ព័ត៌មានអន្ដរជាតិ

ប៉ូលិសយ៉ាងហោច២៦នាក់រងរបួស ខណៈអ្នកតវ៉ាហិង្សា២៥នាក់ត្រូវចាប់ខ្លួននៅទីក្រុងឡុងដ៍

បានផុស

៨ ខែ មុន

នៅ

ថ្ងៃអាទិត្យ ១៤ កញ្ញា ២០២៥

ដោយ

កម្លាំងសមត្ថកិច្ចនៅទីក្រុងឡុងដ៍ប្រទេសអង់គ្លេសបានឃាត់ខ្លួនក្រុមអ្នកតវ៉ាប្រមាណ២៥នាក់នៅថ្ងៃអាទិត្យនៅក្នុងការប៉ះទង្គិចគ្នាជាមួយសមត្ថកិច្ច ដែលបណ្តាលឲ្យសមត្ថកិច្ចយ៉ាងហោចណាស់២៦នាក់រងរបួស។ នេះយោងតាមការផ្សាយរបស់ Al Jaazeera និង The Independent។

ប៉ូលិសអង់គ្លេសល្បាតក្នុងការតវ៉ាហិង្សានៅទីក្រុងឡុងដ៏នៅថ្ងៃអាទិត្យនេះ។ Getty Image

Al Jaazeera បានផ្សាយថា មនុស្សជាង ១១ម៉ឺននាក់ដែលតវ៉ាប្រឆាំងនឹងអន្តោប្រវេសន៍ បានដើរដង្ហែរឆ្លងកាត់រដ្ឋធានីឡុងដ៍របស់ចក្រភពអង់គ្លេសនៅក្នុងបាតុកម្មដ៏ធំបំផុតដែលផ្តួចផ្តើមឡើងដោយអ្នកស្តាំនិយមរបស់ប្រទេសនេះ។

អំពើហិង្សានៅឯការដង្ហែក្បួនដែលដាក់ថា «Unite The Kingdom» ចាប់ផ្តើមកាលពីថ្ងៃសៅរ៍បានកើតឡើងនៅពេលដែលប៉ូលីសបានព្យាយាមរារាំងក្រុមបាតុករស្តាំនិយម ឲ្យនៅដាច់ឆ្លាយដោយឡែកពីក្រុមបាតុករម្ខាងទៀតដែលជាគូប្រជែងមានគ្នាប្រហែល៥០០០នាក់ដែលបានប្រមូលផ្តុំនៅ White Hall កណ្តាលទីក្រុងឡុងដ៍។

ប៉ូលិសក្រុងឡុងដ៍បាននិយាយថា ការហែក្បួនដែលរៀបចំដោយសកម្មជនប្រឆាំងជនអន្តោប្រវេសន៍ លោក Tommy Robinson បានទាក់ទាញមនុស្សប្រមាណពី ១១ម៉ឺនទៅ១៥ម៉ឺននាក់ ដែលលើសពីការរំពឹងទុក។

កម្លាំងប៉ូលិសបាននិយាយថា មន្ត្រីរបស់ខ្លួនប្រឈមនឹង«អំពើហិង្សាដែលមិនអាចទទួលយកបាន» ពីក្រុមបាតុករមួយចំនួន ហើយពួកគេបួននាក់បានរងរបួសយ៉ាងធ្ងន់ធ្ងរ ក្នុងចំណោមពួកគេ មានបាក់ធ្មេញ បាក់ខ្ទង់ច្រមុះ កន្ត្រាក់ និងរបួសក្បាលជាដើម។

ជំនួយការស្នងការ Matt Twist បាននិយាយនៅក្នុងសេចក្តីថ្លែងការណ៍មួយថា «គ្មានការសង្ស័យទេដែលមនុស្សជាច្រើនបានមកប្រើសិទ្ធិស្របច្បាប់របស់ពួកគេក្នុងការតវ៉ា ប៉ុន្តែមានមនុស្សជាច្រើនដែលចូលមកក្នុងចេតនាលើអំពើហិង្សា» ។

ស្នងការប៉ូលិសបន្ថែមថា៖«ពួកគេបានប្រឈមមុខនឹងមន្ត្រី ដោយចូលរួមក្នុងការបំពានទាំងផ្លូវកាយ និងពាក្យសំដី ហើយបានខិតខំប្រឹងប្រែងយ៉ាងម៉ឺងម៉ាត់ក្នុងការរំលោភលើខ្សែហាមចូល ដើម្បីរក្សាសុវត្ថិភាពទាំងអស់គ្នា។»

Twist បាននិយាយថាយ៉ាងហោចណាស់មនុស្ស ២៥នាក់ត្រូវបានចាប់ខ្លួនពីបទហិង្សាដោយពណ៌នាការឃុំខ្លួនថាជា “គ្រាន់តែជាការចាប់ផ្តើម” ។

លោកបានបន្ថែមថា «យើងកំពុងកំណត់អត្តសញ្ញាណអ្នកដែលជាប់ពាក់ព័ន្ធក្នុងករណីបង្កភាពវឹកវរ ហើយពួកគេអាចរំពឹងថានឹងប្រឈមមុខនឹងសកម្មភាពប៉ូលីសយ៉ាងធ្ងន់ធ្ងរក្នុងរយៈពេលប៉ុន្មានថ្ងៃ និងសប្តាហ៍ខាងមុខនេះ»៕

រ៉ាន់ រើយ