តោ៥ក្បាល ចាប់ហែកស៊ីបុគ្គលិកសួនសត្វថៃ នៅចំពោះមុខទេសចរ

សត្វតោចំនួន៥ក្បាល បានចាប់ហែកស៊ីបុគ្គលិកសួនសត្វម្នាក់នៅចំពោះមុខទេសចរថៃ និងបរទេស ក្នុងទីក្រុងបាងកក ដែលបង្កការភ័យរន្ធត់គ្មាននរណាហ៊ានចូលទៅជួយ។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Amarin TV, ហេតុការណ៍នេះ កើតឡើងនៅឯសួនសត្វមួយ (មិនបញ្ចេញឈ្មោះ) ស្ថិតក្នុងតំបន់ Ram Intra នាវេលាម៉ោង១១ព្រឹក ថ្ងៃទី១០ខែកញ្ញាឆ្នាំ២០២៥ ។

យោងតាមរបាយការណ៍ពីប្រភពក្នុងស្រុក, ដំបូងឡើយបុគ្គលិកសួនសត្វជិះរថយន្ត Jeep ដើម្បីពិនិត្យសួន ប៉ុន្តែមិនដឹងមូលហេតុអ្វីឡើយស្រាប់តែបុគ្គលិកម្នាក់នោះចុះពីរថយន្ត រួចក៏ត្រូវសត្វតោមួយក្បាលលបវាយប្រហារពីខាងក្រោយ។ 

ភ្លាមៗនោះ មានសត្វតោចំនួន៤ក្បាលទៀត បានចូលមកបន្ថែម ចាប់ហែកស៊ីបុគ្គលិកម្នាក់នោះ ស្លាប់នៅហ្នឹងកន្លែងទាំងដែល ទេសចរណ៍ជាតិនិងអន្តរជាតិ ឃើញហេតុការណ៍ដ៏រន្ធត់នេះផ្ទាល់ភ្នែក។

មន្ត្រីម្នាក់ទៀតនៅសួនសត្វខាងលើបានប្រាប់ប៉ូលិសថា មូលហេតុដែលបុគ្គលិកត្រូវតោចាប់ហែកស៊ីនោះ ចុះពីរថយន្តព្រោះរូបគេ ចុះទៅរើសអ្វីម្យ៉ាងនៅលើដី ប៉ុន្តែមិនដឹងថាជារបស់អ្វីនោះទេ។

ទោះបីជាយ៉ាងណាក៏ដោយ ប៉ូលិសថៃ កំពុងបើកការស៊ើបអង្កេតហេតុការណ៍នេះ៕ 

អត្ថបទ៖ សុខ សុវណ្ណ

ចុចអាន៖ ក្មេងស្រីអាយុ១៤ឆ្នាំម្នាក់​​ ត្រូវ​សត្វតោ​វាយប្រហារ​ស្លាប់ នៅ​ប្រទេស​កេនយ៉ា