ថៃ ប្រកាសកែនទ័ពតាមអនឡាញ ចាប់ពីខែក្រោយទៅ

ប្រទេសថៃបានប្រកាសកែនទ័ពសម្រាប់ឆ្នាំ២០២៦ ដោយក្នុងនោះការចុះឈ្មោះតាមអនឡាញនឹងចាប់ដំណើរការពីថ្ងៃទី១ខែកញ្ញាឆ្នាំ២០២៥ ដល់ថ្ងៃទី២៥ខែមករាឆ្នាំក្រោយ។ នេះបើតាមការផ្សាយរបស់ Khaosod។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីប្រកាសនេះធ្វើឡើងតាមរយៈផេកផ្លូវការរបស់ភូមិភាគ២នៅថ្ងៃព្រហស្បតិ៍ទី២១ខែសីហាឆ្នាំ២០២៥។ សម្រាប់លក្ខខណ្ឌនៃការចុះឈ្មោះ បេក្ខជនត្រូវមានលក្ខណៈសម្បត្តិដូចជា៖ អាយុចាប់ពី១៨-២០ឆ្នាំ ដោយមិនគិតកម្រិតវប្បធម៌។

អ្នកដែលស្ម័គ្រចិត្តនឹងអាចចូលបម្រើការងារក្នុងរយៈពេលខ្លីជាងមុន និងមានឱកាសទទួលបានការងាររដ្ឋបន្ទាប់ពីបញ្ចប់ការបម្រើកាតព្វកិច្ច។

គោលបំណងនៃការកែនទាហានតាមអនឡាញនេះ គឺដើម្បីធ្វើទំនើបកម្មប្រព័ន្ធកងទ័ព និងកាត់បន្ថយការពឹងផ្អែកលើការកែនទាហានតាមរយៈការចាប់ឆ្នោត ដែលជាប្រព័ន្ធមួយទទួលបានការរិះគន់ជាច្រើនឆ្នាំមកហើយ។

ក្រុមអ្នករិះគន់បានចាត់ទុកប្រព័ន្ធនេះថាមិនមានតម្លាភាព និងបង្ខំយុវជនឲ្យចូលបម្រើទាហានទាំងមិនស្ម័គ្រចិត្ត។

មិនត្រឹមប៉ុណ្ណឹង កងទ័ពថៃក៏ត្រូវគេរិះគន់លើបញ្ហាផ្សេងៗទៀតផងដែរ ដូចជាការបំពានសិទ្ធិមនុស្សនៅតំបន់ភាគខាងត្បូងដែលមានជម្លោះ ការគ្រប់គ្រងផ្ទៃក្នុង និងភាពអសកម្មរបស់យោធាក្នុងការដោះស្រាយបញ្ហាអសន្តិសុខនៅតាមតំបន់ព្រំដែន៕

អត្ថបទ៖ សុខ សុវណ្ណ

ចុចអាន៖ តុលាការធម្មនុញ្ញថៃ ហាម​​មិន​ឲ្យ​ចុះផ្សាយ​ព័ត៌មាន​លម្អិត​ពី​សវនាការ​របស់​ ផែនថនថាន ខ្លាច​ប៉ះពាល់​សន្តិសុខជាតិ