ព័ត៌មានអន្ដរជាតិ

មន្ទីរបញ្ចកោណ ព្រមានវ៉េណេស៊ុយអេឡា ក្រោយមានយន្តហោះF-16 ហោះក្បែរនាវាចម្បាំងអាមេរិក

បានផុស

៩ ខែ មុន

នៅ

ថ្ងៃសុក្រ ៥ កញ្ញា ២០២៥

ដោយ

យោងតាមការចេញផ្សាយរបស់សារព័ត៌មាន Al Jazeera ក្រសួងការពារជាតិអាមេរិកបានថ្កោលទោសប្រទេសវ៉េណេស៊ុយអេឡា បន្ទាប់ពីយន្តហោះចម្បាំង F-16 ពីរគ្រឿងរបស់ប្រទេសនេះបានហោះទៅជិតនាវាពិឃាត USS Jason Dunham ក្នុងដែនទឹកអន្តរជាតិនៅភាគខាងត្បូងតំបន់ការ៉ាបៀន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ទីរបញ្ចកោណបាននិយាយថាឧបទ្ទវហេតុនេះគឺជាការ «បង្កហេតុ» ហើយបានព្រមានរដ្ឋាភិបាលរបស់ប្រធានាធិបតី វ៉េណេស៊ុយអេឡាលោក Nicolas Maduro កុំឱ្យជ្រៀតជ្រែកក្នុងបេសកកម្មរបស់សហរដ្ឋអាមេរិកប្រឆាំងនឹងការជួញដូរគ្រឿងញៀន និងអំពើភេរវកម្ម។ ទោះយ៉ាងណានាវាចម្បាំងអាមេរិកមិនបានឆ្លើយតបនឹងយន្តហោះរបស់វ៉េណេស៊ុយអេឡាទេ។

បញ្ហានេះកើតឡើងចំពេលមានភាពតានតឹងកាន់តែខ្លាំង ដោយក្រុងវ៉ាស៊ីនតោនបានចោទប្រកាន់លោក Maduro ពីទំនាក់ទំនងជាមួយក្រុមជួញដូរគ្រឿងញៀន និងបានផ្តល់រង្វាន់ទ្វេដងសម្រាប់ការចាប់ខ្លួនលោកដល់ ៥០ លានដុល្លារ។ ថ្មីៗនេះ កងកម្លាំងអាមេរិកបានបំផ្លាញទូកល្បឿនលឿនមួយនៅតំបន់ការ៉ាប៊ីន ដោយអះអាងថា វាមានជាប់ពាក់ព័ន្ធនឹងការជួញដូរគ្រឿងញៀន និងបានសម្លាប់មនុស្ស ១១ នាក់នៅលើទូក។ វ៉េណេស៊ុយអេឡា បាននិយាយថា ការវាយប្រហារនេះគឺជាការសម្លាប់ខុសច្បាប់ ហើយអ្នកជំនាញផ្នែកច្បាប់ក៏បានសង្ស័យថាតើវាត្រូវបានអនុញ្ញាតនៅក្រោមច្បាប់អន្តរជាតិដែរឬទេ។

ទន្ទឹមនឹងនោះ លោក Maduro បានបង្កើនកងជីវពលជាតិរបស់វ៉េណេស៊ុយអេឡា ហើយបានព្រមានថា ប្រសិនបើអាមេរិកវាយប្រហារ លោកនឹងអំពាវនាវដល់ប្រជាជនទូទាំងប្រទេស ប្រយុទ្ធប្រឆាំងនឹងការគំរាមកំហែងផ្នែកយោធាអាមេរិក៕