ត្រាំ ប្រាប់ថា កុំបារម្ភ! សង្គ្រាមលោកលើកទី៣ នឹងមិនផ្ទុះឡើងទេ

ក្នុង Podcast ជាមួយពិធីករ Mark Levin ផ្សាយកាលពីថ្ងៃពុធទី២០ខែសីហាឆ្នាំ២០២៥ ប្រធានាធិបតីអាមេរិក ដូណាល់ ត្រាំ បានបញ្ជាក់យ៉ាងច្បាស់ថា កុំបារម្ភអី! ជម្លោះរុស្ស៊ី-អ៊ុយក្រែន នឹងមិនរាលដាលក្លាយទៅជាសង្គ្រាមលោកលើកទី៣នោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដ្បិតទទួលស្គាល់ថា ជម្លោះរុស្ស៊ី-អ៊ុយក្រែន ពិតជាពិបាកដោះស្រាយ​ ប៉ុន្តែលោកត្រាំបានបង្ហាញភាពវិជ្ជមានក្នុងកិច្ចពិភាក្សាជាមួយមេដឹកនាំវិមានក្រឹមឡាំង វ្ល៉ាឌីមៀរ ពូទីន នាពេលថ្មីៗនេះ។ 

ប្រមុខសេតវិមានលើកឡើងថា កាលពីជំនាន់អតីតប្រធានាធិបតី ចូ បៃដិន ដឹកនាំ ទំនាក់ទំនងក្រុងមូស្គូ-វ៉ាស៊ីនតោន បានធ្លាក់ចុះដល់កម្រិតទាបបំផុត រុញស្ថានការណ៍ពិភពលោកឲ្យក្តៅនិងភាពតានតឹងខ្លាំង។ នោះក៏ព្រោះតែ គោលនយោបាយរបស់លោក បៃដិន ដែលគាំទ្រឲ្យអ៊ុយក្រែន ក្លាយជាសមាជិកអង្គការណាតូ ទោះដឹងថា រឿងនេះនឹងត្រូវរុស្ស៊ីប្រឆាំងក៏ដោយ។

រឿងសង្គ្រាមលោកលើកទី៣នេះ លោកត្រាំ ធ្លាប់ព្រមានជាញយដងជាពិសេសក្នុងករណីបទឈប់បាញ់រុស្ស៊ី-អ៊ុយក្រែន ត្រូវបរាជ័យ។ ជាពិសេសកាលពីខែមីនា ដែលមេដឹកនាំអាមេរិកនិយាយថា សង្គ្រាមលោកពិតជាផ្ទុះឡើងដោយងាយ ហើយផ្ទុះក្នុងទំហំធំបំផុតទៀតផង បើសិនបទឈប់បាញ់រវាងរុស្ស៊ីនិងអ៊ុយក្រែន មិនលេចចេញជារូបរាងទេនោះ។

ក្រោយមកមិនបានប៉ុន្មានថ្ងៃផង លោក ត្រាំ ថែមទាំងព្រមានទៀតថា ប្រសិនបើជម្លោះរុស្ស៊ី-អ៊ុយក្រែន រីករាលដាលទៅជាសង្គ្រាមលោកលើកទី៣មែន កងទ័ពអាមេរិកក៏អាចនឹងចូលប្រយុទ្ធដែរ។

ទោះបីជាយ៉ាងណាក៏ដោយ លោក ត្រាំ មិនបញ្ជាក់ឡើយថាតើ ក្នុងករណីសង្គ្រាមលោកលើកទី៣ ផ្ទុះឡើងមែន តើទ័ពអាមេរិក នឹងចូលជួយប្រយុទ្ធឲ្យខាងណា៕

អត្ថបទ៖ សុខ សុវណ្ណ

ចុចអាន៖ លោក ត្រាំ ហៅខ្លួនគាត់ និង​ ណេតាន់យ៉ាហ៊ូ ថាជា«វីរបុរសសង្គ្រាម»