ភេទទី៣ថៃមួយក្រុមនៅប៉ាតាយ៉ា ព្រួតវាយទេសចរអង់គ្លេស បែកក្បាលហូរឈាមស្រោចខ្លួន 

ទេសចរបរទេសត្រូវជនជាតិថៃធ្វើបាបទៀតហើយ ដោយលើកនេះ បុរសអង់គ្លេស ត្រូវមនុស្សភេទទី៣មួយក្រុមព្រួតវាយឡើងបែកក្បាលហូរឈាមរហាច។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ Bangkok Post នៅថ្ងៃសុក្រទី១២ខែកញ្ញាឆ្នាំ២០២៥ ហេតុការណ៍នេះកើតឡើងនៅខុនដូមួយកន្លែងក្នុងទីក្រុងប៉ាតាយ៉ា នៃខេត្ត ឈុនបុរី។

ប៉ូលិសបានឲ្យដឹងថា បុរសជនជាតិអង់គ្លេសឈ្មោះ Duncan Hamish Kirkwood អាយុ៦៥ឆ្នាំ ត្រូវមនុស្សភេទទី៣ មួយក្រុមមានគ្នា៤នាក់ វាយដំច្រំធាក់បណ្តាលឲ្យបែកក្បាលហូរឈាមស្រោចខ្លួន។

បន្ទាប់ពីហេតុការណ៍នេះ ភេទទី៣ទាំង៤នាក់នោះ បានរត់យករួចខ្លួន ហើយទេសចរបរទេស ត្រូវបានបញ្ជូនទៅព្យាបាលរបួសនៅមន្ទីរពេទ្យ ខណៈប៉ូលិសកំពុងបើកការស៊ើបអង្កេតនិងតាមចាប់ជនដៃដល់។

ករណីនេះ ធ្វើឲ្យគេនឹកឃើញដល់ហេតុការណ៍ដ៏រន្ធត់ដែលកើតលើជនជាតិម៉ាឡេស៊ី២នាក់ ដែលត្រូវជនជាតិថៃ ដុតទាំងរស់នៅកណ្តាលទីក្រុងបាងកក ហើយវាបង្ហាញថា ថៃជាប្រទេសកាន់តែគ្មានសុវត្ថិភាពសម្រាប់ទេសចរ។

កាលពីខែសីហា ទេសចរម៉ាឡេស៊ី២នាក់ជាគូស្នេហ៍នឹងគ្នាឈ្មោះ Gan Xiao Zhen និង Ong Yik Leong ត្រូវបុរសគ្មានការងារធ្វើម្នាក់វាយនិងដុតពួកគេនៅជិតផ្សារទំនើបមួយលើផ្លូវ Ratchadamri ក្នុងទីក្រុងបាងកក ដែលហេតុការណ៍នោះ បានបង្កការភ្ញាក់ផ្អើលទូទាំងពិភពលោក ជាពិសេសនៅតំបន់អាស៊ី។

តាមពិតទៅ មុនពួកគេមកថៃ ឪពុករបស់ពួកគេក៏មិនបានចង់ឲ្យកូនមកលេងប្រទេសនេះដែរ និងបានហាមឃាត់ដោយបារម្ភថា នៅក្នុងប្រទេសថៃពុំមានសុវត្ថិភាពឡើយ៕

អត្ថបទ៖ សុខ សុវណ្ណ

ចុចអាន៖ ទេសចរបរទេសម្នាក់ទៀត ស្លាប់នៅ ថៃ