ត្រាំ និយាយថា អាមេរិក​កំពុងពិភាក្សា«យ៉ាង​ស៊ី​ជម្រៅ»ជាមួយក្រុមហាម៉ាស

ប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃសុក្រ​ទី​៥​កញ្ញា​ថា ទីក្រុងវ៉ាស៊ីនតោនកំពុងចូលរួមក្នុងការចរចា«យ៉ាងស៊ីជម្រៅ»ជាមួយ​ហាម៉ាស ហើយបានជំរុញក្រុមសកម្ម​ប្រយុទ្ធ​ប៉ាឡេស្ទីន​មួយ​នេះ​ឲ្យ​ដោះលែងចំណាប់ខ្មាំងទាំងអស់ដែលនៅតែឃុំខ្លួនក្នុងតំបន់ហ្គាហ្សា​ស្ទ្រីប។

លោក ត្រាំ បានប្រាប់អ្នកយកព័ត៌មាននៅឯសេតវិមានថា «យើងកំពុងចរចាយ៉ាងស៊ីជម្រៅជាមួយក្រុមហាម៉ាស។ ប្រសិនបើអ្នកមិនអនុញ្ញាតឲ្យពួកគេ (ចំណាប់ខ្មាំង) ទាំងអស់ចេញទេ វានឹងក្លាយជាស្ថានភាពដ៏លំបាកមួយ។ វានឹងអាក្រក់ណាស់»។

លោក​ប្រធានាធិបតីបាននិយាយទៀត​ថា ភ្នាក់ងារ​សម្ងាត់​បានណែនាំថា ឈ្លើយសឹកខ្លះអាចស្លាប់នៅក្នុងការឃុំឃាំង។ មេ​ដឹកនាំ​អាមេរិក​បាន​បន្ថែម​ថា «ខ្ញុំគិតថា ក្នុង​ចំណោម​២០នាក់ អាចមានអ្នកស្លាប់ថ្មីៗនេះ គឺជាអ្វីដែលខ្ញុំកំពុងទទួល​បាន។ ខ្ញុំសង្ឃឹមថាវាខុសទៅ​ចុះ។ មានមនុស្ស ២០​នាក់ប្រហែលជាតិចជាងបន្តិច ប៉ុន្តែមានមនុស្ស ២០នាក់ដែលយើងចង់រំដោះ។ (សម្រាប់​អ្នកស្លាប់) យើង​ចង់​បាន​សាកសព​ពួកគេ»។

ក្រុម​ហាម៉ាសបានចាប់ចំណាប់ខ្មាំងប្រហែល ២៥០​នាក់ទៅកាន់តំបន់ហ្គាហ្សា ក្នុងអំឡុងពេលការវាយប្រហារឆ្លងព្រំដែន​លើ​ប្រទេស​អ៊ីស្រាអែលកាលពីថ្ងៃទី​៧​ខែតុលាឆ្នាំ​២០២៣។ មន្ត្រីអ៊ីស្រាអែលប៉ាន់ស្មានថា ប្រហែល ៥០​នាក់នៅតែស្ថិតក្នុងតំបន់ហ្គាហ្សា ដោយមានប្រហែល ២០​នាក់ត្រូវ​គេ​ជឿថានៅរស់រាន​មាន​ជីវិត។

វិបត្តិមនុស្សធម៌នៅ​តែ​កំពុង​រីករាលដាល​ដល់ភាគីទាំងពីរ។ ជនជាតិប៉ាឡេស្ទីនជាង ១០ ៤០០​នាក់កំពុងត្រូវបានឃុំខ្លួននៅក្នុងពន្ធនាគារអ៊ីស្រាអែល ដោយក្រុមសិទ្ធិមនុស្សរាយការណ៍អំពីការរំលោភបំពាន និង​ការធ្វើទារុណកម្ម។

កាលពីថ្ងៃទី១៨​ខែសីហា ក្រុមហាម៉ាសបានទទួលយកកិច្ចព្រមព្រៀងឈប់បាញ់ និងដោះលែងចំណាប់ខ្មាំង ដែលសម្របសម្រួលដោយអ្នកសម្រុះសម្រួលអេហ្ស៊ីប និងកាតា ប៉ុន្តែអ៊ីស្រាអែលមិនទាន់ឆ្លើយតបនៅឡើយ។ ផ្ទុយ​ទៅ​វិញ នាយក​រដ្ឋមន្ត្រី បេនចាមីន ណេតាន់យ៉ាហ៊ូ បាន​បញ្ជា​ឲ្យ​យោធា​បន្ត​ផែនការ​វាយ​កាន់កាប់​ទីក្រុងហ្គាហ្សា។

យោងតាមអាជ្ញាធរក្នុង​តំបន់ ចាប់តាំងពីខែតុលា​ឆ្នាំ​២០២៣ យុទ្ធនាការរបស់អ៊ីស្រាអែលបានសម្លាប់ជនជាតិប៉ាឡេស្ទីនជិត ៦៤ ០០០​នាក់នៅ​ហ្គាហ្សា ហើយបានធ្វើ​ឲ្យ​តំបន់នេះ​ប្រឈមនឹងគ្រោះទុរ្ភិក្ស និងការបំផ្លិចបំផ្លាញស្ទើរតែទាំងស្រុង៕

ដោយ៖ ឈាង