំនាក់ទំនងទ្វេភាគីរវាងម៉ាឡេស៊ី និងចិន ដែលបន្តពង្រឹង ជាពិសេសលើវិស័យសន្តិសុខ និងការពារជាតិ។

លោក អាន់វ៉ា បានសរសេរថា៖«ខ្ញុំក៏សូមថ្លែងអំណរគុណចំពោះតួនាទីស្ថាបនាដែលចិនដើរតួក្នុងបញ្ហាក្នុងតំបន់ រួមទាំងកិច្ចខិតខំប្រឹងប្រែងបទឈប់បាញ់រវាងកម្ពុជា និងថៃ និងការបន្តគាំទ្ររបស់ខ្លួនក្នុងការដោះស្រាយវិបត្តិនៅក្នុងប្រទេសមីយ៉ាន់ម៉ា»។

ជាមួយគ្នានោះ ក្នុងនាមជាប្រធានប្តូរវេនអាស៊ាន នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម ថាត្រៀមខ្លួនក្នុងការជួបពិភាក្សាជាមួយថ្នាក់ដឹកនាំកំពូលរបស់ប្រទេសចិន នៅក្នុងកិច្ចប្រជុំកំពូលអាស៊ាននៅក្នុងខែកញ្ញា ដោយជួបជាមួយប្រធានាធិបតី ស៊ី ជីនពីង (Xi Jinping) និងនាយករដ្ឋមន្ត្រី លី ឈាង (Li Qiang)។

លោក អាន់វ៉ា បានលើកឡើងថា៖«ម៉ាឡេស៊ីកោតសរសើរចំពោះកិច្ចសហប្រតិបត្តិការជិតស្និទ្ធរបស់ខ្លួនជាមួយប្រទេសចិនក្នុងទិដ្ឋភាពសន្តិសុខ រួមទាំងសមយុទ្ធរួម បន្ថែមពីលើការសង្កត់ធ្ងន់លើសារៈសំខាន់នៃកិច្ចសហប្រតិបត្តិការក្នុងបច្ចេកវិទ្យាយុទ្ធសាស្ត្រ»៕

រ៉ាន់ រើយ