ព័ត៌មានអន្ដរជាតិ

ស្ថិតក្នុងភាពចម្រូងចម្រាស ថៃនិងស៊ុយអែតចុះកិច្ចព្រមព្រៀងទិញ Gripen E/F នៅថ្ងៃនេះ

បានផុស

៨ ខែ មុន

នៅ

ថ្ងៃចន្ទ ២៥ សីហា ២០២៥

ដោយ

បណ្តាសារព័ត៌មានថៃ បានផ្សាយយ៉ាងព្រោងព្រាតពីការធ្វើដំណើររបស់អគ្គមេបញ្ជាការកងទ័ពអាកាសថៃ លោក Marshal Panpakdee Pattanakul និង រដ្ឋមន្ត្រីក្រសួងការបរទេសថៃ លោក ម៉ារីស សាងជីអាមពុងសា (Maris Sangiampongsa) ទៅកាន់ប្រទេសស៊ុយអែត ដើម្បីចុះហត្ថលេខាលើការទិញ-លក់ យន្តហោះចម្បាំង ប្រភេទ Gripen E/F ចំនួន៤គ្រឿង គ្រោងធ្វើឡើងនៅថ្ងៃនេះ ជាមួយភាពចម្រូងចម្រាសលើបណ្តាញសង្គម។

លោក Marshal Panpakdee Pattanakul ពេលទៅដល់ប្រទេសស៊ុយអែតកាលថ្ងៃទី២៤ខែសីហា។ ខាវសុត

កិច្ចព្រមព្រៀងទិញយន្តហោះចម្បាំងល្បឿងលឿនជាងសំឡេងរបស់ភាគីថៃ បានក្លាយជាប្រធានបទចម្រូងចម្រាសមួយរបស់ប្រទេសថៃ បន្ទាប់ពីយោធាថៃបានប្រើប្រាស់យន្តហោះចម្បាំង Gripen C/D ដែលពួកគេបានទិញពីស៊ុយអែតកាលឆ្នាំ២០១១ ដើម្បីវាយប្រហារកម្ពុជា ក្នុងការប៉ុនប៉ងឈ្លានពានមិនបានសម្រេចចន្លោះថ្ងៃទី២៤ដល់ថ្ងៃទី២៨ខែសីហា ឆ្នាំ២០២៥។

ថៃជាប្រទេសតែមួយគត់នៅអាស៊ីអាគេ្នយ៍ ដែលបានទិញយន្តហោះចម្បាំងប្រភេទ Gripen ផលិតដោយប្រទេសស៊ុយអែតសម្រាប់ប្រើប្រាស់ឈ្លានពានប្រទេសជាប់ខ្លួន។ ការប្រើប្រាស់សម្រាប់ការឈ្លានពានរបស់ថៃ អាចនឹងត្រូវប្រឈមបណ្តឹងតវ៉ា«ឧក្រិដ្ឋកម្មសង្គ្រាម»។ ជាមួយគ្នានោះ អ្នកលេងបណ្តាញសង្គមមានទាំងជនជាតិកម្ពុជា និង ជនបរទេសផង បង្ហាញការតវ៉ាយ៉ាងខ្លាំងចំពោះរដ្ឋាភិបាលស៊ុយអែត ដើម្បីឲ្យពិចារណាឡើងវិញនូវកិច្ចសន្យាដែលខ្លួនធ្វើជាមួយអាជ្ញាធរថៃ។

រដ្ឋមន្ត្រីក្រសួងការបរទេសថៃ លោក ម៉ារីស សាងជីអាមពុងសា (Maris Sangiampongsa) និងសមភាគីស៊ុយអែត។ ខាងសុត

ប្រទេសស៊ុយអែតធ្លាប់តែមានកេរ្តិ៍ឈ្មោះល្អក្នុងចំណោមប្រទេសមួយចំនួនទៀតនៅក្នុងតំបន់អឺរ៉ុប ក្នុងការលើកកម្ពស់សិទ្ធិមនុស្ស ជាពិសេសតាមរយៈគោលនយោបាយការបរទេស និងការគាំទ្រផ្នែកហិរញ្ញវត្ថុដល់អង្គការអន្តរជាតិ ដើម្បីធ្វើសកម្មភាពលើកកម្ពស់សិទ្ធិមនុស្សនិងលទ្ធិប្រជាធិបតេយ្យ។ ប៉ុន្តែ ការសម្រេចចិត្តរបស់រដ្ឋាភិបាលស៊ុយអែតក្នុងការផ្គត់ផ្គង់យន្តហោះចម្បាំង Gripen E/F ដល់ប្រទេសថៃ បន្ទាប់ពីបង្ហាញពីសកម្មភាពឈ្លានពានកម្ពុជា នឹងធ្វើឲ្យស៊ុយអែតបាត់បង់កិត្យានុភាពលើការលើកកម្ពស់សិទ្ធិមនុស្ស។

ក្នុងអំឡុងពេលផ្ទុះអាវុធរយៈពេល៥ថ្ងៃ៥យប់ ពីថ្ងៃទី២៤ដល់ថ្ងៃទី២៨ខែកក្កដា សារព័ត៌មានថៃ បានផ្សាយជាបន្តបន្ទាប់ថា យោធាថៃ (RTA) បានប្រើប្រាស់យន្តហោះចម្បាំង ប្រភេទ Gripen C/D ដែលថៃបានទិញពីប្រទេសស៊ុយអែតកាលឆ្នាំ២០១១ ដាក់ឲ្យប្រតិបត្តិការយោធា រួមជាយន្តយន្តហោះចម្បាំង F-16។

ក្នុងប្រតិបត្តិការវាយប្រហារកម្ពុជាកាលពី១ខែមុននោះ យោធាថៃបានបើកការវាយប្រហារចំប្រាសាទព្រះវិហារដែលជាទីតាំងសម្បត្តិបេតកភណ្ឌពិភពលោក វត្តអារាម និងលំនៅឋានរបស់ប្រជាជន និង បានសម្លាប់ប្រជាជនស៊ីវិលជាច្រើននាក់ទៀតផង។

ក្នុងចេតនាបំបាក់ស្មារតីកងទ័ព និងប្រជាជនកម្ពុជា សារព័ត៌មានថៃ បានប្រឹងបំពងសំឡេងរបស់មេទ័ពថៃ អំពីការប្រើប្រាស់ប្រកបដោយប្រសិទ្ធភាពនូវប្រភេទយន្តចម្បាំងសេរីទំនើបខាងលើ ប៉ុន្តែថៃខ្លួនឯង អាចនឹងប្រឈមបទល្មើស «ឧក្រិដ្ឋកម្មសង្គ្រាម (War Crime)» នៅពេលដែលកម្ពុជា និង ប្រជាជនក្នុងសហគមន៍ដាក់ពាក្យប្តឹងទៅកាន់តុលាការអន្តរជាតិនៅពេលក្រោយការប្រយុទ្ធគ្នា។

This image has an empty alt attribute; its file name is image-2074-1024x550.png — ប្រភេទ Gripen C/D ដែលប្រទេសថៃបានទិញពីប្រទេសស៊ុយអែត។ armyrecognition

ប្រទេសស៊ុយអែត បានលក់យន្តហោះចម្បាំង ប្រភេទ Gripen C/D ដែលប្រទេសថៃកាលឆ្នាំ២០០៨ និងទទួលយកមកប្រើប្រាស់កាលឆ្នាំ២០១១។ រហូតដល់ពេលនេះ ប្រទេសថៃមានយន្តហោះចម្បាំង Gripen C/D ចំនួន១១គ្រឿង ហើយ គ្រោងទិញយន្តហោះ Gripen E/F ជំនាន់ថ្មីចំនួន៤គ្រឿងដែលនឹងត្រូវចុះហត្ថលេខានៅថ្ងៃទី២៥ខែសីហា២០២៥នេះ។

នៅពាក់កណ្តាលខែសីហា២០២៥ គណៈរដ្ឋមន្ត្រីរបស់ប្រទេសថៃបានអនុម័តជាផ្លូវការនូវការទិញយន្តហោះចម្បាំង Saab JAS 39 Gripen E/F ចំនួន៤គ្រឿងពីប្រទេសស៊ុយអែត ដែលមានតម្លៃ ១៩,៥ ពាន់លានបាត (៥៥០លានដុល្លារ)។ យោងសារព័ត៌មានថៃ The Nation ប្រទេសថៃគ្រោងនាំចូលយន្តហោះ Gripen E/F ចំនួន១២គ្រឿងរហូតដល់ឆ្នាំ២០២៩៕

រ៉ាន់ រើយ