អង់គ្លេស បារាំង អាល្លឺម៉ង់៖ អ៊ីរ៉ង់អាច​ផ្អាក​រង​ទណ្ឌកម្ម៦ខែ បើ​ព្រម​ធ្វើ​តាម​លក្ខខណ្ឌ​ចំនួន​៣

កាលពីថ្ងៃសុក្រ​ទី​២៩​ខែ​សីហា​ឆ្នាំ​២០២៥ អង់គ្លេស បារាំង និងអាល្លឺម៉ង់ បានជំរុញ​ឲ្យ​អ៊ីរ៉ង់​បំពេញលក្ខខណ្ឌចំនួន៣​ ដើម្បីជៀសវាងការដាក់ទណ្ឌកម្មឡើងវិញរបស់អង្គការសហប្រជាជាតិ ដោយផ្តល់ការពន្យារពេលរហូតដល់​៦​ខែ ប្រសិនបើក្រុងតេហេរ៉ង់អនុវត្តតាម។

នៅក្នុងសេចក្តីថ្លែងការណ៍រួម អង់គ្លេស បារាំង និងអាល្លឺម៉ង់ បានលើក​ឡើង​ថា លក្ខខណ្ឌ​ទាំង​៣ មាន​ដូចជា អ៊ីរ៉ង់ត្រូវតែស្តារលទ្ធភាពពេញលេញសម្រាប់អធិការកិច្ចនុយក្លេអ៊ែររបស់អង្គការសហប្រជាជាតិ ដោះស្រាយកង្វល់ជុំវិញឃ្លាំងផ្ទុក​ចម្រាញ់​សារធាតុអ៊ុយរ៉ាញ៉ូម​របស់ខ្លួន និងចូលរួមកិច្ចពិភាក្សាដោយផ្ទាល់ជាមួយសហរដ្ឋ​អាមេរិក។

ចំណាត់ការ​នេះ​ ធ្វើឡើង​បន្ទាប់​ពី​ការ​ចាប់ផ្តើម​ដំណើរការ​រយៈពេល​៣០​ថ្ងៃ​ ដើម្បី​ពិចារណា​ការ​​ដាក់​​ទណ្ឌកម្ម​​​លើ​អ៊ីរ៉ង់​ឡើង​វិញ ​ជុំវិញ​កម្មវិធី​នុយក្លេអ៊ែរ​ដែល​មាន​ជម្លោះ​របស់ខ្លួន។ អ្នកការទូតអឺរ៉ុបបាននិយាយថា ពួកគេបានពិភាក្សាជាមួយទីក្រុងតេហេរ៉ង់កាលពីដើមសប្តាហ៍ ប៉ុន្តែបានព្រមានថា កិច្ចសហប្រតិបត្តិការមានសារៈសំខាន់ណាស់។ អាល្លឺម៉ង់ក៏បានផ្តល់សញ្ញាថា ខ្លួនអាចគាំទ្រការដាក់ទណ្ឌកម្មថ្មី ប្រសិនបើអ៊ីរ៉ង់នៅតែបន្តរារាំងការត្រួតពិនិត្យរបស់ទីភ្នាក់ងារថាមពលបរមាណូអន្តរជាតិ៕

ដោយ៖ ឈាង