ក្រុមប្រឆាំងប្តេជ្ញារារាំងការបោះឆ្នោតរបស់របបយោធាមីយ៉ាន់ម៉ាក្នុងរដ្ឋ Rakhine

កងទ័ព Arakan Army (AA) ដែលជាក្រុមប្រដាប់អាវុធជនជាតិភាគតិចដ៏មានឥទ្ធិពលបំផុតមួយរបស់ប្រទេសមីយ៉ាន់ម៉ាបានប្រកាសថា ខ្លួននឹងរារាំងការបោះឆ្នោតតាមការគ្រោងទុក្ខរបស់របបយោធាគ្រប់គ្រងដោយមេដឹកនាំរដ្ឋប្រហារលោក មីន អ៊ុងឡាំង ឆ្នាំ​២០២១ មិនឱ្យប្រព្រឹត្តទៅបាននៅក្នុងតំបន់ដែលខ្លួនគ្រប់គ្រងក្នុងរដ្ឋ Rakhine ភាគខាងលិចប្រទេសនោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងទ័ព Arakan Army (AA) បានគ្រប់គ្រង ១៤​នៅក្នុងចំណោមសង្កាត់ ១៧ របស់រដ្ឋ Rakhine ហើយនិយាយថាការបោះឆ្នោតនេះខ្វះការគាំទ្រពីសាធារណជននិងគ្មានន័យសម្រាប់ប្រជាជននោះទេ។ ខណៈមិនមែនមានតែក្រុមប្រឆាំងដូចជា Arakan Armyនោះទេ នៅក្នុងរដ្ឋផ្សេងៗទៀតក៏មានក្រុមប្រឆាំងផ្សេងទៀតត្រៀមរារាំងការបោះឆ្នោតដែលគ្រោងទុកនៅក្នុងខែធ្នូនិងខែមករាខាងមុខរបស់របបយោធាដែរ។

កាលពីខែមុនរបបយោធាបានបញ្ចប់ភាពអាសន្នទូទាំងប្រទេស ហើយនិយាយថា ការបោះឆ្នោតនឹងជួយស្តារសណ្តាប់ធ្នាប់ឡើងវិញ ប៉ុន្តែក្រុមប្រឆាំង និងអង្គការសហប្រជាជាតិបានចាត់ទុកវាថាជាការបោកប្រាស់ ដើម្បីឲ្យរបបយោធាធ្វើការគ្រប់គ្រងប្រទេសស្របច្បាប់ប៉ុណ្ណោះ។

គួរបញ្ជាក់ថា AA ដែលបានបំបែកបទឈប់បាញ់ជាមួយរបបយោធានៅចុងឆ្នាំ ២០២៣ ចាប់តាំងពីពេលនោះមកបានចូលរួមជាមួយកងទ័ពជនជាតិផ្សេងទៀតក្នុងការវាយលុកដែលបណ្តាលឱ្យយោធាបាត់បង់ទឹកដីដ៏ធំ។ ជម្លោះនេះបានធ្វើឱ្យមនុស្សប្រហែល ៥៦ម៉ឺននាក់ផ្លាស់ទីលំនៅក្នុងរដ្ឋរ៉ាឃីន ជាកន្លែងដែលការវាយប្រហារតាមអាកាស និងការបិទផ្លូវរបស់យោធាបានកាត់ផ្តាច់តំបន់ភាគច្រើនចេញពីប្រទេសមីយ៉ាន់ម៉ា៕

អត្ថបទ៖ ប៊ុន សុភាព