ផ្ទុះបាតុកម្មហិង្សា សម្លាប់មនុស្ស១៩នាក់នៅនេប៉ាល់ ក្រោយរដ្ឋាភិបាលបិទខ្ទប់បណ្ដាញសង្គម

យោងតាមការចេញផ្សាយរបស់កាសែត New York Times នៅថ្ងៃទី០៩ខែកញ្ញា យ៉ាងហោចណាស់មនុស្ស ១៩នាក់បានស្លាប់ និងរាប់រយនាក់ទៀតរងរបួសនៅក្នុងប្រទេសនេប៉ាល់ ក្នុងបាតុកម្មដែលបានផ្ទុះឡើងស្ទើរពេញប្រទេសប្រឆាំងនឹងការបិទខ្ទប់របស់រដ្ឋាភិបាលលើបណ្ដាញសង្គមសំខាន់ៗ និងការកើនឡើងនៃកំហឹងចំពោះអំពើពុករលួយ។

បាតុកម្មនេះភាគច្រើនធ្វើឡើងដោយយុវជនដោយដាក់ឈ្មោះថា «បាតុកម្មរបស់ Gen Z» និងបានប្រែក្លាយជាហិង្សាយ៉ាងឆាប់រហ័ស នៅពេលដែលកងកម្លាំងសន្តិសុខបានប្រើគ្រាប់កាំភ្លើងពិត និងកាណុងបាញ់ទឹកដើម្បីបំបែកហ្វូងមនុស្សនៅក្នុងទីក្រុង Kathmandu និងទីក្រុងដទៃទៀត។

បាតុកម្មដ៏ហិង្សានេះផ្ទុះឡើងបន្ទាប់ពីការហាមឃាត់បណ្ដាញសង្គមដូចជា Facebook, Instagram, WhatsApp និង WeChat របស់រដ្ឋាភិបាលនេប៉ាល់ បន្ទាប់ពីក្រុមហ៊ុនទាំងនោះបដិសេធមិនចុះឈ្មោះក្រោមច្បាប់ថ្មីរបស់រដ្ឋាភិបាល ។ ទោះយ៉ាងណារដ្ឋាភិបាលនេប៉ាល់បានប្រកាសថាខ្លួននឹងដកការរឹតបន្តឹងវិញ។

ក្រុមបាតុករក៏បានសម្តែងការខកចិត្តចំពោះវិសមភាពសេដ្ឋកិច្ច និងអំពើពុករលួយ ដោយចោទប្រកាន់នាយករដ្ឋមន្ត្រីលោក K.P. Sharma Oli ថាបានបំផ្លាញលទ្ធិប្រជាធិបតេយ្យ។ គណបក្សប្រឆាំង និងសូម្បីតែសមាជិកបក្សរបស់លោកមួយចំនួន ក៏បានអំពាវនាវឱ្យលោក Oli ចុះចេញពីតំណែងដែរ។

បើតាមមន្ទីរពេទ្យក្នុងទីក្រុង Kathmandu បានរាយការណ៍ថាមានអ្នកស្លាប់ និងរបួសច្រើនលើសលប់ ខណៈដែលការតវ៉ារីករាលដាលដល់ទីក្រុង Pokhara, Chitwan និង Janakpurថែមទៀត។

ជាមួយគ្នានេះក្តីបារម្ភរបស់អន្តរជាតិក៏បានកើនឡើងដែរ ដោយអង្គការសហប្រជាជាតិ និងស្ថានទូតជាច្រើនបានជំរុញឱ្យមានការអត់ធ្មត់ និងការស៊ើបអង្កេតលើការចោទប្រកាន់ថាមានការប្រើកម្លាំងសន្តិសុខហួសហេតុទៅលើបាតុករ។ ក្រុមអ្នកវិភាគនិយាយថា បាតុកម្មនេះបង្ហាញពីអំណាចនយោបាយរបស់យុវជននេប៉ាល់ និងការធ្វើឱ្យមានការខកចិត្តយ៉ាងខ្លាំងជាមួយគណបក្សសំខាន់ៗរបស់ប្រទេស ដោយចោទប្រកាន់ថាមិនដោះស្រាយអំពើពុករលួយ៕

អត្ថបទ៖ ប៊ុន សុភាព