ត្រាំ បញ្ជាក់កាលបរិច្ឆេទនៃជំនួបជាមួយ ពូទីន ចំ​ណែកទីតាំង មិនមែន ប្រទេសអារ៉ាប់រួម ទេ

ប្រធានាធិបតីអាមេរិក​ ដូណាល់ ត្រាំ បានបញ្ជាក់ច្បាស់ៗពីកាលបរិច្ឆេទនិងទីតាំងនៃកិច្ចប្រជុំកំពូលជាមួយមេដឹកនាំរុស្ស៊ី វ្ល៉ាឌីមៀរ ពូទីន ដោយជំនួបនេះនឹងធ្វើឡើងនៅថ្ងៃសុក្រទី១៥ខែសីហា ក្នុងរដ្ឋអាឡាស្កា សហរដ្ឋអាមេរិក មិនមែនប្រទេសអារ៉ាប់រួមទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈសារបង្ហោះលើបណ្តាញ Truth Social កាលពីថ្ងៃសុក្រទី៨ខែសីហា លោកត្រាំសរសេរថា «កិច្ចប្រជុំរវាងខ្ញុំក្នុងនាមជាប្រធានាធិបតីសហរដ្ឋអាមេរិក និងប្រធានាធិបតី វ្ល៉ាឌីមៀរ ពូទីន នៃប្រទេសរុស្ស៊ី នឹងប្រព្រឹត្តទៅនៅថ្ងៃសុក្រទី១៥ខែសីហាឆ្នាំ២០២៥នៅរដ្ឋ Alaska»។

ជំនួបនេះត្រូវគេរំពឹងថា នឹងទទួលបានលទ្ធផលផ្លែផ្កានិងសញ្ញាវិជ្ជមានឈានឆ្ពោះទៅរកការពន្លត់ភ្លើងសង្គ្រាមរុស្ស៊ី-អ៊ុយក្រែន និងនាំមកនូវសន្តិភាពពេញលេញសម្រាប់ប្រជាជនប្រទេសទាំងពីរ។

ការជ្រើសរើសយករដ្ឋអាឡាស្កា ជាទីតាំងរៀបចំកិច្ចប្រជុំនេះ គឺខុសពីបំណងរបស់លោក ពូទីន ដែលស្នើប្រទេសអារ៉ាប់រួម ធ្វើជាទីតាំងសក្តានុពលសម្រាប់ជំនួបជាមួយលោកត្រាំ។

ពីដំបូងអារ៉ាប់រួម ត្រូវគេមើលឃើញថាជាទីកន្លែងសមរម្យមួយ ដោយសារតែជំហរអព្យាក្រឹតរបស់ខ្លួនលើជម្លោះអ៊ុយក្រែន និងឋានៈរបស់ខ្លួនជាប្រទេសមិនមែនជាសមាជិកនៃតុលាការឧក្រិដ្ឋកម្មអន្តរជាតិ (ICC) ដែលបានចេញដីកាចាប់ខ្លួនលោក ពូទីន។

លើសពីនេះ អារ៉ាប់រួមបានសម្របសម្រួលការដោះដូរអ្នកទោសរវាងរុស្ស៊ីនិងអ៊ុយក្រែន ព្រមទាំង​គាំទ្រកិច្ចខិតខំប្រឹងប្រែងមនុស្សធម៌ថែមទៀតផង។ មិនត្រឹមប៉ុណ្ណឹង រុស្ស៊ីមានទំនាក់ទំនងរឹងមាំជាមួយអារ៉ាប់រួម ពោលគឺអាជីវកម្មរុស្ស៊ីប្រហែល ៤ ០០០​ បាន​​ប្រតិបត្តិការនៅក្នុង​ប្រទេស​អារ៉ាប់រួម ហើយមេដឹកនាំ​អារ៉ាប់ Mohamed bin Zayed ក៏ធ្លាប់​ធ្វើ​ទស្សនកិច្ច​នៅ​ទីក្រុងមូស្គូជាច្រើនដងផងដែរ។

សូម​ជម្រាប​ថា ជំនួប​លើក​នេះ នឹងក្លាយជាកិច្ចប្រជុំទល់មុខលើកដំបូងរវាងប្រធានាធិបតីកាន់តំណែងរបស់ប្រទេសទាំងពីរ ចាប់តាំងពី ចូ បៃដិន និងពូទីន ជួបគ្នានៅទីក្រុងហ្ស៊ឺណែវ ប្រទេសស្វីស កាលពីខែមិថុនាឆ្នាំ២០២១។ ចាប់តាំងពីចូលកាន់តំណែងក្នុងខែមករាមក លោក ត្រាំ តែងហៅខ្លួនឯងថា «ប្រធានាធិបតីសន្តិភាព» ដោយដាក់សម្ពាធសេដ្ឋកិច្ចនិងយោធា ដើម្បីដោះស្រាយជម្លោះអន្តរជាតិដែលកំពុងផ្ទុះឡើងច្រើនកន្លែង៕

អត្ថបទ៖ សុខ សុវណ្ណ

ចុចអាន៖ ហេតុផល​ធំៗ​ចំនួន​៤ ដែល​ ពូទីន ជ្រើសរើស​អារ៉ាប់រួម ដើម្បី​ធ្វើ​កិច្ចប្រជុំ​កំពូល​ជាមួយ ត្រាំ