អ៊ីរ៉ង់ ធ្វើសមយុទ្ធជើងទឹកលើកដំបូង ចំពេលមានភាពតានតឹងជាមួយអ៊ីស្រាអែល និងលោកខាងលិច

យោងតាមការចេញផ្សាយរបស់ទីភ្នាក់ងារព័ត៌មាន AP នៅថ្ងៃទី២២ខែសីហា អ៊ីរ៉ង់បានចាប់ផ្តើមសមយុទ្ធយោធាលើកដំបូងរបស់ខ្លួន ចាប់តាំងពីការបញ្ចប់សង្គ្រាមរយៈពេល ១២ ថ្ងៃរបស់ខ្លួនជាមួយអ៊ីស្រាអែល ក្នុងគោលបំណងបង្កើតភាពរឹងមាំរបស់ខ្លួនបន្ទាប់ពីរង​ការ​ខាត​បង់​យ៉ាង​ខ្លាំង​ក្នុង​សង្គ្រាម។

សមយុទ្ធនេះមានឈ្មោះថា «Sustainable Power 1404» ធ្វើឡើងនៅឈូងសមុទ្រអូម៉ង់ និងមហាសមុទ្រឥណ្ឌា ដែលមានការចូលរួមពីនាវាកងទ័ពជើងទឹកពីរគឺ IRIS Sabalan និង IRIS Ganaveh រួមជាមួយនឹងកងកម្លាំងជើងគោក។

សមយុទ្ធនេះត្រូវបានធ្វើឡើង ខណៈដែលអ៊ីរ៉ង់ព្យាយាមបង្ហាញភាពខ្លាំងក្នុងប្រទេស និងក្រៅប្រទេស បន្ទាប់ពីការវាយប្រហាររបស់អ៊ីស្រាអែលបានធ្វើឱ្យខូចខាតដល់ទីតាំងការពារដែនអាកាស និងទីតាំងនុយក្លេអ៊ែររបស់ខ្លួន។ រដ្ឋមន្ត្រីក្រសួងការពារជាតិអ៊ីរ៉ង់លោក ឧត្តមសេនីយ Aziz Nasirzadeh បាននិយាយថា កងកម្លាំងរបស់អ៊ីរ៉ង់ ឥឡូវនេះមានមីស៊ីលថ្មីដែលត្រៀមរួចជាស្រេចដើម្បីប្រើប្រាស់ ប្រសិនបើសត្រូវណាមួយធ្វើចលនាប្រឆាំងនឹងពួកគេ។

ទន្ទឹមនឹងនេះ អ៊ីរ៉ង់បានដកខ្លួនចេញពីកិច្ចសហប្រតិបត្តិការជាមួយទីភ្នាក់ងារថាមពលអាតូមិកអន្តរជាតិ (IAEA) និងបង្កើនមហិច្ឆតាផលិតអាវុធនុយក្លេអ៊ែរបស់ខ្លួន។ ពាក់ព័ន្ធបញ្ហានេះ បណ្តាប្រទេសអ៊ឺរ៉ុបបានព្រមានថា ប្រសិនបើអ៊ីរ៉ង់មិនដោះស្រាយជម្លោះរបស់ខ្លួនជាមួយទីភ្នាក់ងារIAEAត្រឹមថ្ងៃទី ៣១ ខែសីហា នោះទេ អង្គការសហប្រជាជាតិនឹងនាំយកមកវិញនូវទណ្ឌកម្មចាស់ ដែលអាចធ្វើឱ្យសេដ្ឋកិច្ចរបស់អ៊ីរ៉ង់កាន់តែចុះខ្សោយ៕

អត្ថបទ៖ ប៊ុន សុភាព